చిరు వర్గం నేతకు భవానీ నజరానా

ప్రజారాజ్యం పార్టీని కాంగ్రెసులో విలీనం చేయడం వెనక ప్రధాన పాత్ర పోషించిన చిరంజీవి వర్గానికి చెందిన శాసనసభ్యుడు గంటా శ్రీనివాస రావు రుణం తీర్చుకోవడానికి రాష్ట్ర ప్రభుత్వం పెద్ద నజారాననే కట్టబెట్టింది. ఓ ప్రముఖ ఆంగ్ల దినపత్రికలో ఇందుకు సంబంధించిన వార్తాకథనం ప్రచురితమైంది. దీంతో తీవ్ర నిరసనలు వ్యక్తమవుతున్నాయి. గంటా శ్రీనివాస రావు కంపెనీకి అత్యంత ప్రతిష్టాత్మకమైన భవానీ ద్వీపం ఐలాండ్ పర్యాటక ప్రాజెక్టును అప్పగించినట్లు తెలుస్తోంది. బహిరంగ టెండర్ల ద్వారానే ప్రక్రియను పూర్తి చేసినప్పటికీ అది శ్రీనివాస రావు కంపెనీ చేతి నుంచి జారిపోకుండా జాగ్రత్తలు తీసుకున్నట్లు ఆ పత్రిక రాసింది. భవానీ ఐలాండ్‌తో పాటు ఇతర పర్యాటక ప్రాజెక్టులను ప్రైవేట్ పరం చేయడానికి ఏడాది క్రితమే పిలిచారు. కానీ వాటిని ప్రజారాజ్యం కాంగ్రెసులో విలీనం చేసిన తర్వాత ఖరారు చేశారు.

కృష్ణానదీ తీరంపై ఉన్న 111 ఎకరాల భవానీ ద్వీపం భూములు పర్యాటకంగా అత్యంత విశిష్టమైనవి. ప్రభుత్వానికి ఆదాయాన్ని కూడా తెచ్చి పెడుతున్నాయి. ప్రభుత్వ, ప్రైవేట్ భాగస్వామ్యం కింద 33 ఏళ్లకు ఆ భూములను లీజుకు ఇవ్వడానికి ప్రభుత్వం నిర్ణయించింది. రైట్ ఆఫ్ ఫస్ట్ రెఫ్యూజల్ కింద మరో 25 ఏళ్లు పొడగించడానికి కూడా అవకాశం ఉంది. అంటే, దాదాపు దాని యాజమాన్యాన్ని గంటా కంపెనీకి కట్టబెట్టడమేనని ఆ ఆంగ్ల దినపత్రిక వ్యాఖ్యానించింది. భవానీ ఐలాండ్ భూముల విలువ ఎకరానికి 4 కోట్ల రూపాయల చొప్పున 400 కోట్ల రూపాయలకు పైగా ఉంటుందని అంచనా. అయితే, ప్రభుత్వం దాని విలువను రూ. 20 కోట్లకే అంచనా వేసింది. దాన్ని లెక్కలోకి తీసుకుని కేవలం 1.11 కోట్ల లీజును నిర్ణయించింది. అంటే భూమి మొత్తం విలువలో అది కేవలం ఐదు శాతం మాత్రమే.

ఆంగ్లదినపత్రిక కథనం ప్రకారం - భవానీ ఐలాండ్‌లో 24 కాటేజీలు, రెండు రెస్టారెంట్లు, ఓ కాన్ఫరెన్స్ హాల్, మూడు ట్రీ - టాప్ కాటేజీలు ఉన్నాయి. బోటింగ్ జెట్టీలు, ఓపెన్ ఎయిర్ థియేటర్ కూడా ఉన్నాయి. వారాంతాల్లో, సెలవు రోజుల్లో పెద్ద యెత్తున పర్యాటకులు వస్తుంటారు. భవానీ ఐలాండ్ నుంచి ప్రభుత్వానికి ఏడాదికి రెండు కోట్ల రూపాయల ఆదాయం వస్తోంది. మరింత మంది పర్యాటకులను ఆకర్షించడానికి ప్రభుత్వం దానిపై ఆదాయంలో పది శాతాన్ని కూడా ఖర్చు చేయడం లేదు. ప్రభుత్వ నిర్ణయంపై పర్యాటక శాఖ ఉద్యోగులు తీవ్ర అభ్యంతరం తెలియజేస్తున్నారు.

English summary

According to a new report - In what could be a virtual gift to Chiranjeevi's chief aide and senior legislator Ganta Srinivas Rao for helping the merger of Prajarajyam Party into the Congress, the state government has almost handed over the prestigious Bhavani Island tourism project for development purposes to his firm.