9 మంది పాకిస్తానీయుల కాల్చివేత: తీవ్ర ఉద్రిక్తత

Iran-Pakistan crisis: ఇరాన్- పాకిస్తాన్ మధ్య తలెత్తిన ఉద్రిక్తత మరింత పెచ్చరిల్లింది. ఈ రెండు దేశాల మధ్య నెలకొన్న యుద్ధ వాతావరణం, దాడులు- ప్రతిదాడుల వ్యవహారం విభేదాలు పతాకస్థాయికి చేరుకున్నాయి. సాధారణ ప్రజల ప్రాణాలను సైతం బలి తీసుకునే స్థాయికి చేరుకుంది.

కొద్దిరోజుల కిందటే పాకిస్తాన్‌పై ఇరాన్ దాడులను చేపట్టిన విషయం తెలిసిందే. ఆ దేశ భూభాగంపై ఉన్న ఉగ్రవాద శిబిరాలపై ఇరాన్ పెద్ద ఎత్తున దాడులు కొనసాగించింది. బలూచిస్తాన్ ప్రాంతంలోని సిస్టాన్‌‌, పంజ్గూర్‌పై ప్రధానంగా ఇరాన్ దాడులు సాగాయి అప్పట్లో. ఆఫ్ఘనిస్తాన్- ఇరాన్ సరిహద్దులకు ఆనుకుని ఉండే ఈ ప్రాంతం జైష్ అల్ అదిల్ ఉగ్రవాద సంస్థకు కేంద్రబిందువుగా చెబుతుంటారు.

ఈ ఉగ్రవాద సంస్థ శిబిరాలను లక్ష్యంగా చేసుకుని ఇరాన్ సైన్యం వైమానిక దాడులు చేపట్టింది. డ్రోన్లతో బాంబుల వర్షాన్ని కురిపించింది. మిస్సైళ్లను సంధించింది. దీనికి ప్రతీకారాన్ని తీర్చుకుంది పాకిస్తాన్. ఇరాన్‌పై ప్రతిదాడులను జరిపింది. దీనితో ఈ రెండు దేశాల మధ్య యుద్ధ వాతావరణం నెలకొంది.

తాజాగా- ఇరాన్‌లోని సరావన్ టౌన్‌లో నివసిస్తోన్న తొమ్మది మంది పాకిస్తానీయులను గుర్తు తెలియని వ్యక్తి కాల్చి చంపాడు. వారందరూ రోజువారీ కార్మికులు. జీవనోపాధి కోసం ఇరాన్‌కు వెళ్లిన వలస కార్మికులు. స్థానికంగా ఉండే ఓ కార్ మెకానిక్ షెడ్‌లో పని చేస్తుండేవారు. సరావన్‌కు ఇరాన్ దేశస్తుడొకరు వారిపై బుల్లెట్ల వర్షాన్ని కురిపించాడు. ఈ ఘటనలో తొమ్మిది మంది మరణించారు.

ఈ ఘటనను ఇరాన్‌లోని పాకిస్తాన్ రాయబార కార్యాలయం నిర్ధారించింది. దిగ్భ్రాంతిని వ్యక్తం చేసింది. మృతుల కుటుంబాలకు సంతాపం తెలిపింది. ఆ కుటుంబాల వారిని ఆదుకుంటామని పాకిస్తాన్ రాయబారి మహ్మద్ ముదస్సిర్ టిపు చెప్పారు.

ఈ ఘటనపై సమగ్ర దర్యాప్తు జరిపించాలని, అన్ని విధాలుగా తాము సహకరిస్తామని ఇరాన్ ప్రభుత్వానికి విజ్ఞప్తి చేశారు. వారి మృతదేహాలను స్వదేశానికి తరలించే ఏర్పాట్లు చేస్తున్నట్లు తెలిపారు. కాల్పుల ఘటన అనంతరం స్థానికంగా తీవ్ర ఉద్రిక్త పరిస్థితులు నెలకొన్నాయి.

English summary

An Unidentified gunmen killed nine Pakistani workers in a southeastern border town of Iran.