ఒబామా రోజు ఖర్చు రూ. 900 కోట్లు

అమెరికా అధ్యక్షుడు 6వ తారీకునుండి 9 వరకు భారత్ లో పర్యటిస్తున్న విషయం తెలిసిందే. అయితే ఆయన భారత పర్యటన ఖర్చు ఎంతో తెలుసా అక్షరాలా 3600 కోట్ల రూపాయలు. ఒక్కరోజు ఖర్చు 900 కోట్ల రూపాయలు. అమెరికా అధ్యక్షుల విదేశీ పర్యటన నిమిత్తం ఖర్చు పెట్టిన అతి పెద్ద మొత్తం ఒబామాదే కావటం, ఆదీ మన భారత్ పైనే కావడం విశేషం. ఒబామా పర్యటనలో ఆయనతో పాటు 100 మంది విలేకరులు, 200 వ్యాపారవేత్తలు, భద్రత కోసం సీక్రెట్ ఏజెంట్స్ తో పాటు వైట్ హవుస్ భద్రతా దళాలు కూడా వస్తున్నాయి. వ్యాపార వేత్తల్లో భారత్ కు చెందిన పెప్సీ అధినేత ఇంద్రనూయి కూడా ఉంది. వైట్ హవుస్ ప్రతినిధులు ఇప్పటికే భారత్ కు ప్రత్యేక విమానంలో వచ్చారు. వారు ఒబామా కంటే ముందు వచ్చి అన్ని కార్యక్రమాలు చూసుకుంటున్నారు. భద్రత కోసం అమెరికా ఇప్పటికే ముంబయి సముద్రంలో ఓ రక్షణ నౌకను ఉంచింది.

అయితే ఒబామా పర్యటనకు అమెరికా అంత భారీ ఖర్చు చేస్తున్నప్పటికీ భారత్, మహారాష్ట్రలు గట్టి భద్రతతో పాటు భారీ ఖర్చు చేస్తోంది. ఇప్పటికై ముంబయి పరిసర ప్రాంతాల్లో గట్టి భద్రతను ఏర్పాటు చేసింది. ముంబయి సముద్రతీరంలో గస్తీ నౌకలను నిలిపింది. ముంబయి విమానాశ్రయంలో ఒబామా దిగిన తర్వాత రోడ్డు మార్గంలో కాకుండా హెలికాప్టర్లో వచ్చేలా చర్యలు చేపట్టింది. ఒబామా బస చేయనున్న తాజ్ హోటల్ కు రెండురోజుల ముందునుండే అన్ని రహదారులు మూసివేశారు. రహదారులు, పరిసర ప్రాంతాలన్నింటినీ క్షుణ్ణంగా పరీక్షించింది.

ఒబామా ఉగ్రవాదులకు హెచ్చరికగా వారు దాడి చేసిన తాజ్ హోటల్లోనే బస చేయనున్నారు. ఆ తర్వాత శనివారం హోలీహోమ్ పాఠశాలలో దీపావళి వేడుకల్లో పాల్గొంటారు. ఆరు, ఏడు తేదీల్లో ఒబామా ముంబైలో ఉంటారు. ముంబై ఉగ్రవాద దాడుల బాధితులను ఆయన పరామర్శిస్తారు. ఏడవ తేదీన ఆయన ఢిల్లీ వెళ్తారు. ఆయన రాష్ట్రపతి ప్రతిభా పాటిల్, ప్రధాని మన్మోహన్ సింగ్, యుపిఎ చైర్ పర్సన్ సోనియా గాంధీలతో, కేంద్ర మంత్రులతో సమావేశమవుతారు. నెల రోజుల పాటు ఆయన ఆసియా దేశాల్లో పర్యటిస్తున్నారు. ఆయితే, పాకిస్తాన్ ను మాత్రం ఆయన సందర్శించడం లేదు. దీంతో పాకిస్తాన్ ప్రభుత్వం ఒబామాపై గుర్రుగా ఉంది.