చిరంజీవికి ఆజాద్ నుండి అప్పుడే హామీ

By Srinivas

Published: Thursday, January 19, 2012, 11:05 [IST]

కిరణ్ కుమార్ రెడ్డి మంత్రివర్గంలో సి.రామచంద్రయ్యకు, గంటా శ్రీనివాస రావులకు చోటు విషయమై తిరుపతి శాసనసభ్యుడు చిరంజీవికి కేంద్రమంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ ఈ నెల ఆరో తేదినే హామీ ఇచ్చారా? అంటే అవుననే వాదనలు వినిపిస్తున్నాయి. సమన్వయ కమిటీ భేటీ కోసం ఆజాద్ ఐదో తేదిన హైదరాబాద్ వచ్చిన విషయం తెలిసిందే. సమన్వయ కమిటీ నేతలకు చిరంజీవి మరుసటి రోజు ఉదయం విందు ఇచ్చారు. ఆజాద్, పిసిసి చీఫ్ బొత్స సత్యనారాయణ, పలువురు పిఆర్పీ నేతలు కూడా ఈ విందులో పాల్గొన్నారు. ఆ సమయంలో చిరంజీవికి ఆజాద్ నుండి హామీ లభించినట్లుగా తెలుస్తోంది. అందుకే కడప జిల్లా నేతలు, ఇతర కాంగ్రెసు నేతలు, ఎమ్మెల్సీలు ఎంతగా ప్రయత్నించినప్పటికీ రామచంద్రయ్య, గంటాలను తప్పించలేదనే వాదనలు వినిపిస్తున్నాయి.

స్వయంగా ముఖ్యమంత్రి కిరణ్ కుమార్ రెడ్డి కూడా కేవలం చిరంజీవి వర్గాన్నే మంత్రివర్గంలోకి తీసుకోవడంపై అసంతృప్తిగా ఉన్నారనే ప్రచారం జరిగింది. సిఎం అధిష్టానం వద్ద పునర్వ్యవస్థీకరణకు పట్టుబట్టారు. కానీ ఆయన ప్రయత్నాలు ఏవీ ఫలించలేదు. టిడిపి అవిశ్వాసం పెట్టినప్పుడు ప్రభుత్వాన్ని ఆదుకున్నందున చిరంజీవి సూచించిన వారికి పదవులు ఇస్తేనే బావుంటుందని అభిప్రాయపడిన అధిష్టానం ఆమేరకు ఆజాద్ వచ్చినప్పుడే హామీ ఇప్పించినట్లుగా కనిపిస్తోంది. మరోవైపు చిరంజీవికి పిసిసి చీఫ్ బొత్స సత్యనారాయణ కూడా అండగా ఉన్నారనే వాదనలు ఉన్న విషయం తెలిసిందే. విస్తరణపై చర్చించేందుకు మంగళవారం సిఎం ఢిల్లీ వెళ్లే కంటే ముందే బొత్స ఢిల్లీ వెళ్లడం విశేషం.

Published On January 19, 2012