మళ్లీ గుర్తొస్తున్న "లాక్ డౌన్" కష్టాలు.. గ్యాస్ కొరతతో సామాన్యుడు విలవిల !!

భారత దేశవ్యాప్తంగా LPG సిలిండర్ల సరఫరాపై అనిశ్చితి నెలకొనడంతో చిన్న వ్యాపారులు, హోటల్ యజమానులు తీవ్ర ఇబ్బందులు ఎదుర్కొంటున్నారు. ముఖ్యంగా ప్రముఖ నగరాల్లో ఈ ప్రభావం స్పష్టంగా కనిపిస్తోంది. సిలిండర్ల కొరత, పెరుగుతున్న ధరలు కారణంగా అనేక ఆహార వ్యాపారాలు మూతపడే పరిస్థితి ఏర్పడింది.

మూతపడుతున్న ఫుడ్ జాయింట్లు..

ఇప్పటికే నోయిడా సహా దేశవ్యాప్తంగా ఉన్న ప్రముఖ నగరాల్లో అనేక ఢాబాలు, ఫుడ్ స్టాళ్లు తాత్కాలికంగా మూతపడ్డాయి. LPG సిలిండర్లు లభ్యం కాకపోవడంతో కొన్ని రెస్టారెంట్లు తమ మెనూలో వంటకాలను తగ్గించాయి. మరికొన్ని పూర్తిగా కార్యకలాపాలను నిలిపివేశాయి. ఈ పరిణామం వల్ల వేలాది మంది చిన్న వ్యాపారులు, కార్మికులు ఆర్థిక ఇబ్బందులను ఎదుర్కొంటున్నారు.

గిగ్ కార్మికులపై ప్రభావం..

LPG కొరత ప్రభావం కేవలం హోటళ్లకే పరిమితం కాలేదు. ఆహార డెలివరీ రంగంపై కూడా తీవ్ర ప్రభావం పడింది. కార్మిక సంఘాల ప్రకారం అనేక నగరాల్లో డెలివరీ పనులు 50-60 శాతం వరకు తగ్గాయి. దీంతో ఫుడ్ డెలివరీ ప్లాట్‌ఫారమ్‌లపై ఆధారపడే వేలాది గిగ్ కార్మికులు ఆదాయం కోల్పోతున్నారు. రోజువారీ ఆర్డర్లపై ఆధారపడే కార్మికులు ఇప్పుడు పనిలేక ఇబ్బందులు పడుతున్నారు.

యుద్ధ పరిస్థితుల ప్రభావం..

ప్రపంచ వ్యాప్తంగా ఉన్న ఉద్రిక్తతలు కూడా LPG సరఫరాపై ప్రభావం చూపుతున్నాయని నిపుణులు చెబుతున్నారు. ముఖ్యంగా Iran ప్రాంతంలో కొనసాగుతున్న ఉద్రిక్తతలు, అలాగే Israel సంబంధిత సంఘర్షణల కారణంగా అంతర్జాతీయ ఇంధన సరఫరా వ్యవస్థలో అంతరాయాలు ఏర్పడుతున్నాయని అంటున్నారు. ఈ పరిస్థితి భారతదేశానికి LPG సరఫరాపై కూడా పరోక్షంగా ప్రభావం చూపుతోంది.

ప్రభుత్వ హామీ..

ఈ నేపథ్యంలో కేంద్ర ప్రభుత్వం ప్రజలకు భరోసా ఇవ్వడానికి ప్రయత్నిస్తోంది. పెట్రోలియం శాఖ మంత్రి Hardeep Singh Puri మాట్లాడుతూ దేశంలో గృహ వినియోగదారులకు LPG కొరత లేదని స్పష్టం చేశారు. వివిధ దేశాల నుంచి గ్యాస్ దిగుమతులు జరుగుతున్నాయని తెలిపారు. అదే సమయంలో దేశీయ ఉత్పత్తిని పెంచేందుకు ప్రభుత్వం చర్యలు తీసుకున్నట్లు కూడా వెల్లడించారు.

ధరల పెరుగుదల..

ఇటీవల ప్రభుత్వం LPG ధరలను కూడా పెంచింది. మార్చి 7న 14.2 కిలోల దేశీయ సిలిండర్ ధర రూ.60 పెరిగింది. అదే సమయంలో 19 కిలోల వాణిజ్య సిలిండర్ ధర రూ.115 పెరిగింది. ఈ ధరల పెరుగుదల చిన్న వ్యాపారాలపై మరింత భారాన్ని మోపింది.

బ్లాక్ మార్కెట్ దందా..

గ్యాస్ సరఫరా సమస్యల కారణంగా బ్లాక్ మార్కెటబ్ దందా కూడా వేగంగా పెరుగుతోంది. కొన్ని ప్రాంతాల్లో ఒక సిలిండర్ ధర రూ.3,000 వరకు చేరినట్లు నివేదికలు చెబుతున్నాయి. హోటల్ యజమానులు, చిన్న వ్యాపారులు తమ వ్యాపారాలను కొనసాగించడానికి అధిక ధరలకు సిలిండర్లు కొనుగోలు చేయాల్సిన పరిస్థితి ఏర్పడింది.

గ్యాస్ ఏజెన్సీల వద్ద భారీ క్యూలు..

మరోవైపు దేశంలోని అనేక నగరాల్లో గ్యాస్ ఏజెన్సీల వద్ద భారీ క్యూలు కనిపిస్తున్నాయి. వినియోగదారులు సిలిండర్ రీఫిల్ కోసం గంటల తరబడి నిరీక్షిస్తున్నారు. కొన్ని ప్రాంతాల్లో బుకింగ్ చేసిన తర్వాత కూడా ఒక వారం వరకు సిలిండర్ డెలివరీ ఆలస్యం అవుతున్నట్లు వినియోగదారులు చెబుతున్నారు.

LPG కొరత నేపథ్యంలో చాలా మంది ప్రత్యామ్నాయ మార్గాలను అన్వేషిస్తున్నారు. కొన్ని హోటళ్లు మళ్లీ వంటచెరకు, బొగ్గు స్టవ్‌లను ఉపయోగించడం ప్రారంభించాయి. ఇండక్షన్ స్టవ్‌లు, ఎలక్ట్రిక్ కుక్‌టాప్‌ల అమ్మకాలు కూడా పెరిగినట్లు సమాచారం. అయితే ఈ పరిస్థితి ఎంతకాలం కొనసాగుతుందో అన్న అనిశ్చితి ప్రజల్లో పెరుగుతోంది.

English summary

The article reports on a nationwide LPG cylinder shortage in India, driving price hikes and delivery delays. It highlights impacts on dhabas, restaurants, and gig workers, with government assurances contrasted by on-the-ground supply constraints and rising consumer anxiety.