ముంబై రైలు పేలుళ్ల కేసులో సుప్రీంకోర్టు కీలక నిర్ణయం.. హైకోర్టు ఆదేశాలపై స్టే

2006 Mumbai Train Blasts Case: ముంబై సీరియల్ రైలు బాంబు పేలుళ్ల కేసులో సుప్రీంకోర్టు కీలక తీర్పు వెలువరించింది. ఈ కేసులో నిందితులను నిర్దోషులుగా విడుదల చేస్తూ బాంబే హైకోర్టు ఇచ్చిన ఉత్తర్వులపై స్టే విధించింది. బాంబే హైకోర్టు తీర్పును సవాలు చేస్తూ మహారాష్ట్ర ప్రభుత్వం సుప్రీంకోర్టును ఆశ్రయించింది. ఈ ఘటనలో నిందితులుగా ఉన్న 12 మందిని నిర్దోషులుగా విడుదల చేయాలని జులై 22, 2025న బాంబే హైకోర్టు ఆదేశాలు జారీ చేసింది. ఈ 12 మంది నిందితులలో ఒకరు జైలులోనే మరణించారు.

సుప్రీంకోర్టు తీర్పులో ఏముంది?
ముంబై సీరియల్ లోకల్ ట్రైన్ బ్లాస్ట్ కేసులో రెండు రోజుల క్రితం వచ్చిన బాంబే హైకోర్టు తీర్పుపై సుప్రీంకోర్టు స్టే విధించింది. అయితే, ఈ స్టే ఆదేశం నిందితుల జైలు నుండి విడుదలను ప్రభావితం చేయదని సుప్రీంకోర్టు స్పష్టం చేసింది. ఎందుకంటే హైకోర్టు ఆదేశం తర్వాత నిందితులను ఇప్పటికే విడుదల చేశారు. జులై 22న హైకోర్టు తీర్పు వచ్చిన తర్వాత మహారాష్ట్ర ప్రభుత్వం దీనికి వ్యతిరేకంగా సుప్రీంకోర్టును ఆశ్రయించింది.

ముఖ్యమంత్రి దేవేంద్ర ఫడ్నవీస్ స్పందన
నిందితులను నిర్దోషులుగా విడుదల చేయాలన్న ఆదేశంపై మహారాష్ట్ర ముఖ్యమంత్రి దేవేంద్ర ఫడ్నవీస్ కూడా స్పందించారు. ఆయన దీనిని "ఆశ్చర్యకరమైన తీర్పు"గా అభివర్ణించారు. జైలు నుండి విడుదలైన వారిలో మొహమ్మద్ ఇబ్రహీం అన్సారీ, సోయల్ మొహమ్మద్ షేక్, మహద్ మజీద్, తన్వీర్ అహ్మద్, రెహమాన్ షేక్, మహద్ షఫీ, జమీర్ అహ్మద్ లతీఫుర్ ఉన్నారు.

కేసు నేపథ్యం ఇలా..
2006లో ముంబై లోకల్ రైళ్లలో జరిగిన వరుస బాంబు పేలుళ్ల కేసు దేశవ్యాప్తంగా సంచలనం సృష్టించింది. ఈ ఘటనలో 189 మంది ప్రాణాలు కోల్పోగా, 800 మందికి పైగా గాయపడ్డారు. ఈ కేసులో కీలక పరిణామాలు ఇలా ఉన్నాయి. జూలై 11, 2006న ముంబై వెస్ట్రన్ రైల్వేలోని సబర్బన్ రైళ్లలో 11 నిమిషాల వ్యవధిలో ఏడు బాంబు పేలుళ్లు జరిగాయి. ప్రెషర్ కుక్కర్లలో బాంబులు అమర్చి, ఫస్ట్-క్లాస్ కంపార్ట్‌మెంట్‌లను లక్ష్యంగా చేసుకుని ఈ దాడులు జరిగాయి. మాతుంగా రోడ్, మహీమ్ జంక్షన్, బాంద్రా, ఖార్ రోడ్, జోగేశ్వరి, భయాందర్, బోరివలి స్టేషన్ల సమీపంలో ఈ పేలుళ్లు సంభవించాయి.ఈ కేసును విచారించిన ప్రత్యేక కోర్టు 2015 అక్టోబర్‌లో 12 మంది నిందితులను దోషులుగా నిర్ధారించింది. వీరిలో ఐదుగురికి మరణశిక్ష, మిగిలిన ఏడుగురికి జీవిత ఖైదు విధించింది.

బాంబే హైకోర్టు తీర్పు
కింది కోర్టు తీర్పును సవాలు చేస్తూ నిందితులు బాంబే హైకోర్టును ఆశ్రయించారు. మహారాష్ట్ర ప్రభుత్వం కూడా పిటిషన్ దాఖలు చేసింది.సుదీర్ఘ విచారణ తర్వాత, 2025 జూలై 21న బాంబే హైకోర్టు సంచలన తీర్పును వెలువరించింది. ఈ కేసులో నిందితులుగా ఉన్న 12 మందిని నిర్దోషులుగా ప్రకటించింది. నిందితులపై అభియోగాలను రుజువు చేయడంలో ప్రాసిక్యూషన్ పూర్తిగా విఫలమైందని కోర్టు వ్యాఖ్యానించింది. దర్యాప్తు సమయంలో స్వాధీనం చేసుకున్న సాక్ష్యాధారాలు, వాంగ్మూలాలు, గుర్తింపు పరేడ్‌లు నమ్మదగినవి కావని పేర్కొంది. ఈ 12 మందిలో, కమల్ అన్సారీ అనే నిందితుడు 2021లో కొవిడ్ కారణంగా జైలులోనే మరణించాడు. కోర్టు తీర్పుతో మిగిలిన 11 మంది విడుదలయ్యారు. మహారాష్ట్ర సీఎం దేవేంద్ర ఫడ్నవీస్ ఈ తీర్పును "ఆశ్చర్యకరమైనది"గా అభివర్ణించారు.

సుప్రీంకోర్టు నిర్ణయం
బాంబే హైకోర్టు తీర్పును సవాలు చేస్తూ మహారాష్ట్ర ప్రభుత్వం సుప్రీంకోర్టును ఆశ్రయించింది. 2025 జులై 24న(గురువారం) సుప్రీంకోర్టు బాంబే హైకోర్టు ఇచ్చిన ఆదేశాలపై స్టే విధించింది. అయితే, ఈ స్టే ఆదేశం నిందితుల జైలు నుండి విడుదలను ప్రభావితం చేయదని సుప్రీంకోర్టు స్పష్టం చేసింది, ఎందుకంటే వారు ఇప్పటికే విడుదలయ్యారు.

English summary

The Supreme Court has stayed the Bombay High Court’s verdict acquitting 12 accused in the 2006 Mumbai train bomb blasts case. Though the accused were already released.