నువ్వెంత అంటే నువ్వెంత: క్లాసెన్- శాంసన్ గొడవ
ఐపీఎల్ లో చెన్నై సూపర్ కింగ్స్, సన్రైజర్స్ హైదరాబాద్ మధ్య జరిగిన మ్యాచ్లో హెన్రిచ్ క్లాసెన్ స్టంప్ అవుట్ కావడం వివాదాన్ని రేకెత్తించింది. క్లాసెన్ అవుట్ అయ్యాక వికెట్ కీపర్ సంజు శాంసన్తో తీవ్ర వాగ్వాదానికి దిగాడు. పరిస్థితి చేయిదాటడంతో అంపైర్లతో పాటు చెన్నై సూపర్ కింగ్స్ ప్లేయర్లు కూడా కలగజేసుకున్నారు. వారిని సర్దిచెప్పారు. దీంతో మ్యాచ్ మరింత హీటెక్కింది.
ఈ రెండు జట్ల మధ్య జరిగిన ఈ మ్యాచ్ ఆద్యంతం రసవత్తరంగా సాగడం మాత్రమే కాదు.. ఆవేశకావేశాలకూ తావిచ్చింది. నువ్వెంత అంటే నువ్వెత అనుకునే స్థాయికి వెళ్లింది. గ్రౌండ్ లో అనూహ్యంగా చోటుచేసుకున్న పరిణామం ఇది. దీంతో స్టేడియంలో కాసేపు ఉద్రిక్త వాతావరణం నెలకొంది. గొడవ అనంతరం హెన్రిచ్ క్లాసెన్ అసహనంతో పెవిలియన్ దారి పట్టడం కనిపించింది.
సన్రైజర్స్ హైదరాబాద్ ఇన్నింగ్స్ 14వ ఓవర్లో ఈ ఘటన చోటు చేసుకుంది. చెన్నై స్పిన్నర్ నూర్ అహ్మద్ బౌలింగ్కు వచ్చాడు. అప్పటికే క్లాసెన్ 26 బంతుల్లో 47 పరుగులతో మ్యాచ్ స్వరూపాన్ని మార్చేశాడు. హాఫ్ సెంచరీ వైపు దూసుకుపోతున్నాడు. ఈ దశలో నూర్ అహ్మద్ సంధించిన ఓ అద్భుతమైన గూగ్లీ క్లాసెన్ను ఉక్కిరిబిక్కిరి చేసింది.
దాన్ని ఆడబోయి క్రీజ్ వెలుపలికి రావడం, వికెట్ల వెనక ఉన్న సంజు శాంసన్ మెరుపువేగంతో స్టంపౌట్ చేయడం చకచకా జరిగిపోయింది. రీప్లేలో క్లాసెన్ పాదం గాల్లో ఉండటం స్పష్టం కావడంతో స్టంప్ ఔట్గా ప్రకటించారు అంపైర్లు. స్టంప్ అవుట్ అయిన తర్వాత క్లాసెన్ తీవ్ర ఆగ్రహం వ్యక్తం చేశాడు. పెవిలియన్కు వెళ్లే ముందు అతను నేరుగా సంజు శాంసన్ వద్దకు వెళ్లాడు. దీంతో వారి మధ్య తీవ్ర వాగ్వాదం మొదలైంది.
ప్రారంభంలో సాధారణంగానే అనిపించినప్పటికీ.. చూస్తుండగానే వారి హావభావాలు మారిపోయాయి. క్లాసెన్ ముందుకు వెళ్ళి మళ్ళీ వెనక్కి తిరిగి శాంసన్ వైపు రావడంతో గ్రౌండ్ లో వాతావరణం మరింత వేడెక్కింది. మ్యాచ్ కీలక దశలో ఉండటంతో అభిమానులు సైతం ఈ దృశ్యాన్ని చూసి ఆశ్చర్యపోయారు.
పరిస్థితి అదుపు తప్పుతుందని గమనించిన మైదానంలోని అంపైర్లు తక్షణమే రంగంలోకి దిగారు. మ్యాచ్ ఎలాంటి అంతరాయం లేకుండా సాగేందుకు సంజు శాంసన్ను ప్రశాంతంగా ఉండమని అంపైర్లు సూచించారు. అదే సమయంలో, చెన్నై సూపర్ కింగ్స్ ఆల్రౌండర్ శివమ్ దూబే హెన్రిచ్ క్లాసెన్ను శాంతింపజేసి, అతనిని పెవిలియన్కు పంపాడు. అనంతరం మ్యాచ్ తిరిగి యథావిధిగా ప్రారంభమైంది.
క్లాసెన్, సంజు శాంసన్ల మధ్య జరిగిన ఈ వాగ్వాదానికి సంబంధించిన వీడియో సోషల్ మీడియాలో వేగంగా వైరల్ అయ్యింది. అభిమానులు దీనిపై భిన్న రకాలైన అభిప్రాయాలను వ్యక్తం చేస్తున్నారు. కొందరు సంజు శాంసన్ వికెట్ కీపింగ్ నైపుణ్యాన్ని ప్రశంసించగా, మరికొందరు క్లాసెన్ ప్రదర్శించిన ఆగ్రహం గురించి చర్చించుకున్నారు.
Click it and Unblock the Notifications
Sign in with Google