మాటమార్చిన మణిశంకర్: మోడీని అలా అనలేదని..

న్యూఢిల్లీ: కాంగ్రెస్ పార్టీ సీనియర్ నేత మణిశంకర్ అయ్యర్ మాటమార్చారు. తాను ఎప్పుడూ నరేంద్ర మోడీని చాయ్‌వాలా అని అనలేదని మణిశంకర్ అయ్యర్ చెప్పుకొస్తున్నారు. నరేంద్ర మోడీని చాయ్‌వాలా అంటూ చులకనగా మాట్లాడిన అయ్యర్ పరోక్షంగా భారతీయ జనతా పార్టీ విజయానికి కొంతమేర దోహపడ్డారనే చెప్పాలి.

ఆయన గురువారం మీడియాతో మాట్లాడుతూ.. తాను అసలు మోడీని ఆ మాటే(చాయ్‌వాలా అని) అనలేదని మణిశంకర్ అయ్యర్ అన్నారు. అంతేగాక ఎన్నికల ప్రచారంలో బిజెపి నేత మోడీపై కాంగ్రెస్ అధ్యక్షురాలు సోనియా గాంధీ, కుమార్తె ప్రియాంక గాంధీ చేసిన వ్యాఖ్యలను మణిశంకర్ సమర్థించారు.

ఎన్నికల ప్రచారంలో మోడీ నీచ రాజకీయాలు చేస్తున్నారని ప్రియాంక గాంధీ తీవ్రమైన ఆరోపణలు చేసిన విషయం తెలిసిందే. ఆమె చేసిన వ్యాఖ్యలను మోడీకి ఎన్నికల ప్రచారంలో బాగానే ఉపయోగపడ్డాయి. తక్కువ కులం కాబట్టే ప్రియాంక అలాంటి వ్యాఖ్యలు చేశారని మోడీ ఎదురుదాడికి దిగారు. ఆమె వ్యాఖ్యలను ఎన్నికల ప్రచారంలో అనుకూలంగా వాడుకోవడంలో మోడీ విజయం సాధించారు.

ఎన్నికల ముందు మణిశంకర్ అయ్యర్ ఓ వార్త ఛానల్‌తో మాట్లాడుతూ... మోడీని చాయ్‌వాలా అంటూ వ్యాఖ్యానించారు. ఎన్నికల్లో ఓడిపోతే చాయ్ కొట్టు పెట్టుకోవచ్చని ఎద్దేవా చేశారు. అయ్యర్ చేసిన వ్యాఖ్యలు బిజెపి ఎన్నికల ప్రచారానికి బాగానే ఉపయోగించుకుంది. చాయ్‌వాలాపై దేశ వ్యాప్తంగా పెద్ద చర్చ కూడా జరిగింది. కాగా, ఇటీవలి ఎన్నికల్లో తమిళనాడులోని మైలదుతురై నుంచి పోటీ చేసిన మణిశంకర్ అయ్యర్ ఓటమి పాలయ్యారు.

English summary

Mani Shankar Aiyar, the man whose verbal attack ultimately contributed to the thumping victory of the BJP, on Thursday said he never used the word 'chaiwala' (tea vendor) for Prime Minister Narendra Modi.