తెలుగువాళ్లం..: ఏపీ రైతు కుటుంబానికి తెలంగాణ పోలీస్ సాయం
నల్గొండ: రాష్ట్రాలుగా విడిపోయినా.. అన్నదమ్ములుగా కలిసే ఉంటామన్న మాటను నిలబెట్టుకుంటున్నారు తెలంగాణ, ఆంధ్రప్రదేశ్ రాష్ట్రాల ప్రజలు. ఇందుకు నిదర్శనంగా తాజాగా ఓ ఘటన చోటు చేసుకుంది. రామన్నపేట సీఐ కె శ్రీధర్రెడ్డి ఏపీ రైతు కుటుంబానికి ఆర్థిక సాయం అందించి అండగా నిలబడ్డారు.
కుటుంబ పెద్దను కోల్పోయిన ఏపీలోని కడపకు చెందిన ఆ రైతు కుటుంబాన్ని ఆదుకునేందుకు ఆయన ముందుకు వచ్చారు. తన సహచరులతో కలిసి రూ.35 వేలను సమీకరించి చెక్కు రూపంలో ఆ కుటుంబానికి పంపించారు.
జూన్ 8న కడప జిల్లా కమలాపురం ప్రాంతానికి చెందిన రైతు మల్లికార్జున రెడ్డి తన పక్కనే ఉన్న పొలం రైతుకు నారుమడి దున్నేందుకు తన ఎద్దులతో కలిసి వెళ్లాడు.
మడిలో పని చేసే సమయంలో పిడుగుపాటుకు గురై ఎద్దులతో సహా అక్కడికక్కడే మృతి చెందాడు. దీనిపై పత్రికల్లో వచ్చిన కథనాలు చూసిన సీఐ శ్రీధర్ రెడ్డి.. ఆ బాధిత కుటుంబాన్ని ఏలాగైనా ఆదుకోవాలని నిర్ణయించుకున్నారు.
ఈ క్రమంలో తన సహచర సిబ్బందితో కలిసి రూ.35 వేలు పోగుచేసి.. చెక్కు రూపంలో దానిని కమలాపురం పోలీసుస్టేషన్కు పంపించారు. కాగా, ఈ చెక్కును స్థానిక ఎస్ఐ శ్రీనివాసులరెడ్డి భాధిత రైతు కుటుంబసభ్యులకు బుధవారం అందించారు.
Click it and Unblock the Notifications
Sign in with Google