మరో హిందువు బలి: బంగ్లాదేశ్‌లో ఆగని మతోన్మాద దాడులు

Bangladesh Violence: బంగ్లాదేశ్‌లో హిందూ మైనారిటీలపై జరుగుతున్న దాడులు అమానవీయ స్థాయికి చేరుకున్నాయి. షరియత్‌పూర్ జిల్లాలో అల్లరి మూకల చేతిలో సజీవ దహనానికి గురైన హిందూ వ్యాపారి ఖోకన్ దాస్ (50) చికిత్స పొందుతూ మృతిచెందారు. ఈ ఘటన అంతర్జాతీయంగా తీవ్ర కలకలం రేపుతోంది.

అసలేం జరిగిందంటే?
వైద్య పరికరాలు, మొబైల్ బ్యాంకింగ్ వ్యాపారం నిర్వహించే ఖోకన్ దాస్.. డిసెంబర్ 31 రాత్రి తన దుకాణం ముగించుకుని ఇంటికి వెళ్తుండగా ఈ దాడి జరిగింది. మార్గమధ్యలో ఓ హింసాత్మక గుంపు ఆయనను చుట్టుముట్టింది. మొదట పొట్టలో కత్తితో పొడిచి, ఆపై తలపై తీవ్రంగా కొట్టారు. అంతటితో ఆగకుండా, ఆయనపై పెట్రోల్ పోసి నిప్పు పెట్టారు. మంటల్లో కాలిపోతున్న ఖోకన్ దాస్, ప్రాణరక్షణ కోసం పక్కనే ఉన్న చెరువులోకి దూకారు. తీవ్ర గాయాలతో ఉన్న ఆయనను స్థానికులు ఢాకా మెడికల్ కాలేజీ ఆసుపత్రికి తరలించారు. రెండు రోజుల పాటు మృత్యువుతో పోరాడిన ఆయన, జనవరి 2న తుదిశ్వాస విడిచారు.

రెండు వారాల్లో నాలుగో దాడి
బంగ్లాదేశ్‌లో తాత్కాలిక ప్రభుత్వం ఏర్పడిన తర్వాత కూడా అల్పసంఖ్యాక వర్గాలైన హిందువులపై దాడులు ఆగకపోవడంపై సర్వత్రా విమర్శలు వ్యక్తమవుతున్నాయి. గడిచిన కేవలం రెండు వారాల్లోనే హిందువులపై జరిగిన నాలుగో అతిపెద్ద దాడి ఇది. హిందూ కుటుంబాలు, వారి ఆస్తులు, వ్యాపార సంస్థలే లక్ష్యంగా దాడులు జరుగుతుండటంతో అక్కడ భయాందోళనలు నెలకొన్నాయి.

ప్రభుత్వ వైఫల్యంపై ప్రశ్నలు
బంగ్లాదేశ్ తాత్కాలిక ప్రభుత్వం మైనారిటీల భద్రతను గాలికొదిలేసిందని మానవ హక్కుల సంఘాలు మండిపడుతున్నాయి. నిందితులపై కఠిన చర్యలు తీసుకోవడంలో పోలీసులు విఫలమవుతున్నారని బాధితులు ఆవేదన వ్యక్తం చేస్తున్నారు.

English summary

A Hindu trader in Bangladesh’s Shariatpur district succumbed to injuries after a violent attack by a mob. Rising attacks on Hindu minorities have triggered international concern and criticism of government failure.