'పంది' వ్యాఖ్యల వివాదం.. టీఎంసీ చీఫ్ విప్ పదవికి రాజీనామా

Kalyan Banerjee vs Mahua Moitra: టీఎంసీ ఎంపీల మధ్య నెలకొన్ని అంతర్గత విభేదాలు ఇప్పుడు బహిరంగంగా బయటపడ్డాయి. తృణమూల్ కాంగ్రెస్ ఎంపీ కల్యాణ్ బెనర్జీ లోక్‌సభ చీఫ్ విప్ పదవికి రాజీనామా చేశారు. సహచర ఎంపీ మహువా మొయిత్రాతో ఆయనకు ఉన్న వివాదమే ఈ రాజీనామాకు ప్రధాన కారణమని భావిస్తున్నారు. మమతా బెనర్జీ అధ్యక్షతన జరిగిన టీఎంసీ ఎంపీల సమావేశం అనంతరం కల్యాణ్ బెనర్జీ ఈ రాజీనామా ప్రకటించారు. లోక్‌సభ చీఫ్ విప్ పదవికి రాజీనామా చేసిన తర్వాత కల్యాణ్ బెనర్జీ మాట్లాడుతూ, "టీఎంసీ ఎంపీల మధ్య సమన్వయం లేదని, ఈ లోపానికి నేనే బాధ్యుడిని అని దీదీ (మమతా బెనర్జీ) వర్చువల్ మీటింగ్‌లో చెప్పారు. అందుకే నేను పదవి నుంచి తప్పుకోవాలని నిర్ణయించుకున్నాను" అని తెలిపారు.

కల్యాణ్ vs మహువా.. వివాదాల కాలక్రమం
లోక్‌సభలో తృణమూల్ కాంగ్రెస్ ఎంపీ మహువా మొయిత్రాకు, కల్యాణ్ బెనర్జీకి మధ్య చాలా కాలంగా వివాదాలు ఉన్నాయి. ఇద్దరు నేతలు అనేక సందర్భాలలో ఒకరినొకరు విమర్శించుకున్నారు. ఇటీవల కల్యాణ్ బెనర్జీ మహువాపై వ్యక్తిగత వ్యాఖ్యలు చేశారు. "ఆమె హనీమూన్ నుంచి భారతదేశానికి తిరిగి వచ్చి, నాతో గొడవ పడటం మొదలుపెట్టింది" అని అన్నారు. కోల్‌కతా లా కాలేజీలో జరిగిన అత్యాచార కేసుపై కల్యాణ్ బెనర్జీ చేసిన వ్యాఖ్యలను మహువా మొయిత్రా విమర్శించగా.. దానికి బదులుగా ఆయన ఈ వ్యాఖ్యలు చేశారు.

మొదటి దశ.. ఢిల్లీలో వివాదం
గతంలో ఢిల్లీలో జరిగిన ఒక టీఎంసీ కార్యక్రమంలో కూడా కల్యాణ్ బెనర్జీ మహువాపై అభ్యంతరకరమైన వ్యాఖ్యలు చేశారని ఆరోపణలు ఉన్నాయి. ఆ తర్వాత మహువా కోపంతో పోలీసులకు ఫిర్యాదు చేస్తానని బెదిరించారు. అయితే పార్టీలోని ఒక సీనియర్ ఎంపీ జోక్యంతో ఆ సమస్య సద్దుమణిగింది. లోక్‌సభలో తనకు మాట్లాడటానికి తగిన సమయం దొరకడం లేదని, దీనికి కల్యాణ్ బెనర్జీనే కారణమని కూడా మహువా మొయిత్రా ఆరోపించారు. అయితే అప్పట్లో పార్టీ హైకమాండ్ ఆ ఫిర్యాదును పక్కన పెట్టి, పార్టీ నిబంధనలు పాటించాలని సూచించింది.

