యుఎఇలో తెలంగాణ పల్లె పాట

యునైటెట్ అరబ్ ఎమిరేట్స్ (యు.ఎ.ఇ.)లో గల్ఫ్ తెలంగాణ సాంస్కృతిక సంఘం మార్చి 28వ తేదీన మెగా సాంస్కృతిక కార్యక్రమాన్ని నిర్వహించింది. తెలంగాణ పల్లె పాట పేరుతో ఈ కల్చరల్ నైట్ ను నిర్వహించారు. ఆల్ నాసర్ లీజర్ ల్యాండ్ ఐస్ రింకులో జరిగిన ఈ కార్యక్రమానికి దాదాపు 5 వేల మంది హాజరయ్యారు. యు.ఎ.ఇ.లో తెలంగాణలోని పది జిల్లాలకు చెందినవారు దాదాపు 3 లక్షల 20 వేల మంది ఉంటున్నారు. సంఘం మహిళా విభాగం కార్యకర్తలు జ్యోతి ప్రజ్వలనం చేసి కార్యక్రమాన్ని ప్రారంభించారు. జువ్వాది శ్రీనివాసరావు స్వాగతోపన్యాసం చేశారు. ఈ కార్యక్రమాన్ని ఏర్పాటు చేసిన వై. శ్రీనివాస శర్మకు ఆయన కృతజ్ఞతలు తెలిపారు. కిషన్, రమేష్, శ్రీనివాసరెడ్డి, సల్లావుద్దీన్ కార్యక్రమ నిర్వహణకు సహకరించారు. తిరుమల్, రాజగోపాల్ సాంకేతిక సహకారం అందించారు.

అక్రమంగా ఉంటున్న తెలంగాణ కూలీల సమస్యలకు పరిష్కారం చూపే దిశలో కృషి చేయాలని సంఘం నిర్ణయించుకుంది. తెలంగాణ నుంచి వలస వచ్చినవారి సమస్యలపై భారత రాయబార కార్యాలయానికి విన్నవించాలని కూడా నిర్ణయించుకుంది. మద్యపానానికి, ఇతక సంఘ వ్యతిరేక కార్యకలాపాలకు వ్యతిరేకంగా వలస కూలీలను చైతన్యవంతులను చేయాలని సంఘం నిర్ణయం తీసుకుంది. తెలంగాణ కూలీలకు బీమా పథకాన్ని ప్రవేశపెట్టే ఆలోచనలో కూడా సంఘం ఉంది. పల్లెపాట కార్యక్రమానికి ఆల్ కంజ్ గ్రూప్, ఎయిర్ అరేబియా, ఎమిరేట్స్ ఇండియా ఇంటర్నేషనల్ ఎక్స్ఛేంజ్, ఎలైట్ గ్రూప్ సహకారం అందించాయి.

తెలంగాణ పల్లె పాట కార్యక్రమంలో తెలంగాణకు చెందిన ప్రముఖ గాయకులు, వాగ్గేయకారులు దేశపతి శ్రీనివాస్, రసమయి బాలకిషన్, అంతడుపుల నాగరాజ్, తెలు విజయ, కవిత, ప్రముఖ మిమిక్రీ ఆర్టిస్టు సుధీర్ కుమార్ పాల్గొన్నారు. ఆవరణ క్రిక్కిరిసి పోవడం ఆల్ నాసర్ లీజర్ ల్యాండ్ చరిత్రలో ఇదే మొదటి సారి.