జూ ఎన్టీఆర్‌కు బాలయ్య కౌంటర్

By Pratap

Published: Tuesday, August 30, 2011, 13:18 [IST]

తాత స్వర్గీయ ఎన్టీ రామారావు వారసత్వాన్ని అందిపుచ్చుకోవాలని తాపత్రయ పడుతున్న జూనియర్ ఎన్టీఆర్‌కు బాబాయ్ బాలకృష్ణ కౌంటర్ ఇస్తున్నట్లే కనిపిస్తోంది. నటనలో ఎన్టీ రామారావు వారసత్వాన్ని అందుకుని రాజకీయ వారసత్వ పోరుకు సిద్ధం కావాలనే జూనియర్ ఎన్టీఆర్ ఆశలను వమ్ము చేసే దిశగా బాలకృష్ణ అడుగులు వేస్తున్నట్లు కనిపిస్తోంది. పౌరాణిక పాత్రలకు పెట్టింది పేరైన ఎన్టీ రామారావును తలపించే విధంగా బాలకృష్ణ వరుసగా పౌరాణిక సినిమాల్లో నటించాలనే ఉద్దేశంతో ఉన్నట్లు తెలుస్తోంది. బాపు దర్సకత్వం వహించిన శ్రీరామరాజ్యం ద్వారా దాన్ని వేగవంతం చేసే పనిలో పడినట్లు చెబుతున్నారు. శ్రీరామరాజ్యం సినిమాకు చెందిన బాలయ్య రాముడి స్టిల్ ఒక్కటి మాత్రమే బయటపడింది. అది అచ్చం ఎన్టీ రామారావు రాముడి వేషాన్ని తలపిస్తోంది.

లవకుశ సినిమాలో ఎన్టీ రామారావు పాత్రను క్షణక్షణం గుర్తు చేసేలా ఉంటేనే శ్రీరామరాజ్యం పూర్తిగా కొత్త సినిమాలా రూపుదిద్దుకున్నట్లు తెలుస్తోంది. జూనియర్ ఎన్టీఆర్ పౌరాణిక సినిమాల్లో అడుగు పెట్టే సరికే తనకంటూ ప్రత్యేకమైన ఇమేజ్‌ను సంపాదించుకుని స్వర్గీయ ఎన్టీ రామారావు వారసుడిగా పిలిపించుకోవాలని బాలకృష్ణ భావిస్తున్నట్లు సమాచారం. మాస్ మసాలా సినిమాలు చేస్తూనే మధ్య మధ్యలో తనకు ఇష్టమైన, తన తండ్రిని తలపించే పౌరాణిక సినిమాలు చేయాలని ఆయన అనుకుంటున్నట్లు తెలుస్తోంది.

తన ప్రణాళికకు అనుగుణంగా బాలకృష్ణ వద్ద కొన్ని డ్రీమ్ ప్రాజెక్టులు కూడా ఉన్నట్లు చెబుతున్నారు. అందులో నర్తనశాల సినిమా ఒక్కటి. చాలా రోజుల క్రితమే దీన్ని తలపెట్టినప్పటికీ ఎప్పటికప్పుడు ముహూర్త బలం సరిపోవడం లేదు. నర్తనశాలలో ఉత్తరకు నృత్యం నేర్పే సన్నివేశంలో ఎన్టీ రామారావు బృహన్నలగా నటించిన సన్నివేశం ప్రేక్షకులకు ఇప్పటికీ గుర్తుంటుంది. నర్తనశాల సినిమాను స్వీయ దర్శకత్వంలో నిర్మించాలని బాలయ్య అనుకుంటున్నట్లు ప్రచారం జరుగుతోంది. సినీరంగంలో ఎన్టీ రామారావు వారసుడిగా ముద్ర వేయించుకుని తెలుగుదేశం పార్టీకి తన వంతు సాయం అందిస్తూ జూనియర్ ఎన్టీఆర్ వారసత్వ కోరికను దెబ్బ తీయాలని ఆయన అనుకుంటున్నట్లు చెబుతున్నారు.

Published On August 30, 2011