మిలిటెంట్ల కాల్పులు: ఇద్దరు పోలీసుల మృతి, కొనసాగుతున్న సెర్చ్ ఆపరేషన్

శ్రీనగర్: జమ్మూకాశ్మీర్‌లో మరోసారి ఉగ్రవాదులు రెచ్చిపోయారు. బందిపొర జిల్లాలో శుక్రవారం మిలిటెంట్లు జరిపిన కాల్పుల్లో ఇద్దరు పోలీసులు వీరమరణం పొందారు. గుల్షన్ చౌక్ ప్రాంతంలో శుక్రవారం సాయంత్రం పోలీసుల బృందంపై ఒక్కసారిగా మిలిటెంట్లు కాల్పులు జరిపారని జమ్మూకాశ్మీర్ పోలీసు అధికారులు తెలిపారు.

ఎస్జీఎస్టీ మహ్మద్ సుల్తాన్, సీటీ ఫయాదవ్ అహ్మద్‌లు మిలిటెంట్ల కాల్పుల్లో తీవ్ర గాయపడ్డారని, వెంటనే వారిని ఆస్పత్రికి తరలించామని చెప్పారు. అయితే, అప్పటికే ఆ ఇద్దరు పోలీసులు మరణించారని వైద్యులు నిర్ధారించారని తెలిపారు. ఆ ప్రాంతాన్ని చుట్టుముట్టామని, నిందితుల కోసం గాలిస్తున్నామని కాశ్మీర్ జోన్ పోలీసులు తెలిపారు.

జమ్మూకాశ్మీర్ మాజీ ముఖ్యమంత్రి ఒమర్ అబ్దుల్లా కూడా ఉగ్రదాడిని ఖండించారు.
'ఉత్తర కాశ్మీర్‌లోని బందీపూర్ ప్రాంతంలో పోలీసులపై జరిగిన ఉగ్రదాడిని నేను ఖండిస్తున్నాను. ఈ దాడిలో జమ్మూ కాశ్మీర్ పోలీసు సిబ్బంది మహ్మద్ సుల్తాన్, ఫయాజ్ అహ్మద్ ప్రాణాలు కోల్పోయారు. వారి ఆత్మకు శాంతి చేకూరాలని, వారి కుటుంబాలకు దేవుడు మనోధైర్యాన్ని ప్రసాదించాలని కోరుకుంటున్నాను' అంటూ ఒమర్ అబ్దుల్లా ట్వీట్ చేశారు.

జమ్మూ కాశ్మీర్‌లోని షోపియాన్ జిల్లాలో బుధవారం పోలీసులు, భద్రతా బలగాల మధ్య జరిగిన ఎన్‌కౌంటర్‌లో ముగ్గురు ఉగ్రవాదులు మట్టుబెట్టిన కొద్ది రోజుల తర్వాత లోయలో తాజా ఉగ్రవాదుల దాడి జరిగింది.

ఉగ్రవాదులు లొంగిపోవడానికి నిరాకరించడంతో పోలీసులు, భద్రతా దళాలు కాల్పులు జరిపాయి. 'సెర్చ్ ఆపరేషన్ సమయంలో, ఉగ్రవాదుల ఉనికిని నిర్ధారించడంతో, వారు లొంగిపోయేందుకు పదేపదే అవకాశాలు ఇచ్చారు. అయినప్పటికీ, వారు ఎన్‌కౌంటర్‌కు దారితీసేలా జాయింట్ సెర్చ్ పార్టీపై విచక్షణారహితంగా కాల్పులు జరిపారు' అని పోలీసు అధికారి ఒకరు వార్తా సంస్థ ఐయాన్స్ కి తెలిపారు.

హతమైన మిలిటెంట్లను చెక్ చోళన్ షోపియాన్ నివాసి అమీర్ హుస్సేన్ గనీ, కప్రాన్ షోపియాన్ నివాసి రయీస్ అహ్మద్ మీర్, ఖుద్వానీ కుల్గాం నివాసి హసీబ్ అహ్మద్ దార్‌గా గుర్తించారు. వారి వద్ద నుండి ఒక AK-74 రైఫిల్, రెండు పిస్టల్స్‌తో సహా నేరారోపణ చేసే పదార్థాలు, ఆయుధాలు, మందుగుండు సామగ్రిని కూడా స్వాధీనం చేసుకున్నట్లు పోలీసులు తెలిపారు.

English summary

J&K: 2 Policemen martyred In Militant Attack In Bandipora.