దాసరికి మొండిచేయి, చిరంజీవికి సీటు

మెగాస్టార్ చిరంజీవి కాంగ్రెసు పార్టీలో చేరడంతో ప్రముఖ దర్శక, నిర్మాత దాసరి నారాయణ రావు జాతకం మారినట్లు కనిపిస్తోంది. కాంగ్రెసు పార్టీలో దాసరి నారాయణ రావు ప్రాబల్యం తగ్గినట్లు భావిస్తున్నారు. కేంద్ర మంత్రి వర్గం నుంచి తప్పుకున్న తర్వాత దాసరి నారాయణ రావు రాజకీయాలపై తీవ్ర అసంతృప్తి వ్యక్తం చేశారు. అప్పటి నుంచే ఆయన కాంగ్రెసు కార్యకలాపాల్లో గతంలో మాదిరిగా చురుగ్గా పాల్గొనడం లేదు. సినిమాలపై దృష్టి సారిస్తున్నారు. చిరంజీవి కాంగ్రెసు పార్టీలో చురుగ్గా పాల్గొనేందుకు సిద్ధపడినట్లు కనిపిస్తున్నారు.

చిరంజీవిని దాసరి నారాయణరావు స్థానంలో రాజ్యసభకు ఎన్నిక చేయించి, కేంద్రంలో మంత్రి పదవి ఇస్తారనే ప్రచారం ఒకటి ఈ మధ్య జరుగుతోంది. రాష్ట్రం నుంచి వచ్చే ఏడాది రెండు రాజ్యసభ సీట్లు ఖాళీ అవుతున్నాయి. కె. కేశవరావు, దాసరి నారాయణ రావు పదవీకాలం ముగుస్తోంది. అయితే, వీరిద్దరికి కూడా మళ్లీ టికెట్లు లభించకపోవచ్చునని అంటున్నారు. కేశవ రావు స్థానంలో పిసిసి మాజీ అధ్యక్షుడు డి. శ్రీనివాస్‌ను, దాసరి నారాయణరావు స్థానంలో చిరంజీవిని రాజ్యసభకు ఎంపిక చేయవచ్చునని అంటున్నారు. వారిద్దరి స్థానంలో వీరిద్దరిని ఎంపిక చేయడం వల్ల సామాజిక వర్గంలో కూడా మార్పు ఉండదు. అందువల్ల ఎంపిక విషయంలో ఇబ్బంది ఏర్పడే అవకాశం లేదు.

దాసరి నారాయణరావు కాంగ్రెసు పరిణామాల పట్ల తీవ్ర అసంతృప్తితో ఉన్నట్లు తెలుస్తోంది. చిరంజీవి మాత్రం వచ్చే ఎన్నికల ద్వారా ముఖ్యమంత్రి పీఠం దక్కించుకోవాలనే ఆశతో ఉన్నారు. ఈలోగా రాజ్యసభ సభ్యుడిగా ఎంపికై కేంద్ర మంత్రి పదవిని కూడా ఆయన నిర్వహించేందుకు ఏర్పాట్లు జరుగుతున్నట్లు తెలుస్తోంది.

English summary

It is said that Chiranjeevi may be elected to Rajyasabha next year in the place of Dasari Narayana Rao.