ఎన్టీఆర్- లక్ష్మీ పార్వతి ప్రేమపై హరికథలు!

హైదరాబాద్: ఎన్టీఆర్ రెండో భార్య లక్ష్మీపార్వతికి నిన్న టీవీ చానళ్ల నుంచి గొప్ప డిమాండ్ వచ్చి పడింది. ఎన్టీఆర్ ఘాట్ లో వర్ధంతి సందర్భంగా ఉదయం ఆమె నివాళి ఘటించిన తర్వాత ఆమె ఒకదాని తర్వాత మరో చానల్ కు పరుగులు తీసి తన ప్రేమ కథను పంచుకున్నారు. గతంలో హరికథలు చెప్పిన అనుభవం ఉందేమో ఆమె విసుగూ విరామం లేకుండా ఎన్టీఆర్ తో రోమాన్స్ విషయాలను ప్రేక్షకులకు వివరించారు. తాను, ఎన్టీఆర్ ఎన్నో కబుర్లు చెప్పుకునేవాళ్ళమని, మూడు పూటలా మూడు రకాలైన టాపిక్స్ ఉండేవని బుగ్గలు సిగ్గుతో ముడుచుకుపోతుండగా ఆమె చెప్పారు. తెల్లవారుజామున మాత్రం తప్పనిసరిగా ఆధ్యాత్మిక విషయాలే ఉండేవని చెప్పారు. మిగితా రెండు పూటలా ముఖ్యంగా రాత్రి పూట ఏ టాపిక్స్ ఉండేవో ఆమె చెప్పకనే చెప్పారు. ఆమెతో ఈ విషయాలను చెప్పిస్తూ ఒక సీరియల్ ను కూడా ఇప్పటికి కొన్ని చానల్స్ ప్లాన్ చేసుకుని ఉంటాయి.

ఎన్టీవీ, ఐ న్యూస్ ఆమె అనుభవాలను చక్కగా ప్రేక్షకులకు అందించాయి. 1985లో ఉపేంద్ర తనను ఎన్టీఆర్ కు పరిచయం చేసినప్పటి నుంచి ఎన్టీఆర్ అంటే ప్రేమభావం పెరిగిపోయిందని ఆమె చెప్పుకొచ్చారు. అప్పటికి ఆమె తన తొలి భర్త వీరగంధం వెంకట సుబ్బారావుతో కాపురం చేసుకుంటున్నారు. 1994లో మొదటి భర్తకు విడాకులు ఇచ్చిన తర్వాతే ఆమెను ఎన్టీఆర్ పెళ్ళి చేసుకోగలిగారు. స్త్రీ పురుష సంబంధాల గురించి లక్ష్మీ పార్వతికి మంచి స్పష్టత ఉంది. పడకగదిలో మంచం మీద స్త్రీ పురుషులు ఎలా శయనించాలి, ఎటువంటి మాటలు మాట్లాడుకోవాలి అన్న విషయాలను గతంలో ఆమె ఒక పత్రికలో వ్యాసంగా రాశారు.

ఎన్టీఆర్ మరణానంతరం జరిగిన సంఘటనలపైన, లక్ష్మీపార్వతి మీద వచ్చిన ఆరోపణల మీద ఈ చానల్స్ ఫోకస్ చేయలేదు. వారి పరిధి రాజకీయాలకు, ఎన్టీఆర్ - లక్ష్మీపార్వతి రోమాన్స్ కే పరిమితమయ్యాయి. ఎన్టీఆర్ మరణానంతరం విలువైన వజ్రాలను, బంగారాన్ని, నగదును లక్ష్మీపార్వతికి సన్నిహితులైన నాయకులు దాచిపెట్టడానికి తీసుకెళ్లారన్న ఆరోపణలు వచ్చాయి. అసలు ఎన్టీఆర్ ఆకస్మిక మరణం మీద కూడా భిన్న కథనాలు వచ్చాయి. లక్ష్మీపార్వతి ఆయన మరణ ఉదంతంపై చెప్పిన విషయాలు ఒకదానికొకటి పొంతన లేకుండా ఉండడం కూడా అనుమానాలకు తావిచ్చింది.

ఎన్టీఆర్ జీవిత చరిత్ర రాస్తానంటూ ఆయన జీవిత భాగస్వామి అయిన లక్ష్మీపార్వతి ఎన్టీఆర్ గురించి ఎన్నో మంచి విషయాలు కూడా చెప్పారు. పైకి ఎంతో గంభీరంగా కన్పించినా ఆయన మనసు వెన్న వంటిదని ఆమె చెప్పారు. చంద్రబాబు నాయుడు ఆయనను వెన్నుపోటు పొడవకపోతే ఇప్పటివరకు బతికిఉండేవారని చెప్పారు.