మేఘాల కదలికల్లో భారీ మార్పు.. పోస్ట్-మాన్సూన్ సీజన్ షురూ!
భారతదేశంలో రుతుపవనాల సీజన్ ముగింపు దశకు చేరుకుంటున్న తరుణంలో వాతావరణంలో నాటకీయ మార్పులు చోటుచేసుకుంటున్నాయి. నైరుతి రుతుపవనాలు దేశం నుంచి వెనక్కి తగ్గుతున్న వేళ, ఉత్తర భారతదేశాన్ని పశ్చిమ కల్లోలం చుట్టుముట్టింది. ఈ మేరకు మన దేశానికి చెందిన INSAT-3DS శాటిలైట్ సేకరించిన చిత్రాలు వాతావరణంలో వస్తున్న ఈ అనూహ్య మార్పులను స్పష్టంగా కళ్లకు కడుతున్నాయి. రుతుపవనాల నిష్క్రమణకు, పోస్ట్-మాన్సూన్ సీజన్కు మధ్య జరుగుతున్న ఈ మార్పు దేశవ్యాప్తంగా ఆసక్తికరంగా మారింది.
శాటిలైట్ చిత్రాల్లో స్పష్టంగా కనిపిస్తున్న మేఘాల కదలికలు
ఇండియన్ శాటిలైట్ INSAT-3DS సెప్టెంబర్ 23, సెప్టెంబర్ 27 తేదీల్లో తీసిన రెండు వేర్వేరు చిత్రాలు భారత ఉపఖండంలో వాతావరణ పోకడలను పూర్తిగా మార్చివేశాయి. సెప్టెంబర్ 23 నాటి చిత్రంలో ఉత్తర, ఈశాన్య భారతదేశం అంతటా దట్టమైన మేఘాలు కమ్ముకుని ఉండగా.. సెప్టెంబర్ 27 నాటికి ఆ పరిస్థితిలో పూర్తిగా మార్పు వచ్చింది. వాయువ్య, మధ్య భారతదేశం ప్రాంతాలు చాలా వరకు మేఘాలు లేకుండా ప్రశాంతంగా మారినట్లు శాటిలైట్ చిత్రాల ద్వారా స్పష్టమైంది.
ఉత్తర భారతదేశాన్ని ముంచెత్తుతున్న పశ్చిమ కల్లోలం
మధ్యధరా ప్రాంతం నుంచి తూర్పు వైపుగా కదిలే వాతావరణ వ్యవస్థనే పశ్చిమ కల్లోలం అంటారు. ఇది ఇతర వాతావరణ వ్యవస్థల్లోని తేమతో కలిసి ఉత్తర భారతదేశంలో వర్షాలు, ఈదురు గాలులకు కారణమవుతుంది. ప్రస్తుతం రుతుపవనాల ఉపసంహరణ జరుగుతున్నప్పటికీ, మధ్య భారతదేశంపై ఏర్పడిన అల్పపీడనం లేదా డిప్రెషన్తో ఈ పశ్చిమ కల్లోలం కలిసిపోవడంతో ఉత్తరప్రదేశ్, ఉత్తరాఖండ్, ఢిల్లీ-ఎన్సీఆర్ ప్రాంతాలలో వర్షాలు కురుస్తున్నాయి.
రుతుపవనాల తిరోగమనం.. వర్షాలకు ఇక గుడ్బై?
వాయువ్య భారతదేశం నుంచి నైరుతి రుతుపవనాల తిరోగమనం ఇప్పటికే ప్రారంభమైంది. రానున్న సెప్టెంబర్ 29 నాటికి దేశంలోని పలు ప్రాంతాలలో వర్షపాతం తగ్గుముఖం పట్టే అవకాశం ఉంది. అయితే, రుతుపవనాల పూర్తి నిష్క్రమణకు ఎలాంటి నిర్దిష్ట తేదీ అంటూ ఉండదు. వాతావరణంలో తేమ తగ్గడం, గాలి దిశ మారడం వంటి అంశాలను బేరీజు వేసి భారత వాతావరణ శాఖ ఈ ప్రక్రియను ప్రకటిస్తుంది. రుతుపవనాలు పూర్తిగా వెనక్కి వెళ్లినప్పటికీ, దక్షిణ మరియు తూర్పు భారతదేశంలో మాత్రం అప్పుడప్పుడు స్థానిక వాతావరణ పరిస్థితుల వల్ల వర్షాలు కురిసే అవకాశం ఉందని నిపుణులు చెబుతున్నారు.
Click it and Unblock the Notifications
Sign in with Google