రెండో దశ.. కోల్‌కతా లా కాలేజీ కేసు, హనీమూన్ వ్యాఖ్యలు
జూన్ 2025లో కోల్‌కతా లా కాలేజీ అత్యాచార కేసుపై ఇద్దరు నేతలు విభిన్న అభిప్రాయాలు వ్యక్తం చేయడంతో వివాదం మరింత ముదిరింది. అత్యాచార కేసుపై కల్యాణ్ బెనర్జీ చేసిన వ్యాఖ్యలను మహువా మొయిత్రా 'ఎక్స్' (గతంలో ట్విట్టర్)లో విమర్శించారు. దానికి కోపంతో కల్యాణ్ బెనర్జీ, "మహువా హనీమూన్ నుంచి తిరిగి వచ్చి నాతో గొడవ పడుతోంది. ఆమె నన్ను మహిళా వ్యతిరేకి అని అంటోంది, మరి ఆమె ఏమిటి? ఆమె 40 సంవత్సరాల వివాహ బంధాన్ని విచ్ఛిన్నం చేసి 65 ఏళ్ల వ్యక్తిని పెళ్లి చేసుకుంది, ఆమె ఒక మహిళను బాధపెట్టలేదా?" అని వ్యాఖ్యానించారు. మహువా ఇటీవల బిజూ జనతా దళ్ (బీజేడీ) మాజీ ఎంపీ పినాకి మిశ్రాను జర్మనీలోని బెర్లిన్‌లో వివాహం చేసుకున్నారు. ఈ వివాహం గురించి కల్యాణ్ బెనర్జీ వ్యక్తిగత వ్యాఖ్యలు చేయడం వివాదాన్ని మరింత తీవ్రతరం చేసింది.

మూడో దశ.. 'పంది' వ్యాఖ్యలు
ఈ వివాదంపై మహువా ఒక పోడ్‌కాస్ట్‌లో కల్యాణ్‌ బెనర్జీని పరోక్షంగా లక్ష్యంగా చేసుకుని తీవ్రంగా విరుచుకుపడ్డారు. "మీరు పందితో పోరాడలేరు, ఎందుకంటే పందికి బురద ఇష్టం, మీరు మురికిగా మారతారు" అని ఆమె వ్యాఖ్యానించారు. మహువా వ్యాఖ్యలపై కల్యాణ్ బెనర్జీ కూడా గట్టిగా స్పందించారు. "మహువా మొయిత్రా ఒక తోటి ఎంపీని 'పంది'తో పోల్చడం చాలా దురదృష్టకరం. ఇలాంటి అమానవీయ భాష వాడటం నాగరిక సంభాషణకు విరుద్ధం" అని అన్నారు.

మమతా బెనర్జీ జోక్యం.. రాజీనామా
ఇద్దరు ఎంపీల మధ్య జరుగుతున్న ఈ వివాదంపై తృణమూల్ కాంగ్రెస్ అధినేత్రి మమతా బెనర్జీ తీవ్ర ఆగ్రహం వ్యక్తం చేశారు. మమతా బెనర్జీ పార్టీ లోక్‌సభ, రాజ్యసభ ఎంపీలందరితో ఒక వర్చువల్ సమావేశం నిర్వహించారు. ఈ సమావేశంలో ఆమె ఎంపీల మధ్య సమన్వయం లేకపోవడం, గ్రూపు రాజకీయాలపై అసంతృప్తి వ్యక్తం చేశారు. పార్టీ గౌరవానికి ప్రాధాన్యత ఇవ్వాలని, కేంద్ర ప్రభుత్వానికి వ్యతిరేకంగా కలిసికట్టుగా పోరాడాలని ఆమె ఎంపీలకు సూచించారు. ఈ సమావేశంలో మమత ఎవరి పేరును నేరుగా ప్రస్తావించలేదు. ఈ సమావేశం తర్వాత, కల్యాణ్ బెనర్జీ లోక్‌సభ చీఫ్ విప్ పదవికి రాజీనామా చేశారు. పార్టీ ఎంపీల మధ్య సమన్వయం లోపానికి తానే బాధ్యుడినని చెబుతూ పదవి నుంచి తప్పుకున్నారు. కొందరు ఎంపీలు అప్పుడప్పుడు మాత్రమే సభకు వస్తున్నప్పటికీ, దాని బాధ్యత కూడా తనపైనే పడుతోందని ఆయన ఆరోపించారు.

నాలుగుసార్లు ఎంపీగా గెలిచిన, పార్టీలో అనేక కీలక పదవులు చేపట్టిన అనుభవం ఉన్న కల్యాణ్ బెనర్జీ ఒకవైపు, మరోవైపు పార్లమెంటులో తన ప్రసంగాలతో ప్రత్యర్థులపై తీవ్ర స్థాయిలో విరుచుకుపడే ఫైర్‌బ్రాండ్ నాయకురాలు మహువా మొయిత్రా. ఈ ఇద్దరు నేతల మధ్య వివాదం టీఎంసీ నాయకత్వానికి పెద్ద సవాలుగా మారింది.

English summary

TMC MP Kalyan Banerjee resigns from the position of Chief Whip following a public spat with fellow MP Mahua Moitra. The feud escalates after Mahua's controversial 'pig' comment.