సన్మానలెలా చేస్తారు?: సుబ్బరామిరెడ్డికి కాకతీయ హెరిటేజ్ ట్రస్ట్ వార్నింగ్

Updated: Saturday, January 20, 2018, 12:48 [IST]

హైదరాబాద్/వరంగల్: మాజీ ఎంపీ టి సుబ్బరామిరెడ్డికి కాకతీయ హెరిటేజ్ ట్రస్ట్ సభ్యులు హెచ్చరికలు జారీ చేశారు. కాకతీయ కళా వైభవం పేరుతో సినీ నటులను సన్మానిస్తే సహించేది లేదని స్పష్టం చేశారు.

అయితే ఈ పేరుతో స్థానిక కళలు, కళాకారుల పురోగతికి తోడ్పడితే మాత్రం స్వాగతిస్తామని తెలిపారు. కాకతీయ హెరిటేజ్ ట్రస్ట్ వ్యవస్థాపక సభ్యుడు పాపారావు శుక్రవారం మీడియాతో మాట్లాడుతూ ఈ మేరకు స్పందించారు.

సినిమా సంస్కృతిని బుద్ధిస్ట్ హెరిటేజ్‌కు ముడిపెట్టే ప్రయత్నం మానుకోవాలని ఆయన సూచించారు. సినీ పరిశ్రమ వల్ల తెలంగాణ సంస్కృతికి తీవ్ర నష్టం జరిగిందన్నారు.

శిల్పకళా వేదికలో రెండు రోజుల క్రితం సినీ నటుడు మోహన్‌బాబును సుబ్బరామిరెడ్డి సన్మానించి బిరుదు ప్రదానం చేసిన విషయం తెలిసిందే. ఈ నేపథ్యంలోనే కాకతీయ హెరిటేజ్ ఈ మేరకు హెచ్చరించడం గమనార్హం.