గెలిచిన టీమ్ ట్రోఫీ తీసుకోకపోతే.. ఏం చేస్తారో తెలుసా..?
దుబాయ్ వేదికగా జరిగిన ఆసియా కప్ ఫైనల్ భారత్కు తొమ్మిదోసారి విజయాన్ని అందించింది. అయితే, మ్యాచ్ ఫలితం కంటే కూడా, విజయానంతరం జరిగిన ఒక ఊహించని సంఘటన ఇప్పుడు క్రీడా ప్రపంచంలో పెను సంచలనం సృష్టిస్తోంది. పాకిస్థాన్ను చిత్తు చేసి కప్ గెలిచిన భారత జట్టు కెప్టెన్, ఏసీసీ (ACC) అధ్యక్షుడు మొహ్సిన్ నఖ్వీ చేతుల మీదుగా ట్రోఫీని స్వీకరించడానికి నిరాకరించడం అభిమానులలో, విశ్లేషకుల్లో తీవ్ర గందరగోళానికి దారితీసింది.
కెప్టెన్ ట్రోఫీని తీసుకోవడానికి వెనుకాడటంతో, అక్కడ ఏం జరిగిందనే ప్రశ్న పెద్ద ఎత్తున తలెత్తింది. కొంతసేపటి తర్వాత నఖ్వీ స్వయంగా ట్రోఫీని తీసుకుని వెళ్లిపోయారు. మ్యాచ్ గెలిచిన జట్టు ట్రోఫీని అందుకోకపోయినా, దాని యజమాని మాత్రం ఆ జట్టు మాత్రమే. నిబంధనల ప్రకారం, ట్రోఫీని ఏ పరిస్థితుల్లోనూ రన్నరప్కు లేదా వేరే జట్టుకు అప్పగించరు. దీనిని సురక్షితంగా ఉంచే బాధ్యత టోర్నమెంట్ నిర్వాహకులపై ఉంటుంది. తర్వాత, అన్ని అడ్డంకులు తొలగిన తర్వాత గెలిచిన జట్టుకు అధికారికంగా అందజేస్తారు.
అయితే, ఇక్కడే అసలైన వివాదం మొదలవుతుంది. ఐసీసీ (ICC) నిబంధనల ప్రకారం, ట్రోఫీని నిరాకరించినందుకు తక్షణమే శిక్ష విధించాల్సిన అవసరం లేకపోయినా, ఈ చర్యను మాత్రం క్రీడా స్ఫూర్తిని ఉల్లంఘించినట్లుగా పరిగణిస్తారు.
భారత కెప్టెన్ ట్రోఫీని స్వీకరించడానికి ఎందుకు నిరాకరించారో లిఖితపూర్వకంగా లేదా మౌఖికంగా కారణాన్ని తెలియజేయాలి. ఈ మొత్తం సంఘటనపై ఐసీసీ, ఏసీసీ సంయుక్తంగా దర్యాప్తు చేసే అవకాశం ఉంది.
జరిగిన దానిపై బీసీసీఐ (BCCI) తమ నివేదికను ఐసీసీకి సమర్పించాల్సి ఉంటుంది. ఒకవేళ కెప్టెన్ చెప్పిన కారణం ఐసీసీ ప్రవర్తనా నియమావళిని ఉల్లంఘించే విధంగా ఉంటే, అది జట్టుకు లేదా కెప్టెన్కు ఇబ్బందికరంగా మారే అవకాశం ఉంది. ఉల్లంఘన జరిగినట్లు తేలితే, ఐసీసీ నిబంధనల మేరకు జరిమానా విధించవచ్చు లేదా ఇతర చర్యలు తీసుకోవచ్చు.
Click it and Unblock the Notifications
Sign in with Google