కేంద్రమంత్రి పదవిపై కన్ను!

హైదరాబాద్: ఒక్క ఓటుతోనైనా అనకాపల్లి నుంచి ఎంపీగా నెగ్గుతానని ఆమధ్య అల్లు అరవింద్ ఒక ప్రకటన చేశారు. ప్రజారాజ్యం ఒక సినిమా అనుకుంటే దాని నిర్మాత అల్లు అరవిందే. ఎన్నికల్లో పోటీ చేయకుండా హైదరాబాద్ లోని పార్టీ కేంద్ర కార్యాలయంలో కూర్చుని చక్రం తిప్పాలని మొదట అరవింద్ అనుకున్నా ఆ తర్వాత ఆయన మనసు మారిపోయింది. ఎంపీగా పోటీ చేయాలని నిర్ణయించుకుని, ప్రజారాజ్యానికి ఎంతో అనుకూలంగా ఉన్న అనకాపల్లిని ఎంచుకున్నారు. అక్కడ ఆయన గెలుపు సులభమని నివేదికలు వచ్చాయి. బావగారైన చిరంజీవిని ముఖ్యమంత్రిని చేసి, ఆయన కళ్ళల్లో ఆనందాన్ని చూడాలనుకుంటున్నారు అరవింద్. అయితే చిరంజీవి ముఖ్యమంత్రి కావడం కష్టంగా పరిణమించింది. కానీ అల్లు అరవింద్ కేంద్రమంత్రి కావడం సులభంగా కనిపిస్తోంది. మొత్తమ్మీద ప్రజారాజ్యం పార్టీకి ఐదారు లోక్ సభ స్ధానాలు వచ్చే అవకాశముందని ఒక అంచనా. కేంద్రంలో కూడా హంగ్ వచ్చే అవకాశమున్నందున ఐదు ఎంపీ సీట్లు ఉన్న పార్టీ మద్దతు కీలకం కాబోతోంది. కేంద్రంలో ఎన్డీఏ కూటమికి కాకుండా మరే కూటమికైనా ప్రజారాజ్యం మద్దతు ఇచ్చే అవకాశాలు కనిపిస్తున్నాయి. నాలుగో ఫ్రంట్ గురించి చిరంజీవి మాట్లాడుతున్నారు.

తమకొచ్చే ఐదారు స్ధానాలతో తనకు కేంద్రమంత్రి పదవి వచ్చేలా చూసుకోవాలని అల్లు అరవింద్ టార్గెట్ పెట్టుకున్నారు. ఆరేడు స్ధానాలు వస్తాయని భావిస్తున్న టీఅర్ ఎస్ ఎన్డీయేకు మద్దతు ఇచ్చే దిశగా అడుగులు వేస్తోంది. కేంద్రంలో సహాయ మంత్రి కాకుండా కేబినెట్ మంత్రి పదవి చేపట్టాలని అరవింద్ ఉవ్విళ్ళూరుతున్నారు. కేంద్ర మంత్రి పదవి చేపట్టినా నిర్మాతగా కొనసాగాలని అరవింద్ ఆకాంక్ష. బినామీలను పెట్టి సినిమా నిర్మాణరంగంలో ఆయన కొనసాగవచ్చు.

ఎన్నికల తర్వాత పవన్ కల్యాణ్ పుణె వెళ్ళి విశ్రాంతి తీసుకుంటున్నారు. పార్టీలో అల్లు అరవింద్ డామినేషన్ ఎక్కువ కావడం పవన్ కు ఇష్టం లేదని చెబుతున్నారు. కానీ ఏమైనా అంటే అన్నయ్య బాధపడతాడేమోనని ఆయన తనలో తానే మధన పడుతున్నారు. ఆయన ఎన్నికల ఫలితాలకు ఒకరోజు ముందు హైదరాబాద్ కు తిరిగి వస్తారు. పార్టీ నిర్మాణంలో కీలక పాత్ర వహించిన నాగబాబు ఇప్పుడు ఏం చేస్తున్నారో ఎవరికీ తెలియడం లేదు. కేంద్రంలోనూ, రాష్ట్రంలోనూ ప్రజారాజ్యం తరఫున అల్లు అరవిందే చక్రం తిప్పనున్నారు.