స‌న్ స్ట్రోక్ ఎంత ప్ర‌మాదక‌రం..!! డీయ‌స్ అవ‌మాన‌క‌ర నిష్క్ర‌మ‌ణ‌..

Published: Thursday, June 28, 2018, 12:01 [IST]

బీసి నేత‌గా తెలంగాణ‌లో చ‌క్రం తిప్పిన నాయ‌కుడు..

ఆయన టీఆర్ఎస్ లో చేరడం పెద్ద సంచలనం అయితే ఇప్పుడు ఆదే పార్టీ నుంచి బయటకు వెళ్తున్న తీరు మరో సంచలనంగా మారింది.డి.ఎస్ పార్టీలో ఉంటు వ్యతిరేక చర్యలకు పాల్పడుతున్నారనేది నిజామాబాద్ టీఆర్ఎస్ నేత ఆరోపణ. దీనిపైన వారంతా ఉమ్మడిగా ముఖ్యమంత్రి చంద్రశేఖర్ రావుకు ఫిర్యాదు చేశారు. దీనిపైన సి.ఎం నిర్ణయం తీసుకోవాల్సి ఉంది. అయితే డి.ఎస్ బీసీ సామాజిక వర్గానికి చెందిన సీనియర్ నేత కావడంతో కేసీఆర్ కొంత ఆచితూచి స్పందించనున్నారు. టీఆర్ఎస్ నుంచి తనకు తానుగా డి.ఎస్ వెళ్లిపోయింత వరకు చంద్రశేఖర్ రావు ఓపిక పట్టే అవకాశముంది.

డి.ఎస్ చిన్నకుమారుడు అర‌వింద్ బీజేపీలో చేరడంతోనే నిజామాబాద్ టీఆర్ఎస్ లో ముసలం ప్రారంభమైంది. తండ్రి టీఆర్ఎస్ లో ఉన్నప్పటికి అర్వింద్ మాత్రం బీజేపీని ఎంచుకున్నారు. వచ్చే ఎన్నికల్లో బీజేపీ తరుపున నిజామాబాద్ లోక్ సభ నుంచి పోటీ చేయడానికి ఏర్పాట్లు చేసుకుంటున్నారు. నియోజకవర్గ వ్యాప్తంగా అర‌వింద్ విస్రుత్తంగా పర్యటిస్తు టీఆర్ఎస్ పైన నిప్పులు చెరుగుతున్నారు. ఎం.పి కవితను టార్గెట్ చేస్తున్నారు.

'స‌న్' స్ట్రోక్ ఎంత ప్ర‌మాద‌మో తెలుసుకోలేక పోయిన డీయ‌స్..

నిజామాబాద్ లోక్ సభ పరిధిలో బీజేపీకి మంచి పట్టుండటంతో అర‌వింద్ భవిష్యత్తులో ప్రమాదకరం అవుతారన్న భావనకు ఎం.పి కవిత వచ్చారు. ఆయనను నియంత్రించాలని డి.ఎస్ కు పలు మార్లు సూచించినట్లు సమాచారం. అయితే అర్వింద్ తన మాట వినడం లేదని ఆయన టీఆర్ఎస్ నేతలకు స్పష్టం చేశారు. ఇదే సమయంలో డి.ఎస్ అనుచరుల మాట టీఆర్ఎస్ లో చెల్లుబాటు కాకుండా పోయింది. ఆయన వర్గానికి ఎలాంటి పదవులు దక్కకుండా కవిత పావులు కదుపుతున్నారు. దీంతో పార్టీలో గౌరవం లేకుండా పోయిందని ఇటీవల డి.ఎస్ ముందే ఆయన అనుచరులు ఆవేదన వ్యక్తం చేశారు. టీఆర్ఎస్ నుంచి వెళ్లిపోవడమే మేలని వారు ఆయనకు బహిరంగంగానే సూచించారు.

మరో వైపు టీఆర్ఎస్ లో ఉన్న తన అనుచరులు, కుల సంఘాలను కొడుకు అర్వింద్ కు అనుకూలంగా పనిచేయాలని డి.ఎస్ సూచిస్తున్నారని కవిత అనుమానిస్తున్నారు. పార్టీలో ఉంటు కుమారుడి విజయం కోసం ఆయన పావులు కదుపుతున్నారని అంచనాకు వచ్చారు. అందుకే ఆయనను టీఆర్ఎస్ నుంచి పంపించడానికి ఆమె సిద్ధమయ్యారు.

