అవినీతిపై పోరు, ఎన్నారైల మార్చ్

బ్రిటిష్ పాలకులను పారదోలడానికి మహాత్మా గాంధీ చేసిన దండి యాత్రను స్ఫూర్తిగా తీసుకుని భారత ఎన్నారైలు అవినీతి సంకెళ్ల నుంచి విముక్తం చేయడానికి యాత్ర చేపట్టారు. జన లోక్‌పాల్ బిల్లును తెచ్చి విదేశాల్లోని నల్లధనాన్ని దేశానికి తెప్పించాలని వారు డిమాండ్ చేస్తున్నారు. ఈ డిమాండ్‌తో ఎన్నారైలు కొంత మంది కాలిఫోర్నియా పశ్చిమ తీరం వెంబడి యాత్రను సాగిస్తున్నారు. వారు 240 మైళ్లు నడక సాగిస్తారు.

రెండు సెగ్మెంట్లలో దండి మార్చ్ 2 పూర్తయినట్లు ఓ ప్రకటనలో తెలిపారు. దక్షిణ కాలిఫోర్నియాలోని 19 నగరాల గుండా 130 మైళ్లు సాగి యాత్ర బే ఏరియాకు చేరుకుంది. ఇండియా అగెయినెస్ట్ కరప్షన్, పీపుల్ ఫర్ లోక్‌సత్తా, యూత్ ఫర్ బెట్టర్ ఇండియా, ఫిఫ్త్ పిల్లర్, భారత్ స్వాభిమాన్, శంకర ఐ ఫౌండేషన్, ఓరుమా, ఇండో ముస్లిం అసోసియేషన్, టిఎఎస్సి, సేవ్ ఇండియా ఫ్రమ్ కరప్షన్, సాకు, లైఫ్ ఎసెన్స్ అకాడీ, జాగో సంస్థలు ఆ మార్చ్‌కు మద్దతు ప్రకటించాయి. ఆరుగురు భారత ఎన్నారైలు 240 మైళ్ల యాత్ర సాగిస్తున్నారు.

తుది దశ మార్చ్ 110 మైళ్లు సాగుతుంది. అది ఈ నెల 26వ తేదీన శాన్‌ఫ్రాన్సిస్కోలోని మహాత్మాగాంధీ విగ్రహం వద్ద ముగుస్తుంది. ఈ కార్యక్రమానికి కెనడా వాంకోవర్ సౌత్ పార్లమెంటు సభ్యుడు ఉజ్జల్ దోశాంజ్ హాజరవుతారు. అదే రోజు ప్రపంచంలోని 50 నగరాల్లో సంఘీభావ యాత్రలు జరుగుతాయి.