కేరళలో వెస్ట్ నైల్ ఫీవర్ కలకలం: 47 ఏళ్ల వ్యక్తి మృతి, దోమల ద్వారానే వ్యాప్తి

తిరువనంతపురం: కేరళలోని త్రిసూర్ జిల్లాలో వెస్ట్ నైలు జ్వరం కారణంగా 47 ఏళ్ల వ్యక్తి ఆదివారం నాడు మరణించాడు. గత మూడేళ్లలో వెక్టర్ ద్వారా సంక్రమించే ఇన్‌ఫెక్షన్ కారణంగా రాష్ట్రంలో సంభవించిన మొదటి మరణం ఇదేనని, ఆరోగ్య శాఖ వెల్లడించింది. వ్యాధిని నిరోధించడానికి దోమల వృద్ధి ప్రదేశాలను తొలగించడానికి ప్రజలకు సూచనలు చేసింది.

వెస్ట్ నైల్ ఫీవర్ అనేది ఫ్లేవివైరస్ WNV వల్ల కలిగే దోమల ద్వారా సంక్రమించే వ్యాధి, ఇది జపనీస్ ఎన్సెఫాలిటిస్, ఎల్లో ఫీవర్, సెయింట్ లూయిస్ ఎన్సెఫాలిటిస్‌కు కారణమయ్యే వైరస్‌లకు సంబంధించినది.

త్రిసూర్ జిల్లాలో వెస్ట్ నైల్ ఫీవర్ కేసును గుర్తించిన వెంటనే ముందస్తు చర్యలు తీసుకున్నట్లు కేరళ ఆరోగ్య శాఖ ఒక ప్రకటనలో తెలిపింది.వైద్య కార్యాలయం నుంచి ప్రత్యేక బృందం బాధితుడి ప్రాంతాన్ని సందర్శించింది. జిల్లా వెక్టర్ కంట్రోల్ బోర్డ్ పరీక్షల కోసం జిల్లాలోని వివిధ ప్రాంతాల నుంచి నమూనాలను తీసుకుంది. ప్రాంతంలోని దోమల ఉత్పత్తి ప్రదేశాలను నాశనం చేయడానికి చర్యలు తీసుకున్నాము అని ప్రకటన తెలిపింది.

మే 17న ఆ వ్యక్తికి జ్వరం, ఇతర లక్షణాలు కనిపించాయని, వివిధ ఆసుపత్రుల నుంచి చికిత్స పొందిన తరువాత, అతను త్రిసూర్‌లోని ప్రభుత్వ వైద్య కళాశాలలో చేరాడని, అక్కడ అతనికి వెస్ట్ నైల్ జ్వరం ఉన్నట్లు నిర్ధారణ అయిందని సోర్సెస్ పీటీఐకి తెలిపాయి. జిల్లా అధికారులు అప్రమత్తంగా ఉండాలని, ముందుజాగ్రత్త చర్యలు తీసుకోవాలని వైద్యారోగ్య శాఖ ఆదేశాలు జారీ చేసింది.

ప్రతిచోటా దోమల ఉత్పత్తి కేంద్రాలను నాశనం చేయడంలో ప్రాముఖ్యత ఇవ్వాలి. వ్యక్తులు బాధ్యత వహించి వారి నివాస ప్రాంతాలను శుభ్రం చేయాలి. మూసుకుపోయిన కాలువలు, నిలిచిపోయిన నీటిని శుభ్రం చేయాలి, "అని రాష్ట్ర ఆరోగ్య మంత్రి వీణా జార్జ్ అన్నారు. వెస్ట్ నైల్ వైరస్ మానవులలో ప్రాణాంతక నరాల వ్యాధిని కలిగిస్తుందని, అయితే సోకిన వారిలో చాలా మందికి ఎటువంటి లక్షణాలు కనిపించవని ఆమె చెప్పారు. ఇది ప్రధానంగా సోకిన దోమల కాటు ద్వారా వ్యాపిస్తుంది.

వెస్ట్ నైలు జ్వరం క్యూలెక్స్ జాతి దోమల ద్వారా వ్యాపిస్తుందని ఆరోగ్య శాఖ తెలిపింది. ఇది మొదటిసారిగా 1937లో ఉగాండాలో కనుగొనబడింది. ఈ జ్వరం మొదటిసారిగా 2011లో కేరళలో కనుగొనబడింది. మలప్పురానికి చెందిన ఆరేళ్ల బాలుడు 2019లో ఈ జ్వరం కారణంగా మరణించాడు.

English summary

Kerala on alert after A man dies due to West Nile fever.