విద్యుత్ వినియోగదారులకు బిగ్ షాక్.. పెరగనున్న ఛార్జీలు!

దేశవ్యాప్తంగా విద్యుత్ వినియోగదారులకు షాకిచ్చే వార్త ఇది. సుప్రీంకోర్టు తీర్పుతో దేశ రాజధాని ఢిల్లీలో విద్యుత్ ధరలు పెరగడం ఖాయంగా కనిపిస్తోంది. అంతే కాకుండా.. సుప్రీంకోర్టు ఈ తీర్పును దేశంలోని ఇతర రాష్ట్రాలలో కూడా అమలు చేయవచ్చని సూచించినట్లు సమాచారం. దీనివల్ల రాబోయే కాలంలో విద్యుత్ ధరల భారం ప్రజలపై మరింత పెరిగే అవకాశం ఉంది.

సుప్రీంకోర్టు తీర్పు.. ధరల పెంపునకు షరతులతో కూడిన అనుమతి
సుప్రీంకోర్టు ఒక కీలక కేసు విచారణలో భాగంగా ఢిల్లీలో విద్యుత్ ధరల పెంపునకు గ్రీన్ సిగ్నల్ ఇచ్చింది. అయితే ఈ పెంపు సముచితంగా, పొదుపుగా ఉండాలని కోర్టు స్పష్టం చేసింది. అంతే కాకుండా ఢిల్లీ విద్యుత్ నియంత్రణ కమిషన్ (DERC) నిర్ణయించిన పరిమితులను ధరలు మించకూడదని గట్టిగా హెచ్చరించింది. ఈ ధరల పెంపు ఎలా ఉండాలి, ఎప్పుడు, ఎంత పెంచాలి అనే దానిపై ఢిల్లీ విద్యుత్ నియంత్రణ కమిషన్ ఒక స్పష్టమైన రోడ్‌మ్యాప్‌ను రూపొందించాలని కోర్టు ఆదేశించింది.పెంచిన ధరలు గృహ, వాణిజ్య, పారిశ్రామిక వినియోగదారులందరికీ వర్తిస్తాయి.

దేశవ్యాప్తంగా ప్రభావం
సుప్రీంకోర్టు ఇచ్చిన ఈ తీర్పు ఢిల్లీతో పాటు దేశంలోని ఇతర రాష్ట్రాలపై కూడా ప్రభావం చూపే అవకాశం ఉంది. ఈ కేసు విద్యుత్ పంపిణీ సంస్థలకు చెల్లించాల్సిన బకాయిలకు సంబంధించింది. ఈ బకాయిలను నియంత్రణ ఆస్తులు (Regulatory Assets) అని అంటారు. దశాబ్దాలుగా పెండింగ్‌లో ఉన్న ఈ బకాయిలను నాలుగేళ్లలోగా పరిష్కరించాలని సుప్రీంకోర్టు ఆదేశించింది.

నియంత్రణ ఆస్తుల ప్రభావం
నియంత్రణ ఆస్తులు అంటే రాష్ట్రాలు/కేంద్రపాలిత ప్రాంతాలకు విద్యుత్ సరఫరా చేసినందుకు విద్యుత్ పంపిణీ సంస్థలకు ప్రభుత్వం చెల్లించాల్సిన బకాయిలు. ఈ బకాయిలను సకాలంలో చెల్లించకపోవడంతో విద్యుత్ పంపిణీ సంస్థలు ఆర్థికంగా నష్టపోతున్నాయి. సుప్రీంకోర్టు తీర్పు ప్రకారం, ఈ బకాయిలను రాబోయే నాలుగేళ్లలో పరిష్కరించాల్సి ఉన్నందున, ఆ భారం ప్రజల మీద పడే అవకాశం ఉంది. దీనివల్ల, నియంత్రణ ఆస్తులు పెండింగ్‌లో ఉన్న రాష్ట్రాల్లోని గృహ, వాణిజ్య, పారిశ్రామిక వినియోగదారులందరికీ విద్యుత్ ధరలు గణనీయంగా పెరిగే అవకాశం ఉంది.

English summary

Electricity consumers in Delhi and possibly across India may face tariff hikes following a Supreme Court verdict. The court directed regulatory commissions to clear power dues in four years, burdening consumers.