మొన్న వరంగల్ కలెక్టర్, నేడు సూర్యాపేట ఎస్పీ.. నకిలీ ఖాతాలతో సైబర్ నేరగాళ్ళ బరితెగింపు!!

ప్రపంచవ్యాప్తంగా సైబర్ నేరాలు పెరిగిపోతున్నాయి. ఇక మన దేశంలో తెలంగాణ, ఆంధ్రప్రదేశ్ రాష్ట్రాలలో సైబర్ నేరాల సంఖ్య కూడా రోజురోజుకు పెరుగుతోంది. పోలీసులకు శాంతి భద్రత పరిరక్షణ కంటే ఈ సైబర్ నేరాలను కట్టడి చేయడం పెద్ద సమస్యగా మారుతుంది. సైబర్ నేరాల బారిన సామాన్య ప్రజలే కాదు, ఐఏఎస్, ఐపీఎస్ అధికారులు కూడా పడుతుండడం సైబర్ నేరాల తీవ్రతకు అద్దం పడుతుంది.

వరంగల్ కలెక్టర్ పేరుతో ఫేక్ ఫేస్ బుక్ అకౌంట్
మొన్నటికి మొన్న వరంగల్ కలెక్టర్ పి ప్రావీణ్య పేరుతో నకిలీ facebook అకౌంట్ ను తెరిచి కలెక్టర్ ప్రావీణ్య పేరుతో డబ్బులు కావాలని మెసేజ్ లు పంపిన విషయం తెలిసిందే. కలెక్టర్ ప్రావీణ్య మీటింగ్ లో ఉన్నానని, అర్జెంట్ డ‌బ్బులు కావాలంటూ +94776414080 శ్రీలంక నంబర్‌ నుంచి ఆ సందేశం పంపిన సబైర్‌ నేరగాళ్ళు డబ్బులు ఫోన్‌పే చేసి, స్క్రీన్ షాట్ షేర్‌ చేయాలని కోరారు. ప‌లువురికి మేసేజ్‌లు పంపించారు.

కేసు నమోదు చేసిన పోలీసులు
దీన్ని గ‌మ‌నించిన క‌లెక్ట‌ర్ ప్రావీణ్య త‌క్ష‌ణ‌మే పోలీసుల‌కు ఫిర్యాదు చేశారు. త‌న అస‌లు ఫేస్‌బుక్ అకౌంట్ ద్వారా అంద‌రిని అప్ర‌మ‌త్తం చేశారు. త‌న పేరుతో ఎవ‌రూ డ‌బ్బులు అడిగిన ఇవ్వొద్ద‌ని క‌లెక్ట‌ర్ సూచించారు. పై నంబర్ మోసపూరితమైనది, దయచేసి జవాబు ఇవ్వకండి. మరియు వీలైనంత త్వరగా బ్లాక్ చేయమని కలెక్టర్ ప్రావీణ్య ప్రతి ఒక్కరినీ కోరారు. దీంతో కేసు నమోదు చేసుకున్న పోలీసులు సైబర్ కేటుగాళ్లను పట్టుకునేందుకు ప్రయత్నిస్తున్నారు.

రాజన్న సిరిసిల్ల జిల్లా కలెక్టర్ కు సైబర్ తలనొప్పి
రాజన్న సిరిసిల్ల జిల్లా కలెక్టర్ అనురాగ్ జయంతి పేరుతో కూడా నకిలీ ఫేస్‌బుక్ అకౌంట్ ని క్రియేట్ చేసి శ్రీలంకకు చెందిన ఫోన్ నెంబర్ తో డబ్బులు పంపించాలని పలువురికి సందేశాలు పంపిస్తున్నారు. దీంతో ఆయన కూడా దయచేసి ప్రజలు ఎవరు ఇటువంటి ఫేక్ సందేశాలను నమ్మకూడదని, ఎవరికి డబ్బులు పంపొద్దు అని కోరారు.

సూర్యాపేట ఎస్పీని వదలని సైబర్ నేరగాళ్ళు
ఇదిలా ఉంటే తాజాగా సూర్యాపేట జిల్లా ఎస్పీ రాహుల్ హెగ్డే కూడా సైబర్ నేరగాళ్ల బారిన పడ్డారు. సూర్యాపేట ఎస్పీ రాహుల్ హెగ్డే పేరు మీద రెండు ఫేక్ ఫేస్బుక్ ప్రొఫైల్స్ క్రియేట్ చేసిన సైబర్ నేరగాళ్లు ఫ్రెండ్ రిక్వెస్ట్ లు పంపుతూ డబ్బులు అడుగుతున్నారు. సూర్యాపేట ఎస్పీ ఫేస్బుక్ ప్రొఫైల్ ను పోలిన రెండు నకిలీ ఫేస్బుక్ ప్రొఫైల్స్ ను సైబర్ నేరగాళ్లు క్రియేట్ చేశారని, వాటి నుండి వచ్చే మెసేజ్ లకు, రిక్వెస్ట్ లకు ప్రజలు స్పందించవద్దు అని ఆయన జిల్లా ప్రజలకు విజ్ఞప్తి చేశారు.

సైబర్ నేరాల బారిన రోజుకొక ఐఏఎస్, ఐపీఎస్ లు
వ్యక్తిగత వివరాలు చెప్పవద్దు అని, డబ్బులు పంపించవద్దు అని సూర్యాపేట జిల్లా ఎస్పి విజ్ఞప్తి చేశారు. కేసు నమోదు చేసి ఫేక్ ప్రొఫైల్స్ క్రియేట్ చేసిన వారిని గుర్తించి చర్యలు తీసుకుంటాం అని ఎస్పి అన్నారు. రోజుకొక ఐఏఎస్, ఐపీఎస్ లే సైబర్ క్రిమినల్స్ బారిన పడుతుంటే ఇక సామాన్యుల పరిస్థితి ఏంటి అన్నది అర్ధం కాకుండా ఉంది.

English summary

Cyber criminals created fake facebook accounts of suryapet SP, targets IAS and IPS officials