Pakistan: ట్రంప్‌ను ఎప్పటికీ పూర్తిగా నమ్మలేం

Updated: Monday, February 9, 2026, 17:05 [IST]

పాకిస్తాన్ రాజకీయ వర్గాల్లో మరోసారి అమెరికా అధ్యక్షుడు డొనాల్డ్ ట్రంప్ అంశం చర్చకు వచ్చింది. నవాజ్ షరీఫ్‌కు సన్నిహితుడిగా పేరున్న రాజకీయ విశ్లేషకుడు నజమ్ సేథి, ట్రంప్‌పై పాకిస్తాన్ ప్రభుత్వం అతిగా ఆధారపడటం ప్రమాదకరమని హెచ్చరించారు. "ట్రంప్‌ను ఎప్పటికీ పూర్తిగా నమ్మలేం" అంటూ ఆయన మరోసారి స్పష్టం చేశారు.

ఇండియా - అమెరికా మధ్య తాజాగా కుదిరిన వాణిజ్య ఒప్పందం తర్వాత, పాకిస్తాన్ ప్రభుత్వం అమెరికాతో అనుసరిస్తున్న విధానాలపై ప్రతిపక్షం నుంచి తీవ్ర విమర్శలు వస్తున్నాయి. ఈ నేపథ్యంలో ఫిబ్రవరి 9, 2026న నజమ్ సేథి చేసిన వ్యాఖ్యలు పాక్ రాజకీయాల్లో పెద్ద చర్చకు దారితీశాయి.

గత వారం వైట్‌హౌస్ విందులు, ట్రంప్‌కు నోబెల్ నామినేషన్ ప్రతిపాదనలు, ఖనిజ ప్రాజెక్టులపై ఆశలు పెట్టుకోవడం వల్ల పాకిస్తాన్‌కు పెద్దగా లాభం ఉండదని పీటీఐ నేతలు, జర్నలిస్టులు ఆసద్ తూర్, ఇమ్రాన్ రియాజ్ ఖాన్‌లు విమర్శించారు. ప్రధాని షెహబాజ్ షరీఫ్‌తో పాటు ఆర్మీ చీఫ్ అసిమ్ మునీర్‌పై కూడా వారు మండిపడ్డారు.

Pakistan కు ఏ క్షణమైనా ట్రంప్ షాక్..

ఈ విమర్శల మధ్య నజమ్ సేథి మరోసారి ట్రంప్‌పై తన అనుమానాలను వ్యక్తం చేశారు. "ట్రంప్ ఎప్పుడైనా పాకిస్తాన్ నెరవేర్చలేని డిమాండ్‌లు పెట్టవచ్చు. అప్పుడు ఆయన అన్ని రకాల ఒత్తిళ్లు తెస్తారు. భవిష్యత్తులో ఇలాంటి పరిస్థితి తప్పక రావచ్చు" అని సేథి హెచ్చరించారు.

ట్రంప్ నిజాలను బయటపెట్టి..

గత తొమ్మిది నెలలుగా 'ఆపరేషన్ సిందూర్' తర్వాత ట్రంప్, అసిమ్ మునీర్‌ల మధ్య సన్నిహిత సంబంధాలు ఎలా ఏర్పడ్డాయో సేథి పలుమార్లు గుర్తు చేశారు. ఇప్పుడు ట్రంప్ నిజాలను బయటపెట్టి, పాకిస్తాన్‌కు ఇబ్బంది కలిగించే విషయాలు లీక్ చేస్తారేమోనని ఆయన ఆందోళన వ్యక్తం చేస్తున్నారు.

'పాకిస్తాన్ అన్‌టోల్డ్' ఫిబ్రవరి 9న చేసిన ట్వీట్‌లో కూడా ఇదే అంశం ప్రస్తావనకు వచ్చింది. అనేక మంది రాజకీయ నిపుణులు సేథి అభిప్రాయాలను సమర్థిస్తున్నారు. నిజమైన విధానపరమైన సంబంధాలు కాకుండా, కేవలం ట్రంప్‌ను మెప్పించే ప్రతీకాత్మక చర్యలపై ఆధారపడటం ప్రమాదకరం అని వారు హెచ్చరిస్తున్నారు.

"ప్రస్తుతం ట్రంప్ వర్గాలతో సంబంధాలు బాగానే ఉన్నట్లు కనిపిస్తున్నాయి. కానీ మధ్యప్రాచ్యంలో మారుతున్న పరిణామాలు, భారత్-అమెరికా సంబంధాలు బలపడితే పాకిస్తాన్ పరిస్థితి మారవచ్చు" -సేథి

Pakistan చూపిస్తున్న కీలక ఖనిజాలు

అమెరికాలో పాకిస్తాన్ రాజకీయాలపై విమర్శకుడైన హుస్సేన్ నదీమ్, "పాకిస్తాన్‌లో ఎన్నిక కాని నాయకులు, సైనిక అధికారులు ట్రంప్ నార్సిసిజాన్ని ఆసరాగా తీసుకుని అధిక హామీలు ఇస్తున్నారు. అవి నెరవేర్చలేకపోతే ట్రంప్ సహనం కోల్పోతారు" అని హెచ్చరించారు. దక్షిణాసియా విశ్లేషకుడు మైఖేల్ కుగెల్‌మాన్ కూడా ఇదే అభిప్రాయం వ్యక్తం చేశారు. పాకిస్తాన్ చూపిస్తున్న కీలక ఖనిజాలు ఎక్కువగా అసురక్షిత ప్రాంతాల్లో ఉన్నాయని, ట్రంప్ ప్రభుత్వం ఎప్పుడైనా ఆసక్తి కోల్పోయే అవకాశం ఉందన్నారు.

మొత్తానికి, ఆపరేషన్ సిందూర్ తర్వాత వాషింగ్టన్‌ను ప్రసన్నం చేసుకోవడానికి ఇస్లామాబాద్ చేస్తున్న ప్రయత్నాలు నిజమైన విధాన మార్పుల కంటే ప్రచారం, ప్రతీకాత్మక చర్యలకే పరిమితమవుతున్నాయనే విమర్శలు బలంగా వినిపిస్తున్నాయి.