పార్లమెంట్పై దండయాత్ర ఎఫెక్ట్..రెండో వికెట్: తప్పుకొన్న పోలీస్ చీఫ్: ట్రంప్ మద్దతుదారులపై
వాషింగ్టన్: అగ్రరాజ్యం అమెరికా రాజధాని వాషింగ్టన్ డీసీలో చోటు చేసుకున్న అల్లర్ల ప్రభావం.. అధికార, పోలీసు యంత్రాంగంపై తీవ్రంగా పడుతోంది. ఒకరి తరువాత ఒకరు రాజీనామాల బాట పడుతున్నారు. ఇప్పటికే ప్రథమ మహిళ మెలానియా ట్రంప్ చీఫ్ ఆఫ్ స్టాఫ్ స్టెఫానీ గ్రీషం రాజీనామా చేశారు. అమెరికా పార్లమెంట్ భవనం.. కేపిటల్ బిల్డింగ్పై అధ్యక్షుడు డొనాల్డ్ ట్రంప్ మద్దతుదారులు దాడికి పాల్పడిన కొద్ది సేపటికే ఆమె గుడ్బై చెప్పారు. వైట్హౌస్ నుంచి వైదొలగారు. తాజాగా మరో వికెట్ పడింది.
Recommended Video
డేంజరస్ పర్సన్: ట్రంప్ ఉద్వాసన: అభిశంసన: స్పీకర్ అత్యవసర తీర్మానం: సమయం లేదు
వాషింగ్టన్ యూఎస్ కేపిటల్ బిల్డింగ్ పోలీస్ ఉన్నతాధికారి స్టీవెన్ సండన్ తన పదవికి రాజీనామా చేశారు. అల్లర్లకు నైతిక బాధ్యత వహిస్తూ ఆయన రాజీనామా చేశారు. వేలాదిమందిగా పార్లమెంట్ భవనంపై దండెత్తిన డొనాల్డ్ ట్రంప్ మద్దతుదారులను నియంత్రించడంలో పోలీసులు విఫలం అయ్యారని, అందువల్లే నేషనల్ సెక్యూరిటీ గార్డులను రంగంలోకి దించాల్సి వచ్చిందంటూ విమర్శలు తలెత్తాయి.
ఈ ఉదంతంలో పోలీసు యంత్రాంగం దారుణంగా విఫలమైందంటూ డెమొక్రటిక్ పార్టీకి చెందిన యూఎస్ కాంగ్రెస్, సెనెట్ సభ్యులు ఆరోపణలు గుప్పించారు. ఈ విమర్షలు చెలరేగిన కొన్ని గంటల్లో స్టీవెన్ సండన్ రాజీనామా చేశారు. ఇది ఈ నెల 16వ తేదీ నుంచి అమల్లోకి వస్తుంది. యూఎస్ కేపిటల్ బిల్డింగ్ పోలీస్ చీఫ్గా పని చేయడం తనకు దక్కిన గౌరవంగా భావిస్తున్నానని స్టీవెన్ తెలిపారు. వాషింగ్టన్లో చోటు చేసుకున్న అల్లర్లను తన 30 సంవత్సరాల సర్వీస్లో ఏనాడూ చూడలేదని ఆవేదన వ్యక్తం చేశారు.
ఫోటోలు: వాషింగ్టన్లో ట్రంప్ మద్దతుదారులు నిరసనలు
తన కేరీర్లో ఈ ఘటన ఒక చేదు జ్ఞాపకంగా మిగిలిపోతుందని వ్యాఖ్యానించారు. అత్యంత ప్రతికూల పరిస్థితుల్లోనూ క్షేత్రస్థాయి పోలీసులు హీరోయిజాన్ని ప్రదర్శించారని, ఆందోళనలు మరింత పెచ్చరిల్లకుండా అడ్డుకోగలిగారని ప్రశంసించారు. అంతకుముందు- యూఎస్ హౌస్ స్పీకర్ న్యాన్సీ పెలోసీ సైతం క్యాపిటల్ పోలీసుల పనితీరును ప్రశంసించారు. మరింత నష్టం సంభవించకుండా సమర్థవంతంగా అడ్డుకోగలిగారని పేర్కొన్నారు.