లగడపాటి ఎందుకు దూరంగా ఉన్నారు?

విజయవాడలో జరిగిన సమైక్యాంధ్ర రౌండ్ టేబుల్ సమావేశానికి కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ ఎందుకు దూరంగా ఉన్నారనేది ఆసక్తికరంగా మారింది. సీమాంధ్ర కాంగ్రెసు ప్రజాప్రతినిధుల రౌండ్ టేబుల్ సమావేశం శనివారం విజయవాడలో జరిగింది. తన నియోజకవర్గ పరిధిలో ఏర్పాటైన సమైక్యాంధ్ర సమావేశానికి ఆయన హాజరు కాలేదు. నిజానికి, సమైక్యాంధ్రను కోరుతున్న కాంగ్రెసు పార్లమెంటు సభ్యులంతా దానికి దూరంగానే ఉన్నారు. లగడపాటి రాజగోపాల్ సమైక్యాంధ్ర కోసం మొదటి నుంచీ ఒంటరిగానే పోరాటం చేస్తున్నారు. తెలంగాణ రాష్ట్ర ఏర్పాటుకు ప్రక్రియ ప్రారంభమైందని 2009 డిసెంబర్ 9వ తేదీన కేంద్ర హోం మంత్రి పి. చిదంబరం ప్రకటన చేసిన తర్వాత తొలుత రాజీనామా చేసిన నాయకుడు లగడపాటి రాజగోపాలే కావడం విశేషం.

విజయవాడలో ఏర్పాటైన రౌండ్ టేబుల్ సమావేశానికి చాలా మంది ప్రజాప్రతినిధులు దూరంగా ఉన్నారు. కేంద్రం తెలంగాణకు అనుకూలంగా నిర్ణయం తీసుకోదనే ధీమా వల్లనా, పార్టీ అధిష్టానం నిర్ణయానికి కట్టుబడి ఉండాలనే నిర్ణయం వల్లనా అనేది అర్థం కావడం లేదు. మంత్రి డిఎల్ రవీంద్రారెడ్డి వంటి వారు తాము పార్టీ అధిష్టానం నిర్ణయానికి కట్టుబడి ఉంటామని ఇప్పటికే ప్రకటించారు. శనివారంనాడు డిఎల్ రవీంద్రా రెడ్డి అదే మాట అన్నారు. అంటే, సీమాంధ్ర కాంగ్రెసు ప్రజాప్రతినిధుల్లో ఈ విధమైన మార్పు వచ్చిందా అనేది కూడా చర్చనీయాంశంగానే మారింది.

ఉత్తరాంధ్రకు చెందిన మూడు జిల్లాల నుంచి కేవలం ఒక శాసనసభ్యుడు మాత్రమే రౌండ్ టేబుల్ సమావేశానికి హాజరయ్యారు. ఉత్తరాంధ్రలోని విజయనగరం, శ్రీకాకుళం, విశాఖపట్నం జిల్లాల నుంచి కాంగ్రెసు, ప్రజారాజ్యం శాసనసభ్యులు కలిపి 27 మంది ఉన్నారు. వారంతా హాజరు కాకపోపడంపై సమైక్యాంధ్ర జెఎసి భగ్గుమంటోంది. వారి ఇళ్లను ముట్టడిస్తామని హెచ్చరిస్తోంది. పిసిసి అధ్యక్షుడిగా బొత్స సత్యనారాయణ నియమితులైన తర్వాత సీమాంధ్ర నాయకుల్లో మార్పు వచ్చిందా అనే చర్చ కూడా సాగుతోంది. రాష్ట్ర విభజనకు బొత్స సత్యనారాయణ అనుకూలంగా ఉన్నారు. ఈ ప్రభావం ఉత్తరాంధ్ర ప్రజాప్రతినిధులపై పని చేసిందా అనేది కూడా ఆలోచించాల్సిన విషయమే.

English summary

Congress Vijayawada MP Lagadapati Rajagopal kept away from United Andhra round table conference.