వాహనదారులకు తీవ్ర హెచ్చరిక!

రోజురోజుకు చలి ముదురుతోంది. తెలుగు రాష్ట్రాలలో ముందు ముందు చలి తీవ్రత పెరుగుతుందని వాతావరణశాఖ హెచ్చరికలు జారీ చేస్తుంది. ఇప్పటికే కొన్ని జిల్లాలకు ఆరెంజ్ అలర్ట్, కొన్ని జిల్లాలకు ఎల్లో అలర్ట్ ను ప్రకటించిన వాతావరణశాఖ రెండు తెలుగు రాష్ట్రాలలోను రాత్రివేళ, తెల్లవారుజామున పొగమంచు విషయంలో జాగ్రత్తగా ఉండాలని సూచిస్తుంది. వాతావరణంలో పొగమంచు తీవ్రత పెరగటంతో వీలైనంత వాహనదారులు రాత్రి, తెల్లవారుజామున ప్రయాణాలు చేయద్దని ట్రాఫిక్ పోలీసులు ప్రజలకు సూచిస్తున్నారు.

ప్రజలను అప్రమత్తం చేస్తూ కీలక ప్రకటన
వాతావరణంలో పొగమంచు తీవ్రత పెరగడం కారణంగా జరిగిన రోడ్డు ప్రమాదాల నేపథ్యంలో ప్రజలను అప్రమత్తం చేస్తూ కీలక ప్రకటన చేశారు తెలంగాణ పోలీసులు. రాత్రి, తెల్లవారుజామున దట్టమైన పొగమంచు కారణంగా రహదారులపై ఎదురుగా వచ్చే వాహనాలు, పాదాచారులను గుర్తించడం కష్టమవుతుందని, వీక్షించే సామర్ధ్యం తక్కువుగా వుంటుందని పేర్కొన్నారు.

వాహనాలు నడుపుతున్నప్పుడు తీసుకోవాల్సిన జాగ్రత్తలు
ఈ సమయంలో చిన్నపాటి నిర్లక్ష్యం కూడా పెద్ద ప్రమాదాలకు దారితీసే అవకాశాలు ఉన్నందున, ప్రజలు అత్యవసరమైతే తప్ప ఈ సమయాల్లో ప్రయాణాలను మానుకోగలరని తెలంగాణ పోలీసులు ప్రజలకు విజ్ఞప్తి చేస్తున్నారు. అలాగే పొగమంచు ఎక్కువగా ఉండే సమయంలో వాహనాలు నడుపుతున్నప్పుడు తీసుకోవాల్సిన జాగ్రత్తలను సూచిస్తూ.. వాహనాలను వేగంగా నడపొద్దని, వాహనదారులు శ్రద్ధతో, నిదానంగా ప్రయాణించాలని సూచించారు.

పొగమంచులో ప్రయాణాలు చేస్తే ఇవి తప్పనిసరి
తక్కువ వీక్షించే సామర్ధ్యం కారణంగా ఇతర వాహనాలు, పాదచారులు, మలుపులు, రోడ్డు విభాగాలు సరిగా కనిపించక ప్రమాదాలు సంభవించే అవకాశం ఉన్నందున, హెడ్‌లైట్లను లో బీమ్‌లో ఉంచి, ఫాగ్ లైట్లను వాడాలని సూచించారు. అత్యవసర సమయాల్లో ప్రయాణం తప్పనిసరి అయితే వాహనాల స్థితిని ముందుగానే తనిఖీ చేసుకోవంతో పాటు ముఖ్యంగా బ్రేకులు, లైట్లు, టైర్లు సరిగా ఉన్నాయో లేదో చెక్ చేసుకోవాలని అన్నారు.

ఇలా అసలే చెయ్యొద్దు డేంజర్
డ్రైవింగ్ సమయంలో మొబైల్ ఫోన్ వినియోగం, ఆకస్మికంగా ఓవర్‌టేక్ చేయడం, ట్రాఫిక్ నియమాలు ఉల్లంఘించడం వంటి ప్రమాదకరమైన చర్యలకు పాల్పడవద్దని సూచించారు. పోలీసుల సూచనలతో పాటు ట్రాఫిక్ నిబంధనలను పాటిస్తూ వాహనదారులు వారి గమ్యస్థానాలకు క్షేమంగా చేరుకోవడమే ప్రధాన లక్ష్యమని తెలంగాణ పోలీసులు వెల్లడించారు. మిగతా సీజన్లలో కంటే, చలికాలంలో వాహనాలు నడిపేటప్పుడు మరింత అప్రమత్తంగా ఉండాల్సిన అవసరాన్ని ప్రతి ఒక్కరు గుర్తుంచుకోవాలన్నారు.

English summary

The Meteorological Department has advised people to be cautious about fog in both Telugu states at night and early morning. As the intensity of fog in the atmosphere has increased, the traffic police are advising motorists to avoid traveling at night and early morning as much as possible.