భాను బినామీగా యాంకర్ శ్వేతారెడ్డి

మద్దెలచెర్వు సూరి హత్య కేసులో నిందితుడు భాను కిరణ్‌తో సంబంధాలున్న టీవీ న్యూస్ చానెల్ యాంకర్ పేరు బయటకు వచ్చింది. ఓ న్యూస్ టీవీ చానెల్‌లో యాంకర్‌గా పనిచేస్తున్న శ్వేతారెడ్డి సూరికి బినామీగా వ్యవహిరించినట్లు పోలీసులు గుర్తించారని సమాచారం. ఈ మేరకు ఓ ప్రముఖ తెలుగు టీవీ చానెల్‌లో వార్తాకథనం ప్రసారమైంది. శ్వేతారెడ్డి ఫొటోను కూడా ఆ టీవీ చానెల్ చూపించింది. శ్వేతారెడ్డి పేర భాను కిరణ్ హైదరాబాదు, అనంతపురం జిల్లాల్లో ఆస్తులను పెట్టినట్లు పోలీసులు గుర్తించినట్లు తెలుస్తోంది. శ్వేతారెడ్డిని పోలీసులు విచారించినట్లు కూడా ఆ న్యూస్ చానెల్ తెలిపింది.

హైదరాబాదులోని స్కిన్ టచ్ అనే సంస్థలో శ్వేతారెడ్డి పేర భాను కిరణ్ నాలుగు కోట్ల రూపాయల పెట్టుబడి పెట్టినట్లు వార్త ప్రసారమైంది. అలాగే, హైదరాబాదులోని ఫిల్మ్ నగర్‌లోనూ శ్వేతారెడ్డి పేర భాను పెట్టుబడులు పెట్టినట్లు తెలుస్తోంది. ఓ సినీ నిర్మాత ద్వారా భాను కిరణ్ శ్వేతా రెడ్డికి పరిచయమైనట్లు తెలుస్తోంది. ఆ పరిచయం ఆమె పేరు మీద భాను కిరణ్ పెట్టుబడులు పెట్టేదాకా ముదిరినట్లు చెబుతున్నారు. అయితే, తనను పరిచయం చేసిన నిర్మాతనే భాను ద్వారా శ్వేతారెడ్డి చావచితకకొట్టించినట్లు కూడా వార్తలు వస్తున్నాయి.

మహబూబ్‌ నగర్ జిల్లాలోని ఓ ఎన్నారై మహిళ భూమిని టీవీ యాంకర్ పేర రిజిస్ట్రేషన్ చేయించడానికి భాను గ్యాంగ్ ప్రయత్నించినట్లు ఇటీవల వార్తలు వచ్చిన విషయం తెలిసిందే. భాను కిరణ్ భూదందాలపై పోలీసులు విస్తృతంగా సమాచారం సేకరిస్తున్నారు.