దారుణం: బాలిక ప్రేమించలేదని బ్లేడ్లతో కోశారు

కోచి: అమ్మాయి ప్రేమించలేదని రెచ్చిపోయిన యువకుడు తన నలుగురు స్నేహితులతో కలిసి ఆమె మీద దాడి చేశాడు. తరువాత ఐదు మంది బ్లేడ్లు తీసుకుని ఆమె శరీరాన్ని చీరేసిన సంఘటన కేరళలో జరిగింది. బాధితురాలు ప్రయివేట్ ఆసుపత్రిలో చికిత్స పొందుతున్నది.

కేరళలోని పెరుంబపూర్ సమీపంలోని కొడనాడ్ ప్రాంతంలో ఓ బాలిక (16) నివాసం ఉంటున్నది. ఈ బాలిక ఇంటి సమీపంలో నివాసం ఉంటున్న ఓ యువకుడు ఆమెను ప్రేమిస్తున్నాడు. అయితే బాలిక అతడి ప్రేమను నిరాకరించింది.

బాలిక కుటుంబ సభ్యులు బయటకు వెళ్లిన విషయం ఆ యువకుడికి తెలిసింది. అంతే స్నేహితులతో కలిసి బాలిక ఇంట్లోకి చొరబడ్డాడు. తరువాత ఒంటరిగా ఉన్న బాలిక మీద ఇష్టం వచ్చినట్లు దాడి చేశారు.

బాలిక అర చేతుల మీద, శరరీరం మీద బ్లేడ్లతో కోశారు. తమ మీద పోలీసులకు ఇచ్చిన ఫిర్యాదు వెనక్కి తీసుకోవాలని హెచ్చరించి వెళ్లారు. ఇంటికి వచ్చిన కుటుంబ సభ్యులు బాలికను కోచ్చిలోని ఓ ప్రయివేటు ఆసుపత్రికి తరలించి చికిత్స చేయిస్తున్నారు.

గతంలో తమ కుమార్తెను వేధిస్తున్నారని పోలీసులకు ఫిర్యాదు చేసినా వారు పట్టించుకోలేదని బాధితురాలి కుటుంబ సభ్యులు ఆరోపించారు. బాలిక కుటుంబ సభ్యుల ఫిర్యాదు మేరకు కేసు నమోదు చేసి ఐదు మంది నిందితుల కోసం గాలిస్తున్నామని పోలీసులు తెలిపారు.

English summary

The girl, who sustained injuries on her body and palms, has been admitted in a private hospital in Kochi.