తానా సభలు: సాహిత్యానికి పెద్ద పీట
తానా అధ్యక్షుడు ప్రసాద్ తోటకూర, 19వ మహాసభల సమన్వయకర్త మురళి వెన్నం, మహాసభల కార్యదర్శి చలపతి కొండ్రకుంట వివిధ శాఖలలో ఇప్పటికే ముమ్మరంగా జరుగుతున్న ఏర్పాట్లను పర్యవేక్షిస్తున్నారు. ప్రపంచ నలుమూలల నుండి దాదాపు పదివేలకు పైచిలుకు తెలుగు వారు ఈ కార్యక్రమంలో పాల్గొనే అవకాశం ఉంది. భారీ ఎత్తున జరుగనున్న తానా మహాసభల్లో సాహిత్య కార్యక్రమాలు ప్రత్యేక ఆకర్షణ కానున్నాయి.
తానా మహాసభల సాహిత్య వేదిక సమన్వయకర్త విజయ చంద్రహాస్ మద్దుకూరి ఈ సందర్భంగా మాట్లాడుతూ - "తెలుగువారికే ప్రత్యేకమైన అవధాన ప్రక్రియ గురించిన ప్రత్యేక కార్యక్రమం ‘అవధాన కళావైభవం'లో అవధాన దిగ్గజాలు మేడసాని మోహన్, గరికిపాటి నరసింహారావు, పాలపర్తి శ్యామలానంద ప్రసాద్ మొదలైన వారు అవధాన కళ లోని అనేక పార్శ్వాలను సోదాహరణంగా వివరించనున్నారు. మామూలుగా జరిగే అవధానంలా కాకుండా కొత్తగా విశ్లేషణాత్మకంగా అనేకమంది అవధానులతో జరిగే ఈ ముఖాముఖీ అందరికీ అలరించబోతోంది" అని అన్నారు.
రిజిష్ట్రేషన్ ప్రారంభం
మహాసభల నూతన వెబ్ సైట్ www.tana2013.org ను ఇటీవల ఆవిష్కరించారు. ఇంటర్నెట్ ద్వారా 19వ మహాసభలకు రిజిష్ట్రేషన్ సదుపాయం ఈ రోజే ప్రారంభించారు. పైన పొందుపరచిన వెబ్ సైట్ లో "రిజిష్ట్రేషన్" మీద నొక్కి మీ కుటుంబ సభ్యల వివరాలతో మీ పేరును నమోదు చేసుకోవచ్చు. మహాసభలకు సంబందించిన అన్నీ వివరాలను ఎప్పటికప్పుడు ప్రపంచమంతా విస్తరించి ఉన్న పదహారు కోట్ల తెలుగు వాళ్లకు తెలియజేయడం ఈ వెబ్ సైట్ ప్రధానోద్దేశ్యం. చీరలమ్మా చీరలు ....ఊప్పాడొప్పాడా చీరలు! అవునండీ.. ఈ మహాసభలకు తమ పేరు నమోదు చేసుకొన్న వారి జాబితా నుండి ప్రతివారం ఒక లక్కీ డిప్ విజేతకు రెండు వందల డాలర్ల విలువ చేసే ఉప్పాడ చేర బహుమతిగా ఇవ్వడానికి కంకటాల సంస్థ వారు ముందుకు వచ్చారు.
ధ్రువతారల తెలుగు వెలుగుల జిలుగు
తానా అధ్యక్షుడు ప్రసాద్ తోటకూర మాట్లాడుతూ "ప్రవాసంలో తెలుగు భాషాసంస్కృతుల పరిరక్షణకు పెద్ద పీట వేసి గత మూడున్నర దశాబ్దాల కాలంపాటు తానా సంస్థ నిరాటంకంగా చేస్తున్న కృషి మీకు తెలిసిందే. చలన చిత్రాలకు రసవత్తరంగా సాహిత్యాన్ని అందిస్తున్న రచయితలకు ఈ మహాసభలలో ఒక ప్రత్యెక వేదిక ఏర్పాటు చేయబడింది. చలనచిత్ర రచయితలు సిరివెన్నెల సీతారామశాస్త్రి, జొన్నవిత్తుల రామలింగేశ్వరరావు, చంద్రబోస్, వడ్డేపల్లి కృష్ణ, రామజోగయ్య శాస్త్రి, అనంతశ్రీరాం మరొక వైవిధ్యభరితమైన కార్యక్రమంలో పాల్గొనబోతున్నారు. వీనులవిందుగా ప్రముఖగాయకుల పాటలు, అవి వ్రాసిన రచయితల మాటలు, సభికుల ప్రశ్నలకు సమాధానాలు వీటన్నింటితో చలనచిత్ర గీత సాహిత్యం మీద జరుగబోయే ఈ కార్యక్రమం తానా సభలలో వన్నెల హరివిల్లు వెలయిస్తుందని నిస్సందేహంగా చెప్పవచ్చు" అని అన్నారు.
అందరినీ ఆకర్షించే విభిన్న కార్యక్రమాలు
తెలుగు భాషాసాహిత్యాలకు పట్టాభిషేకం చేయనున్న ఈ మహాసభలలో ఇతర సాహిత్య ప్రక్రియల మీద జరుగబోయే కార్యక్రమాల వివరాలు త్వరలో తెలియజేస్తామనీ, వినూత్నరీతులలో వినోద ప్రధానంగా సామాన్య ప్రేక్షకులను కూడా ఆకట్టుకునేవిధంగా కార్యక్రమాలను రూపొందించే ప్రయత్నం చేస్తున్నామనీ తానా అధ్యక్షులు తోటకూర ప్రసాద్, 19వ తానా మహాసభల సమన్వయకర్త మురళి వెన్నం, మహాసభల కార్యదర్శి శ్రీ చలపతి కొండ్రగుంట, సాహిత్య కార్యక్రమాల సమన్వయకర్త శ్రీ విజయచంద్రహాస్ మద్దుకూరి ఒక తమ సంయుక్త ప్రకటనలో తెలియ జేసారు.
Click it and Unblock the Notifications
Sign in with Google