Wines Shop tenders: మద్యం షాపు టెండర్లతో సర్కార్‍కు వేల కోట్ల రూపాయల ఆదాయం..

రాష్ట్రంలో మద్యం షాపుల కేటాయింపునకు దరఖాస్తు రుసుము రూపంలో తెలంగాణ ప్రభుత్వం రూ.2,639 కోట్ల ఆదాయాన్ని ఆర్జించింది. రాష్ట్రంలోని 2,620 మద్యం దుకాణాలకు 1,31,954 దరఖాస్తులు వచ్చాయి. ఒక్క మద్యం సీసా కూడా అమ్మకుండా ఎక్సైజ్ శాఖ సొమ్ము చేసుకుంది. తిరిగి చెల్లించలేని దరఖాస్తు రుసుము రూపంలో రికార్డ్ ఆదాయాన్ని పొందింది. ఆగస్టు 21న డ్రా ద్వారా మద్యం దుకాణాలను కేటాయిస్తారు. ఎక్సైజ్ శాఖ డిసెంబర్ 1, 2023 నుంచి నవంబర్ 2025 వరకు దుకాణాల నిర్వహణకు లైసెన్స్‌లను మంజూరు చేస్తుంది.

రాష్ట్రవ్యాప్తంగా 1.31 లక్షల మంది మద్యం వ్యాపారులు లైసెన్స్‌ల కోసం దరఖాస్తు చేసుకున్నారు. 2014లో తెలంగాణ రాష్ట్రం ఏర్పాటైన తర్వాత ఇప్పటివరకు ఎన్నడూ లేని విధంగా అత్యధిక దరఖాస్తులు వచ్చాయి. 2021లో చివరి రౌండ్ లైసెన్స్‌ల సమయంలో ప్రభుత్వానికి 69,000 దరఖాస్తులు వచ్చాయి. నాన్-రిఫండబుల్ అప్లికేషన్ ఫీజు కింద రూ. 1,350 కోట్లు, షాప్ లైసెన్స్ ఫీజు ద్వారా రూ. 3,500 కోట్లు ఆర్జించింది. కొత్త మద్యం పాలసీ 2023-25 ప్రకారం, ప్రతి దరఖాస్తుకు నాన్-రిఫండబుల్ ఫీజు రూ. 2 లక్షలుగా నిర్ణయించారు.

ఒక్కో దుకాణానికి ఏడాదికి లైసెన్సు ఫీజు ఆ ప్రాంత జనాభా ఆధారంగా రూ.50 లక్షల నుంచి రూ.1.1 కోట్ల వరకు ఉంటుంది. అర్హులైన దరఖాస్తుదారులు మొత్తంలో 25 శాతాన్ని ఒక సంవత్సరానికి ఎక్సైజ్ పన్నుగా సమర్పించాలి. సంవత్సరానికి ప్రత్యేక రిటైల్ ఎక్సైజ్ పన్ను రూ.5 లక్షలు ఉంటుంది. రాష్ట్రవ్యాప్తంగా 2,620 దుకాణాలకు లైసెన్సులు జారీ చేయనున్నారు. ప్రభుత్వం వివిధ బలహీన వర్గాలకు 15 శాతం దుకాణాలను కేటాయించింది. గౌడలు, ఎస్సీ, ఎస్టీలకు మొత్తం 786 దుకాణాలను కేటాయించనున్నారు.

మొత్తం షాపుల్లో హైదరాబాద్‌లో 615 షాపులను కేటాయించనున్నారు. కొత్త మద్యం పాలసీ ప్రకారం వ్యాపారులకు సాధారణ కేటగిరీకి 27 శాతం, ప్రీమియం కేటగిరీ, బీరుకు 20 శాతం మార్జిన్‌గా నిర్ణయించారు. ప్రస్తుత లైసెన్సులు నవంబర్ 30 వరకు చెల్లుబాటులో ఉన్నప్పటికీ, నవంబర్-డిసెంబరులో జరగనున్న అసెంబ్లీ ఎన్నికలను దృష్టిలో ఉంచుకుని రాష్ట్ర ప్రభుత్వం చాలా ముందుగానే టెండర్ల ప్రక్రియను ప్రారంభించింది. మొత్తం 1,31,490 దరఖాస్తులు వచ్చాయి. ఒక్కో దుకాణానికి సగటున 50 మంది వ్యాపారులు పోటీ పడ్డారు. హైదరాబాద్‌లోని సరూర్‌నగర్ ప్రాంతంలోని ఒక దుకాణానికి గరిష్టంగా (10,908) దరఖాస్తులు వచ్చాయి.

శంషాబాద్‌లోని ఒక షాపు కోసం 10,811 దరఖాస్తులు వచ్చినట్లు ఎక్సైజ్ అధికారులు తెలిపారు. కుమురం భీమ్ ఆసిఫాబాద్‌లోని ఓ దుకాణానికి అత్యల్పంగా (976) దరఖాస్తులు వచ్చాయి. 979 దరఖాస్తులతో ఆదిలాబాద్‌ రెండో స్థానంలో ఉంది. దరఖాస్తుల స్వీకరణకు ఆగస్టు 18 చివరి తేదీ. గత రెండు రోజుల్లో 87 వేలకు పైగా దరఖాస్తులు వచ్చాయి.పలువురు రాజకీయ నాయకులు, వ్యాపారులు లేదా వారి ప్రతినిధులు టెండర్ల ప్రక్రియలో పాల్గొనడమే ఈ ఏడాది దరఖాస్తులు భారీగా పెరగడానికి ప్రధాన కారణంగా చెబుతున్నారు. అసెంబ్లీ ఎన్నికలతో మొదలై వచ్చే ఏడాది ఎన్నికల పరంపర దృష్ట్యా భారీగా మద్యం ఆదాయం వస్తుందని వ్యాపారులు అంచనా వేస్తున్నారు. మద్యం అమ్మకాల ద్వారా తెలంగాణ ఆదాయం 2015-16లో రూ. 12,703 కోట్ల నుంచి 2021-22 నాటికి రూ. 25,585 కోట్లకు రెట్టింపు అయింది.

English summary

The Telangana government has earned an income of Rs.2,639 crore in the form of application fee for allotment of liquor shops in the state. 1,31,954 applications were received for 2,620 liquor shops in the state.