అంతర్జాతీయ రాకెట్: కిడ్నీ అమ్ముకుని జల్సాలు చేశాడు, ఏజెంట్‌గా మారాడు

నల్లగొండ: ఓ యువకుడు రూ. 5 లక్షలకు కిడ్నీ అమ్ముకుని ఆ డబ్బుతో జల్సాలు చేశాడు. దాంతో ఆగకుండా మరింత మందిని ఆ దిశగా ముందుకు నడిపించాడు. నల్లగొండ జిల్లాలో అంతర్జాతీయ స్థాయిలో కిడ్నీలను విక్రయిస్తూ క్యాష్ చేసుకున్న కిడ్నీ రాకెట్ ముఠా గుట్టును పోలీసులు రట్టుచేశారు.

బుధవారం రాత్రి పోలీస్ హెడ్‌క్వార్టర్స్‌లో ఏర్పాటు చేసిన మీడియా సమావేశంలో ఎస్పీ విక్రమ్‌జిత్ దుగ్గల్ ఆ రాకెట్‌కు సంబంధించిన వివరాలు వెల్లడించారు. నల్లగొండకు చెందిన కస్పరాజు సురేశ్ హైదరాబాద్‌లో హోటల్ మేనేజ్‌మెంట్ కోర్సు చేస్తూ జల్సాలకు అలవాటు పడి 2014లో వెబ్‌సైట్‌లో చూసి తన కిడ్నీని శ్రీలంకలోని కొలంబోలో రూ.5 లక్షలకు అమ్ముకున్నాడు. వచ్చిన డబ్బుతో జల్సాలు చేశాడు.

అనంతరం సురేశ్ కిడ్నీ రాకెట్‌కు ప్రధాన ఏజెంట్‌గా మారి జిల్లా కు చెందిన అబ్దుల్ హపీజ్, పాలెం మహేశ్, కొత్తపల్లి నరేశ్‌తోపాటు గుజరాత్, మహారాష్ట్ర , తమిళనాడులకు చెందిన మరో 11 మంది కిడ్నీలను రూ.5 లక్షల చొప్పున కొలంబోలో విక్రయించాడు. కిడ్నీలు అమ్ముకున్న 15 మందిలో నలుగురిని అరెస్టు చేశామని ఎస్పీ తెలిపారు.

ముఠా సభ్యు ల నుంచి మూడు పాస్‌పోర్టులు, కారు, బైక్, ఏటీఎం కార్డులు స్వాధీనం చేసుకున్నామని ఆయన చెప్పారు. ఒక్కో కిడ్నీకి సురేశ్ అడ్వాన్స్‌గా రూ.25 వేలు తీసుకుని, కిడ్నీ విక్రయించిన తర్వాత రూ.50వేలు తీసుకుంటాడని ఎస్పీ వివరించారు.

రక్త విభాగాన్ని బట్టి ఒక్కో కిడ్నీకి రూ.5 లక్షల నుంచి రూ.30 లక్షల వరకు ఉంటుందన్నారు. కిడ్నీ ఇచ్చిన వారికి రూ.5 లక్షలు ఇస్తారని ఎస్పీ వివరించారు. కేసు దర్యాప్తు చేస్తున్నామని ఆయన చెప్పారు.

English summary

An inernational kidney rocket mystery has been busted by Nalgonda police in Telangana.