అమెరికా సైన్యంలోకి భారత్ ఫిరంగులు.. పాక్ గుండెల్లో రైళ్లు..!
భారత్ రక్షణ రంగ తయారీ వ్యవస్థకు అంతర్జాతీయ స్థాయిలో భారీ గుర్తింపు లభించింది. దేశీయ ప్రముఖ సంస్థ భారత్ ఫోర్జ్ అనుబంధ విభాగమైన కళ్యాణి స్ట్రాటజిక్ సిస్టమ్స్ లిమిటెడ్ (KSSL), అమెరికాకు చెందిన ప్రముఖ మిలిటరీ వాహనాల తయారీ సంస్థ 'ఏఎమ్ జనరల్' (AM General)తో కీలకమైన భాగస్వామ్యాన్ని కుదుర్చుకుంది.
ఈ ఒప్పందం ద్వారా భారతీయ రక్షణ సాంకేతికత అమెరికా రక్షణ రంగంలోనే అత్యంత ప్రతిష్టాత్మకమైన కార్యక్రమంలో చోటు దక్కించుకునే దిశగా అడుగులు వేస్తోంది. పారిస్ లో జరిగిన యూరోశాటరీ ఆర్మీ డిఫెన్స్ ఎగ్జిబిషన్లో ఈ వ్యూహాత్మక భాగస్వామ్యాన్ని అధికారికంగా ప్రకటించారు. అమెరికా సైన్యానికి సంబంధించిన 'మొబైల్ టాక్టికల్ కానన్' (MTC) కార్యక్రమంలో భాగంగా, కేఎస్ఎస్ఎల్ రూపొందించిన ఫిరంగి వ్యవస్థలను ప్రవేశపెట్టాలని ఏఎమ్ జనరల్ ప్రతిపాదించింది.
ఈ ప్రాజెక్టు కింద 155 మిమీ మొబైల్ టాక్టికల్ కానన్ సిస్టమ్ల అభివృద్ధి, రవాణా కోసం నివేదికను సమర్పించారు. ఒప్పందం ఖరారైతే 2027 నుండి వీటి సరఫరా ప్రారంభం కానుంది. ఈ ఉమ్మడి ప్రాజెక్టులో ప్రథమంగా కేఎస్ఎస్ఎల్ అభివృద్ధి చేసిన 'మార్గ్' ఆర్టిలరీ వ్యవస్థ కీలకంగా మారనుంది. ఇందులో అత్యంత వినూత్నమైన, పేటెంట్ పొందిన 'సాఫ్ట్ రీకాయిల్ టెక్నాలజీ'ని ఉపయోగించారు.
సాంప్రదాయ ఫిరంగులతో పోలిస్తే ఇది వెనుకకు తన్నే బలాన్ని గణనీయంగా తగ్గిస్తుంది. దీనివల్ల తేలికైన వాహనాలు, తేలికపాటి టరెట్లను ఉపయోగించడానికి వీలవుతుంది. ఈ సాంకేతికత యుద్ధ వాహనాల మన్నికను పెంచుతూ, నిర్వహణ ఖర్చులను తగ్గిస్తుంది. మార్గ్ వ్యవస్థలో 52-క్యాలిబర్ 155 మిమీ గన్ అమర్చబడి ఉంటుంది. ఇది శత్రు స్థావరాలపై 40 కిలోమీటర్ల కంటే ఎక్కువ దూరం వరకు ఖచ్చితమైన దాడులు చేయగలదు. ఇందులో వాహనంలోనే ఆటోమేటెడ్ లోడ్-అసిస్ట్ సిస్టమ్, ప్రతికూల వాతావరణ పరిస్థితుల్లోనూ పనిచేయగల ఫైర్-కంట్రోల్ పరికరాలను చేర్చారు. యుద్ధ రంగంలో అత్యంత చురుగ్గా కదిలేందుకు, తక్షణమే స్పందించేందుకు వీలుగా ఈ వ్యవస్థను డిజైన్ చేశారు.
స్నేహపూర్వక దేశాలకు సులభంగా రవాణా చేయగల సరికొత్త తరం రక్షణ ఉత్పత్తులను అందించడమే ఈ రెండు సంస్థల ప్రధాన లక్ష్యంగా ఉంది. రక్షణ రంగంలో భారతదేశానికి లభిస్తున్న సాంకేతిక ప్రాధాన్యతను ఈ ఒప్పందం స్పష్టం చేస్తోంది. ఏఎమ్ జనరల్ పరిణతి చెందిన వాహన శ్రేణితో భారత్ సాంకేతికత తోడుకావడం వల్ల భవిష్యత్తు యుద్ధ రంగాల్లో సైనికులకు అదనపు బలం చేకూరనుంది.
Click it and Unblock the Notifications
Sign in with Google