సెక్స్ సీడీలతో సెక్రటరీ బ్లాక్ మెయిల్ : ఆప్ బహిష్కృత నేత

న్యూఢిల్లీ : ఆప్ మంత్రి సెక్స్ సీడీల వివాదం రోజుకో మలుపు తిరుగుతోంది. రేషన్ కార్డు ఇప్పిస్తానంటూ.. ఇంటికి పిలిచి తనను లోబర్చుకున్నాడని బాధిత మహిళ ఢిల్లీ పోలీసులకు ఫిర్యాదు చేయడంతో ఆప్ బహిష్కృత నేత సందీప్ కుమార్ పోలీసుల ఎదుట లొంగిపోయిన సంగతి తెలిసిందే.

ఈ నేపథ్యంలోనే.. సందీప్ కుమార్ సెక్స్ సీడీల లీకేజీ ఆయన పర్సనల్ సెక్రటరీ ప్రవీణ్ కుమార్ నిర్వాకమే అన్న వార్తలు తెరపైకి వచ్చాయి. పోలీసు విచారణ ఎదుర్కొంటున్న సందీప్ కుమార్ కూడా తాజాగా ఇదే విషయాన్ని స్పష్టం చేసినట్లు సమాచారం. సెక్స్ సీడీలతో ప్రవీణ్ కుమార్ తనను బ్లాక్ మెయిల్ చేసినట్లు సందీప్ కుమార్ పోలీసులతో వెల్లడించినట్లు తెలుస్తోంది.

సందీప్ కుమార్ సెక్స్ సీడీలను లీక్ చేసి.. పలువురికి పంపిణీ చేసినట్లు ప్రవీణ్ కుమార్ పై ఆరోపణలు వస్తుండడంతో.. సోమవారం నాడు ప్రవీణ్ కుమార్ ను పోలీసులు అదుపులోకి తీసుకున్నారు. ప్రస్తుతం ప్రవీణ్ కుమార్, సందీప్ కుమార్ ఇద్దరు పోలీసులు కస్టడీలోనే ఉన్నారు.

కాగా, కేసులో తొలుత తనను సమర్థించుకునే ప్రయత్నం చేసిన సందీప్ కుమార్.. ఏకంగా బాధిత మహిళే పోలీసులకు ఫిర్యాదు చేయడంతో లొంగిపోక తప్పలేదు. 11 నెలల క్రితం రేషన్ కార్డు కోసం సందీప్ ఇంటికి వెళితే.. కూల్ డ్రింక్ లో మత్తు మందు కలిపి తాను స్పృహ కోల్పోయాక అత్యాచారానికి ఒడిగట్టాడని బాధిత మహిళ ఫిర్యాదులో పేర్కొంది. దీంతో సందీప్ కుమార్ పై అత్యాచారం కేసు నమోదయింది. కోర్టు ఆదేశంతో మూడు రోజుల పాటు సందీప్ కస్టడీ కొనసాగుతోంది.

English summary

Former Delhi minister Sandeep Kumar has reportedly told the police that his private secretary was allegedly blackmailing him with a sex CD that showed the minister in a compromising position with two women.