మహమ్మారి ముగియలేదు; నాలుగు నెలలకో కొత్త కరోనా వేరియంట్: యూఎన్ చీఫ్ హెచ్చరిక

కరోనా మహమ్మారి ముగియలేదని, నాలుగు నెలలకు ఒక కొత్త వేరియంట్ వస్తుందని ఐక్యరాజ్యసమితి సెక్రటరీ జనరల్ ఆంటోనియో గుటెర్రెస్ సంచలన వ్యాఖ్యలు చేశారు. ఆసియాలో అధికంగా వ్యాప్తి చెందుతున్నందున జాగ్రత్తగా ఉండాలని ఐక్యరాజ్యసమితి సెక్రటరీ జనరల్ ఆంటోనియో గుటెర్రెస్ హెచ్చరించారు.

ఆసియా, ఐరోపాలలో కరోనా వ్యాప్తి: ఆంటోనియో గుటెర్రెస్

GAVI COVAX అడ్వాన్స్ మార్కెట్ కమిట్‌మెంట్ సమ్మిట్ 2022కి వన్ వరల్డ్ ప్రొటెక్టెడ్ - బ్రేక్ కోవిడ్ నౌ అనే వీడియో సందేశంలో గుటెర్రెస్ కరోనా మహమ్మారి పై వ్యాఖ్యానించారు. తాము ప్రతిరోజూ 1.5 మిలియన్ కొత్త కేసులను చూస్తున్నామని పేర్కొన్నారు. ఆసియాలో కరోనా ఎక్కువగా వ్యాప్తి చెందుతుందని, కరోనా కొత్త తరంగం ఐరోపా అంతటా వ్యాపిస్తోందని ఆయన వెల్లడించారు.

సగటున నాలుగు నెలలకో కొత్త వేరియంట్ : ఆంటోనియో గుటెర్రెస్

సగటున ప్రతి నాలుగు నెలలకొకసారి కొత్త కరోనావైరస్ వేరియంట్‌లు పుట్టుకొస్తున్నాయని, ప్రతి వ్యక్తికి వ్యాక్సిన్‌ వేయించేలా అన్ని ప్రభుత్వాలు మరియు ఫార్మా కంపెనీలు కలిసి పనిచేయాలని ఆయన అన్నారు. ఈ సంవత్సరం మధ్య నాటికి ప్రతి దేశం 70 శాతం వ్యాక్సినేషన్ కవరేజీని చేరుకోవాలనే లక్ష్యానికి తాము దూరంగా ఉన్నామని, సగటున ప్రతి నాలుగు నెలలకు కొత్త వేరియంట్‌లు వెలువడుతున్నందున, సమయం చాలా విలువైనదిగా భావించి తదనుగుణ చర్యలు తీసుకోవాలని ఆంటోనియో గుటెర్రెస్ పేర్కొన్నారు.

వ్యాక్సినేషన్ లో అసమానతలే కొత్త వేరియంట్ ల పుట్టుకకు కారణం

చాలా దేశాలు తమ రెండవ బూస్టర్ డోస్‌ల కోసం సిద్ధమవుతున్నప్పటికీ, మానవాళిలో మూడింట ఒక వంతు మందికి టీకాలు వేయబడలేదని ఆయన ఎత్తి చూపారు. ఇది మన లోతైన అసమాన ప్రపంచపు క్రూరమైన నేరారోపణ అంటూ ఆయన వెల్లడించారు. ఇది కొత్త వైవిధ్యాలకు కారణం అవుతుంది అని ఆయన వ్యాఖ్యానించారు. అన్ని దేశాలలో సమానంగా వ్యాక్సినేషన్ జరగనప్పుడు కొత్త వైవిధ్యాలు పుట్టుకొస్తాయని ఆయన పేర్కొన్నారు. మరిన్ని మరణాలు సంభవించే ప్రమాదం ఉందని , తద్వారా ఆర్థిక దుస్థితి కూడా పెరుగుతుందని ఆంటోనియో గుటెర్రెస్ చెప్పారు.

వేరియంట్ లు ఎప్పుడు దాడి చేస్తాయో తెలియదు.. అలెర్ట్

కరోనావైరస్ యొక్క ఓమిక్రాన్ వేరియంట్ కారణంగా మూడవ వేవ్ సమయంలో కూడా ప్రపంచం అధిక మరణాల రేటును చూసిందని ఆయన పేర్కొన్నారు. కోవిడ్-19 ఎంత త్వరగా పరివర్తన చెందుతుంది, వ్యాప్తి చెందుతుంది అనేది చెప్పడం కష్టమని ఆయన స్పష్టం చేశారు. తదుపరి వేరియంట్ ఉంటుందా అన్నది ప్రశ్న కాదని, అది ఎప్పుడు దాడి చేస్తుందనేదే ప్రశ్న అని ఆయన తెలిపారు. ఔషధ సంస్థలు ఉదార స్వభావంతో ముందుకు వస్తే ప్రజలందరికీ వ్యాక్సిన్స్ అందుతాయని ఆయన వెల్లడించారు.

కోవిడ్-19 విజృంభించే ప్రమాదాన్ని ఎవరు విస్మరించకూడదు

ఒమిక్రాన్ BA.2 కారణంగా యూరప్ మరియు తూర్పు ఆసియాలో కొవిడ్-19 కేసులు పెరుగుతున్నందున, పాన్ అమెరికన్ హెల్త్ ఆర్గనైజేషన్ (PAHO) డైరెక్టర్ కారిస్సా F. ఎటియన్ దేశాలు అప్రమత్తంగా ఉండాలని మరియు వ్యాక్సినేషన్ లో అంతరాలను యుద్ధప్రాతిపదికన తగ్గించి అన్ని దేశాలలోనూ వ్యాక్సినేషన్ సమానంగా ఉండేలా చూడాలని పేర్కొన్నారు. దక్షిణ అమెరికా నుండి నివేదించబడిన 8.7% సీక్వెన్స్‌లలో ఒమిక్రాన్ BA.2 ఇప్పటికే కనుగొనబడినందున, మళ్లీ మళ్లీ, యూరప్‌లోని ఇన్ఫెక్షన్ డైనమిక్స్ కొన్ని వారాల తర్వాత ఇక్కడ ఎలా ప్రతిబింబిస్తాయో తాము చూశామని డైరెక్టర్ కారిస్సా చెప్పారు. మరింత కోవిడ్-19 విజృంభించే ప్రమాదాన్ని ఎవరు విస్మరించకూడదు అని పేర్కొన్నారు.

English summary

UN Secretary-General Antonio Guterres has made sensational remarks that the corona epidemic is not over and that a new variant will arrive in every four months.