తెలంగాణ రాష్ట్ర ప్రధాన ఎన్నికల అధికారిగా సుదర్శన్ రెడ్డి

తెలంగాణ రాష్ట్ర ప్రధాన ఎన్నికల అధికారి(సీఈవో)గా సుదర్శన్ రెడ్డి నియమితులయ్యారు. ఈ మేరకు కేంద్ర ఎన్నికల సంఘం ఉత్తర్వులు వెలువరించింది. ప్రస్తుత సీఈవో వికాస్ రాజ్‌ను ఈసీ రిలీవ్ చేసింది. కొత్త సీఈవోగా నియమితులైన సుదర్శన్ రెడ్డి ప్రస్తుతం జీఏడీ ముఖ్య కార్యదర్శిగా ఉన్నారు.

మున్సిపల్ ఎన్నికలు జరిగేదెప్పుడు?

మున్సిపల్ ఎన్నికలు గడువులోగా నిర్వహించడం సాధ్యమయ్యేలా లేదు. పలు చిక్కుముడులు వీడితే తప్ప ఎన్నికల నిర్వహణ సాధ్యమయ్యే పరిస్థితి లేదని అధికారులు కూడా అభిప్రాయపడుతున్నారు. నిబంధనల మేరకు గ్రేటర్ హైదరాబాద్ మున్సిపల్ కార్పొరేషన్ మినహా 142 పురపాలక సంఘాలకు వచ్చే ఏడాది జనవరిలో ఎన్నికలు నిర్వహించాల్సి ఉంది.

అయితే, బీసీ జనాభా గణన చిక్కుముడిగా ఉందంటున్నారు. మరోవైపు, తెలంగాణ మున్సిపల్ చట్టం-2019ను అసెంబ్లీ, శాసనమండలిలో ఆమోదించినప్పటికీ నియమ, నిబంధనలు రూపొందించలేదు. ఇక, స్థానిక సంస్థల ఎన్నికలు నిర్వహించడానికి ముందుగానే బీసీ జనాభా గణన చేపట్టిన తర్వాతే రిజర్వేషన్లు ఖరారు చేయాలని సుప్రీంకోర్టు గతంలో ఇచ్చిన తీర్పును కార్యరూపంలో తీసుకురావడానికి చాలా సమయం పడుతుందని అభిప్రాయపడుతున్నారు. రాష్ట్ర వ్యాప్తంగా బీసీ జనాభా గణన నిర్వహించేందుకు కనీసం 6 నుంచి 9 నెలలు వరకు పడుతుందని అంచనా వేస్తున్నారు. ఇవన్నీ పూర్తయితే గానీ ఎన్నికలు జరిగే పరిస్థితి లేనట్లుగా తెలుస్తోంది.

English summary

Sudarshan Reddy as Chief Electoral Officer of Telangana State.