Kokushobi: ప్రపంచానికి ఈ కొత్త హెచ్చరిక దేనికి సంకేతం?
భూమిపై సూర్యుడు ప్రచండ రూపం దాలుస్తున్నాడు. మునుపెన్నడూ లేని విధంగా ప్రపంచ వ్యాప్తంగా ఎండలు మండిపోతున్నాయి. సాధారణంగా చల్లని వాతావరణానికి, క్రమశిక్షణతో కూడిన జీవనశైలికి పేరుగాంచిన జపాన్ దేశం ఇప్పుడు అగ్నిగుండంలా మారుతోంది. వేసవి వచ్చిందంటే చాలు అక్కడి ఉష్ణోగ్రతలు ఏకంగా 40 డిగ్రీల మార్కును దాటేస్తున్నాయి.
ఇంటి నుంచి బయటకు అడుగుపెడితే శరీరం కాలిపోతున్నట్లుగా అనిపించే ఈ దారుణ పరిస్థితులపై ఆందోళన చెందిన జపాన్ ప్రభుత్వం, ప్రజలను కాపాడుకోవడానికి ఒక వినూత్న మార్గాన్ని అన్వేషించింది. కేవలం ఉష్ణోగ్రత అంకెలు చెబితే ప్రజలకు తీవ్రత తెలియడం లేదని భావించి, 40 డిగ్రీలు దాటిన రోజులకు అధికారికంగా ఒక భయంకరమైన కొత్త పేరు పెట్టేసింది!
'కొకుషోబి'.. ప్రజల ఓట్లతో పుట్టుకొచ్చిన పదం!
వేసవి తీవ్రతను బలంగా చెప్పేందుకు జపాన్ వాతావరణ శాఖ తమ దేశవ్యాప్తంగా ఒక వినూత్న ఓటింగ్ ప్రక్రియను నిర్వహించింది. లక్షలాది మంది ప్రజలు భాగస్వాములైన ఈ పోలింగ్లో అనేక ప్రతిపాదనలు వచ్చాయి. 'డేంజరస్ హాట్ డే', 'సావునా డే', 'చెమటలు పట్టించే రోజు' వంటి రకరకాల పేర్లు వచ్చినప్పటికీ.. చివరకు ప్రజలంతా కలసి 'కొకుషోబి' (Kokushobi) అనే పదాన్ని ఖరారు చేశారు.
జపనీస్ భాషలో కొకుషోబి అంటే 'అత్యంత క్రూరమైన ఎండ రోజు' అని అర్థం. మూడు ప్రధాన నగరాల్లో ఒకే రోజు ఉష్ణోగ్రతలు 40 డిగ్రీలు దాటడంతో మొదటిసారిగా ప్రభుత్వం ఈ పదాన్ని అధికారిక బులిటెన్లలో వాడింది. ఈ పదం వినగానే జనాలు భయపడి వెంటనే ఇళ్లలోకి వెళ్ళిపోవాలని, ఏసీలు వేసుకుని నీళ్లు బాగా తాగాలనేదే సర్కార్ ముఖ్య ఉద్దేశం.
అంకెలు కావు.. హెచ్చరిక కావాలి!
ప్రజలకు కేవలం వాతావరణ సమాచారం ఇస్తే సరిపోదు, ప్రమాదం ముంగిట ఉందనే భావన కలగాలి. అందుకే వాతావరణ శాస్త్రవేత్తలు, మీడియా నిపుణులు, భాషా పండితులు అందరూ కలసి చర్చించిన తర్వాతే ఈ పదాన్ని ఎంపిక చేశారు.
నాలుగు లక్షలకు పైగా ప్రజలు ఈ సర్వేలో ఓటు వేయడం గమనార్హం. 40 డిగ్రీల ఎండ అంటే అది సాధారణ వేసవి కాదు, మనుషుల ప్రాణాలు తీసేంత ప్రమాదకరమైన వేడి అని సమాజానికి ఒక స్పష్టమైన సంకేతం ఇవ్వడమే ఈ సరికొత్త పదం వెనుక ఉన్న అసలు సీక్రెట్.
ప్రాణాలు తీస్తున్న వడదెబ్బ..
జపాన్ ప్రభుత్వం ఈ స్థాయిలో భయపడటానికి బలమైన కారణాలే ఉన్నాయి. గత కొన్నేళ్లుగా అక్కడ ఎండల వల్ల వందలాది మంది ప్రాణాలు కోల్పోతున్నారు. గడిచిన వేసవి కాలంలోనే మే నుంచి సెప్టెంబర్ మధ్య లక్ష మందికి పైగా తీవ్రమైన వడదెబ్బకు గురై ఆస్పత్రుల పాలయ్యారు.
బాడీ టెంపరేచర్ కంట్రోల్ తప్పడం, కళ్ళు తిరగడం, స్పృహ తప్పిపోవడం వంటి లక్షణాలతో ప్రజలు ఇబ్బంది పడ్డారు. ఒక్క వారంలోనే 14 మందికి పైగా ప్రాణాలు కోల్పోవడంతో ప్రభుత్వం తక్షణ చర్యలకు పూనుకుంది. గత ఏడాది జపాన్లోని 30కి పైగా ప్రాంతాల్లో 40 డిగ్రీలకు పైగా ఉష్ణోగ్రత నమోదవ్వగా, ఒక నగరంలో ఏకంగా 41.8 డిగ్రీలు నమోదుకావడం చారిత్రక రికార్డుగా నిలిచింది.
ప్రపంచమంతా ఇదే బాట.. ఎండకు సరికొత్త పేర్లు!
వాతావరణ మార్పుల వల్ల భయపెడుతున్న వేడికి కొత్త పేర్లు పెట్టడం కేవలం జపాన్ కే పరిమితం కాలేదు. ప్రపంచవ్యాప్తంగా అనేక దేశాలు ఇదే బాటలో పయనిస్తున్నాయి. బ్రిటన్ ప్రభుత్వం కూడా తీవ్రమైన ఎండలు ఉన్నప్పుడు రవాణా వ్యవస్థ, హెల్త్ కేర్ రంగాలను అప్రమత్తం చేయడానికి ప్రత్యేక హెచ్చరిక పదాలను రూపొందించింది. ఇక చైనా, తైవాన్ మీడియా అయితే ఎండల తీవ్రతను వర్ణిస్తూ "బార్బెక్యూ మోడ్", "సావునా బాక్స్" అని వార్తల్లో రాస్తూ ప్రజల్లో తీవ్రతను తెలియజేసే ప్రయత్నం చేస్తున్నాయి.
పదం మారలేదు.. కాలమే మారింది!
జపాన్ తీసుకొచ్చిన ఈ 'కొకుషోబి' అనేది కేవలం డిక్షనరీలో చేరిన ఒక కొత్త పదం మాత్రమే కాదు. రాబోయే కాలంలో మానవాళి ఎదుర్కోబోయే తీవ్రమైన వాతావరణ మార్పులకు ఇది ఒక హెచ్చరిక సంకేతం. ఒకప్పుడు ఎప్పుడో ఒకసారి వచ్చే భారీ వేసవి, ఇప్పుడు ప్రతి ఏటా సర్వసాధారణంగా మారిపోతోంది. ప్రజలు మారిన కాలానికి అనుగుణంగా తమ జీవనశైలిని మార్చుకోవాలని, ప్రాణాలు కాపాడుకోవడమే అత్యంత ముఖ్యమని జపాన్ నిర్ణయం మనందరికీ స్పష్టం చేస్తోంది.
Click it and Unblock the Notifications
Sign in with Google