ఎమర్జన్సీ అని ఫోన్ చేస్తే.. పాక్ ప్రధాని నిద్రపోతోందన్నారు !!
పాకిస్థాన్ సమస్యలకు పొరుగుదేశాలే కారణమన్న వాదనను సింగపూర్ మాజీ దౌత్యవేత్త బిలహరి కౌశికన్ బహిరంగ వేదికపైనే తిప్పికొట్టారు. భారత్, అఫ్గానిస్థాన్ సరిహద్దులను చూపిస్తూ పాక్ విలేకరి చేసిన వ్యాఖ్యలకు స్పందించిన ఆయన, “పాకిస్థాన్ అసలు సమస్య భారత్ లేదా అఫ్గానిస్థాన్ కాదు; ఆ దేశ రాజకీయ నాయకత్వం, సైనిక వ్యవస్థ” అని ఘాటుగా వ్యాఖ్యానించారు.
తన వ్యాఖ్యలకు ఆధారంగా 1991లో జరిగిన సింగపూర్ ఎయిర్లైన్స్ విమాన హైజాక్ను కౌశికన్ ప్రస్తావించారు. కౌలాలంపూర్ నుంచి బయలుదేరిన విమానాన్ని నలుగురు పాకిస్థానీ హైజాకర్లు స్వాధీనం చేసుకున్నప్పుడు తాను సింగపూర్ విదేశాంగ వ్యవస్థలో పనిచేస్తున్నానని చెప్పారు. ఆ విమానం చాంగీ విమానాశ్రయంలో దిగిన తర్వాత ప్రయాణికులు, సిబ్బంది బందీలుగా మారారని వివరించారు.
1991 హైజాక్ను ఎందుకు ప్రస్తావించారు?
హైజాకర్లు పాకిస్థాన్ మాజీ ప్రధాని బెనజీర్ భుట్టోతో మాట్లాడాలని డిమాండ్ చేశారని కౌశికన్ తెలిపారు. అత్యవసర పరిస్థితి కావడంతో పాకిస్థాన్ హైకమిషన్ ద్వారా ఆమెను సంప్రదించే ప్రయత్నం చేసినట్లు చెప్పారు. అయితే రాత్రి వేళ ఆమె నిద్రలో ఉన్నారని, కలపలేమని అక్కడి నుంచి సమాధానం వచ్చినట్లు ఆయన గుర్తుచేశారు.
బందీల ప్రాణాలకు ముప్పు పెరుగుతుండటంతో సింగపూర్ ప్రత్యేక దళాలు చర్యకు దిగాయి. విమానం తలుపులు పేల్చి లోపలికి ప్రవేశించిన కమాండోలు హైజాకర్లను హతమార్చి బందీలను సురక్షితంగా బయటకు తీసుకొచ్చారు. తర్వాతి దర్యాప్తులో హైజాకర్లు పాకిస్థాన్ పీపుల్స్ పార్టీతో సంబంధం ఉన్నవారిగా తేలినట్లు కౌశికన్ పేర్కొన్నారు.
పాకిస్థాన్పై కౌశికన్ సందేశం
దేశంలోని అంతర్గత వైఫల్యాలకు నిరంతరం బయటి కారణాలు చూపడం పాకిస్థాన్కు ఉపయోగపడదన్నదే కౌశికన్ వ్యాఖ్యల సారాంశం. ఉగ్రవాదం, రాజకీయ అస్థిరత, సైనిక వ్యవస్థ ప్రభావం వంటి అంశాలను ఎదుర్కోకుండా సరిహద్దు దేశాలపై నిందలు మోపడం సమస్యను మరింత పొడిగిస్తుందని ఆయన పరోక్షంగా సూచించారు.
ఈ వ్యాఖ్యలు భారత్-పాకిస్థాన్ చర్చలకే పరిమితం కావు. దక్షిణాసియా భద్రత, ఉగ్రవాదం, పౌర ప్రభుత్వాల బలహీనతలపై అంతర్జాతీయ వేదికల్లో మళ్లీ చర్చ మొదలయ్యేలా చేశాయి. కౌశికన్ ప్రస్తావించిన 1991 ఘటన, పాకిస్థాన్ అంతర్గత రాజకీయాల ప్రభావం విదేశీ భద్రతా వ్యవస్థలకూ ఎలా సవాల్గా మారుతుందో చూపించే ఉదాహరణగా నిలిచింది.
Click it and Unblock the Notifications
Sign in with Google