భానుమతి రాజకీయ కోణం?

హత్యకు గురైన మద్దెలచెర్వు సూరి భార్య గంగుల భానుమతి రాజకీయాల్లో క్రియాశీలక పాత్ర పోషించే అవకాశాలు కనిపిస్తున్నాయి. తాను రాజకీయాల్లో చురుగ్గా పాల్గొంటానని ఆమె ఇదివరకే స్పష్టం చేశారు. ఆమె శుక్రవారం చేసిన ప్రకటన వెనక స్పష్టమైన రాజకీయ కోణం ఉందనే అభిప్రాయం వ్యక్తమవుతోంది. ఆమె వైయస్ జగన్ పార్టీలో గానీ, కాంగ్రెసులో గానీ చేరాలని నిర్ణయించుకున్నట్లు తెలుస్తోంది. వైయస్ జగన్ వీలు కాదంటే, కాంగ్రెసులో చేరేందుకు ఆమె రంగం సిద్ధం చేసుకుంటున్నారని అంటున్నారు. అందుకే, తన భర్త సూరి హత్య కేసులో కాంగ్రెసుపై గానీ వైయస్ జగన్‌పై గానీ ఆరోపణలు రాకుండా చూసుకుంటున్నట్లు చెబుతున్నారు. ఫాక్షన్ ప్రత్యర్థి పరిటాల కుటుంబం తెలుగుదేశం పార్టీలో ఉండడంతో ఆమెకు అందులో అవకాశాలు లేవు. ఆమె కాంగ్రెసులో గానీ వైయస్ జగన్ పార్టీలో గానీ ఉండాలి. అందువల్ల సూరి హత్యపై ఆమె తెలుగుదేశం నాయకులను టార్గెట్ చేసే ప్రయత్నం చేస్తున్నారు.

సూరి హత్య వెనక వైయస్ జగన్ పాత్ర ఉందనే రీతిలో ఎబిఎన్ ఆంధ్రజ్యోతి వార్తాకథనం రావడంతో గంగుల భానుమతి దానికి వ్యతిరేకంగా కేసును మలుపు తిప్పేందుకు సిద్ధపడినట్లు తెలుస్తోంది. అందుకే సూరి హత్యతో జగన్ బంధువులకు, మంగలి కృష్ణకు సంబంధాలు లేవని ఆమె స్పష్టం చేశారని అంటున్నారు. అదే సమయంలో తెలుగుదేశం పార్టీ అధ్యక్షుడు నారా చంద్రబాబు నాయుడిపై ఆమె ఆరోపణలు చేశారు. తెలుగుదేశం నాయకుడు వల్లభనేని వంశీ, పరిటాల కుమారుడు శ్రీరాములులపై ఆమె అనుమానాలు వ్యక్తం చేశారు. వల్లభనేని వంశీ పరిటాల రవి అనుచరుడనే విషయం అందరికీ తెలిసిందే. అందువల్ల ఫాక్షన్ రంగును భానుమతి సూరి హత్యకు పులుముతున్నారు.

అనంతపురం జిల్లా రాజకీయాల్లో ఆమె క్రియాశీలక పాత్ర పోషించేందుకు గంగుల భానుమతి పునాదులు ఏర్పరచుకోవడంలో నిమగ్నమైనట్లు చెబుతున్నారు. ఈ స్థితిలోనే తన భర్త హత్యకు ఆమె రాజకీయ మలుపు ఇచ్చారని చెబుతున్నారు.