జెపిపై దాడికి అమెరికాలో నిరసన

లోకసత్తా శాసనసభ్యుడు జయప్రకాష్ నారాయణపై, ఇతర ప్రజాప్రతినిధులపై శాసనసభ ఆవరణలో దాడికి నిరసనగా అమెరికాలోని సాన్ ఫ్రాన్సిస్కో బే ఏరియాలో ఎన్నారైలు ప్రదర్శన నిర్వహించారు. రాజకీయ సిద్ధాంతాలను పక్కన పెట్టి అమెరికాలోని ఆంధ్రప్రదేశ్‌కు చెందిన ఎన్నారైలు, తమిళనాడుకు చెందిన ఎన్నారైలు ఈ ప్రదర్శనలో పాల్గొన్నారు. దాడిని ముక్తకంఠంతో ఖండించారు. సేవ్ డెమొక్రసీ పేరును జరిగిన ఈ సమావేశాన్ని పీపుల్ ఆఫ్ లోకసత్తా ఏర్పాటు చేసింది.

టిఆర్ఎస్ పార్టీవారి, ఇతరుల చర్యను వక్తలు ఖండించారు. దాడిని అమానుషమని వారు అభివర్ణించారు. దాడి రాజ్యాంగం పట్ల పట్టింపు లేకపోవడాన్ని, పౌర భావన కరువు కావడాన్ని చూపించిందని వారన్నారు. శాసనసభ ఆవరణలో ప్రజాప్రతినిధులే మాట్లాడలేని స్థితి ఉంటే నగరాల్లో ప్రజల పరిస్థితి ఏమిటో అర్థం చేసుకోవచ్చునని వ్యాఖ్యానించారు. పరిస్థితి చూస్తుంటే నియంత పాలనలోని ఈజిప్టు కన్నా ప్రజాస్వామ్య భారతదేశం దారుణంగా ఉందని అనిపిస్తోందని అన్నారు. దాడికి పాల్పడినవారిపై చర్యలు తీసుకోవాలని కోరుతూ ఆంధ్రప్రదేశ్ ప్రభుత్వానికి సమర్పించడానికి వినతిపత్రంపై సంతకాలు చేశారు.