బీఆర్ఎస్ మాజీ ఎమ్మెల్యే మంచిరెడ్డి కిషన్ రెడ్డిపై కేసు నమోదు: ఎందుకంటే?

హైదరాబాద్: ఇబ్రహీంపట్నం మాజీ ఎమ్మెల్యే, బీఆర్ఎస్ నేత మంచిరెడ్డి కిషన్ రెడ్డిపై కేసు నమోదైంది. కిషన్ రెడ్డిపై ఎస్సీ ఎస్టీ అట్రాసిటీ, బెదిరింపుల కేసు నమోదు చేశారు పోలీసులు. కిషన్ ​రెడ్డితో పాటు ఆయన కుమారుడు ప్రశాంత్​ రెడ్డి, రంగారెడ్డి జిల్లా మాజీ కలెక్టర్ ఆమోయ్‌ కుమార్, ఇబ్రహీంపట్నం మాజీ మున్సిపల్ కమిషనర్ ఎండీ యూసుఫ్‌​పై పోలీసులు కేసు నమోదు చేశారు.

మున్సిపల్ ఛైర్‌పర్సన్‌ కప్పరి స్రవంతి ఫిర్యాదు మేరకు కేసు నమోదు చేసి దర్యాప్తు చేస్తున్నామని పోలీసులు తెలిపారు. 2019 ఎన్నికల సమయంలో మున్సిపల్ ఛైర్‌పర్సన్ పోస్టు కోసం మాజీ ఎమ్మెల్యే మంచిరెడ్డి కిషన్ ​రెడ్డి రూ. 2.5 కోట్లు తీసుకున్నారని ఫిర్యాదులో పేర్కొన్నారు. బుడగ జంగాల కులానికి చెందిన తాను మున్సిపల్ ఛైర్‌పర్సన్‌​గా ఎంపికైన దగ్గరి నుంచి కులం పేరుతో మాజీ ఎమ్మెల్యే కిషన్ ​రెడ్డి, ఆయన కుమారుడు వేధిస్తున్నారని మున్సిపల్​ ఛైర్మన్​ స్రవంతి ఫిర్యాదులో తెలిపారు.

మాజీ ఎమ్మెల్యే మంచిరెడ్డి కిషన్ ​రెడ్డి, ఇబ్రహీంపట్నం మాజీ మున్సిపల్​ కమిషనర్ యూసఫ్​, అప్పటి వైస్​ ఛైర్మన్ ​కు బాధ్యతలు అప్పగించేందుకు తనను నిత్యం లీవ్ పెట్టాలని బెదిరించారని స్రవంతి చెప్పారు. మాజీ కలెక్టర్​ ఆమోయ్‌ కుమార్ కూడా తనను పిలిచి ఉన్నత కులం వారితో తక్కువ కులం వారు పెట్టుకోవద్దని అన్నారని ఫిర్యాదులో ఆమె పేర్కొన్నారు. సెలవు పెట్టకపోతే తనను సస్పెండ్​ చేస్తానని రంగారెడ్డి జిల్లా మాజీ కలెక్టర్ అమోయ్ కుమార్ బెదిరించారని ఆమె తెలిపారు.

మున్సిపల్ ఛైర్‌పర్సన్‌ స్రవంతి ఫిర్యాదు మేరకు మంచిరెడ్డి కిషన్ ​రెడ్డి, ప్రశాంత్ రెడ్డి, రంగారెడ్డి జిల్లా మాజీ కలెక్టర్ ఆమోయ్‌ కుమార్, ఇబ్రహీంపట్నం మాజీ మున్సిపల్ కమిషనర్ ఎండీ యూసఫ్​ పై ఎస్సీ ఎస్టీ 504, 506 ఐపీసీ సెక్షన్ల కింద కేసు నమోదు చేసి దర్యాప్తు చేస్తున్నామని పోలీసులు తెలిపారు. అసెంబ్లీ ఎన్నికల ముందు మున్సిపల్​ ఛైర్‌పర్సన్‌ కప్పరి స్రవంతి బీఆర్​ఎస్ పార్టీ నుంచి కాంగ్రెస్​‌లో చేరారు.

English summary

case filed against former BRS mla manchireddy kishan reddy.