చిరంజీవి ఊహించిందొకటి జరుగుచున్నదొక్కటి?

By Srinivas

Published: Sunday, December 18, 2011, 11:17 [IST]

తిరుపతి శాసనసభ్యుడు చిరంజీవి కాంగ్రెసు పార్టీలో తాను ఊహించినదానికి భిన్నంగా జరుగుతున్నట్లుగా భావిస్తున్నారేమో! తన ప్రజారాజ్యం పార్టీని విలీనం చేయడానికి ముందు తనకు, తన ఎమ్మెల్యేలకు కాంగ్రెసు పార్టీ చాలా ప్రాధాన్యత ఇస్తుందని భావించారు. కానీ పార్టీని విలీనం చేశాక కాంగ్రెసు అధిష్టానం చిరు క్యాడర్ పట్ల నిర్లక్ష్యం చేస్తున్నట్లుగానే కనిపిస్తోంది. విలీనం జరిగి నెలలు గడుస్తున్నా కనీసం చిరంజీవికి ఓ పదవిని ఇవ్వలేని పరిస్థితుల్లో అధిష్టానం ఉండటం విశేషం. అదిగో కేంద్ర మంత్రి పదవి, ఇదిగో కేంద్రమంత్రి పదవి అని ఊహాగానాలు విపరీతంగా వినిపిస్తున్నాయే కానీ స్పష్టత మాత్రం ఇంత వరకు రాలేదు. రాష్ట్రంలో చిరుకు ఉన్న ఇమేజ్, ఆయనతో పాటు ఉన్న పదిహేడు మంది ఎమ్మెల్యేలు తదితరాలను చూసి కాంగ్రెసు చిరుకు సాధ్యమైనంత తొందరగా సముచితమైన స్థానం కల్పిస్తుందని ఆయన వర్గం భావించింది.

ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ, ముఖ్యమంత్రి కిరణ్ కుమార్ రెడ్డి ఎవరు మాట్లాడినా చిరంజీవికి పార్టీలో మంచి ప్రాధాన్యత ఉంటుందని పల్లె వేస్తున్నారు. కాని అది ఎప్పుడో మాత్రం ఎవరూ చెప్పలేక పోతున్నారు. అవిశ్వాసం సమయంలో చిరు వర్గం అలకపాన్పు ఎక్కినప్పుడు కేంద్రమంత్రులు ఫోన్లు చేసి మరీ పిఆర్పీకి ప్రాధాన్యత ఇస్తామని హామీ ఇచ్చారు. కాని నిన్నగాక మొన్న యుపిఏలో చేరిన అజిత్ సింగ్‌కు కేబినెట్లో చోటు కల్పించిన కేంద్రం, కిరణ్ కుమార్ రెడ్డి ప్రభుత్వాన్ని అదుకున్నందుకు చిరంజీవికి ఇచ్చింది మాత్రం హామీలు మాత్రమే. విలీనం భేషరతుగా జరిగిందని ఇరువర్గాలు చెప్పుకున్నప్పటికీ రాజకీయ లబ్ధి ఆశించకుండా పిఆర్పీ విలీనమైందంటే హాస్యాస్పదం. చిరంజీవి లక్ష్యమేంటో అందరికీ తెలుసు.

తన లక్ష్యమిప్పుడప్పుడే నెరవేరదని చిరుకు తెలుసు. అందుకు ఆయన 2014 ఎన్నికలను టార్గెట్ పెట్టుకున్నారు. అది వేరే విషయం. ప్రతిపక్షాలు ప్రభుత్వాన్ని పడగొడతానని సవాల్ విసిరినప్పుడు నేను నిలబెడతానని ప్రతి సవాల్ విసిరి
రాష్ట్రంలో కాంగ్రెసుకు అధికారాన్ని కాపాడిన చిరుకు ఆయన వర్గానికి ఇప్పటి వరకు దక్కింది మాత్రం ఏంలేదనే చెప్పవచ్చు. ఇన్నాళ్లు తెలంగాణ, జగన్ సమస్యలు చెప్పి చిరును పక్కన పెట్టారు. తీరా ఆ సమస్యలు తీరిపోయాక తాజాగా సొంత పార్టీ ఎంపీలు సీనియారిటీ పేరుతో ఆయనకు చెక్ పెడుతున్నట్లుగా ప్రచారం జరుగుతోంది. విలీనానికి ముందు అధిక ప్రాధాన్యత ఇచ్చిన కాంగ్రెసు ఇప్పుడు తమ పట్ల నిర్లక్ష్యంగా వ్యవహరిస్తుందనే భావన చిరు వర్గంలోనూ కనిపిస్తోంది. మరి పది నెలలుగా పదవుల కోసం ఎదురు చూస్తున్న చిరుకు, చిరు వర్గానికి అధిష్టానం ప్రాధాన్యత ఎప్పుడు ఇస్తుందో చూడాలి.

Published On December 18, 2011