గులాబీ కండువా క‌ప్పుకున్నాక ఢీలా ప‌డిపోయిన డీయ‌స్..సొంత పార్టీ వైపు చూపు..

జిల్లాలోని పార్టీ ఎమ్మెల్యేలు, ఎమ్మెల్సీలందరిని డి.ఎస్ కు వ్యతిరేకంగా కవిత ఏకం చేశారు. కాంగ్రెస్ లో దాదాపు పదేళ్ల పాటు చక్రం తిప్పారు డి.శ్రీనివాస్. రెండు సార్లు పీసీసీ ఛీప్ గా మంచి పేరుతెచ్చుకున్నారు. నాయకులను సమన్వయం చేయడంలో డి.ఎస్ దిట్ట. కాంగ్రెస్ లో వై.ఎస్ రాజశేఖర్ రెడ్డి వాహ కొనసాగుతున్న సమయంలో కూడా డి.ఎస్ తనకు ఒక గుర్తింపును తెచ్చుకోగల్గారు. తెలంగాణ ఏర్పాటు సమయంలో డి.ఎస్ ముఖ్యమంత్రి రేస్ లో నిలబడ్డారు. బీసీ సామాజికవర్గానికి చెందిన ఆయనకు కచ్చితంగా కాంగ్రెస్ లో మంచి అవకాశాలు దక్కేవి. అయితే ఎమ్మెల్సీ పదవి ఇవ్వకుండా అవమానించారన్న ఆగ్రహంతో డి.ఎస్ ఆ పార్టీని వదిలిపెట్టారు. రెడ్డి సామాజికవర్గం వాహ ముందు తట్టుకోవడం కష్టమని భావించిన ఆయన ఆవేశంతో గులాబీ కండువా కప్పుకున్నారు. డి.ఎస్ శ్రీనివాస్ కాంగ్రెస్ ను వదలడం అప్పట్లో సంచలనమైంది. అయితే ఆయన సీనియార్టీని ద్రుష్టిలో ఉంచుకొని కేసీఆర్ ఆయనకు మంచి పదవులను అప్పగించారు. క్యాబినెట్ హోదా తో రాష్ట్ర ప్రభుత్వ సలహాదారుగా నియమించడంతో పాటు రాజ్యసభ పదవి కూడా ఇచ్చారు.

టీఆర్ఎస్ లోకి వెళ్లిన ఇత‌ర నేత‌ల‌కు మాదిరిగానే డీయ‌స్ కు కూడా అంత ప్రాధాన్య‌త ఇవ్వ‌ని కేసీఆర్..

కాని రాజకీయంగా ఎప్పుడు యాక్టివ్ గా ఉండే డి.ఎస్ టీఆర్ఎస్ వ్యవహారాల్లో మౌనంగా ఉండిపోవాల్సి వచ్చింది. పార్టీ ప్లీనరీ సమావేశాల్లో కనీసం వేదిక పైన కూడా ఆయనకు కుర్చీ లేకుండా పోయింది. కేసీఆర్ కూడా డి.ఎస్ సీనియార్టీని ఉపయోగించుకునేందుకు ఆసక్తి చూపించలేదు. దీంతో చాలా కాలం నుంచి డి.శ్రీనివాస్ లోలోన మధన పడుతున్నారు. కాంగ్రెస్ ను అనవసరంగా వదిలిపెట్టాననే భావనలో ఆయన ఉన్నట్లు అనుచురులు చెపుతున్నారు. ఎన్నికల నాటికి తిరిగి సొంత పార్టీ గూటికి చేరుకోవాలని డి.ఎస్ భావిస్తున్నారు. వాతావరణాన్ని పసిగట్టిన టీఆర్ఎస్ ఆయనను వదిలించుకోడానికి స్కెచ్ గీసింది. మొత్తానికి డి.శ్రీనివాస్ లాంటి సీనియర్ నేత వేసిన ఒక్క తప్పటడుగు ఆయన రాజకీయ భవిష్యత్తును గందరగోళంలోకి నెట్టింది.

Published On June 28, 2018