ఆర్టికల్ 131 అస్త్రం: సుప్రీం కోర్టుకు కిరణ్, డౌట్స్?
కేంద్ర రాష్ట్రాల మధ్య లేదా రాష్ట్రాలకు మధ్య వివాదాలు తలెత్తినప్పుడు ఈ ఆర్టికల్ కింద ఆయా ప్రభుత్వాలు నేరుగా సుప్రీంలో ఒరిజినల్ సూట్ దాఖలు చేయొచ్చు. సాధారణ దావా వేసినప్పుడు కారణాల(కాజ్ ఆఫ్ యాక్షన్)ను పరిశీలించి దాన్ని విచారణకు స్వీకరించాలా లేక తిరస్కరించాలా అన్నది కోర్టు నిర్ణయిస్తుంది. ఆర్టికల్ 131 కింద పిటిషన్ దాఖలు చేస్తే వెంటనే ప్రతివాదులకు నోటీసులు జారీ అవుతాయి. సంబంధిత అంశంపై స్టే ఉంటుంది.
అందుకే కేంద్రంపై కాలుదువ్వుతున్న కిరణ్ ఈ ఆర్టికల్నే అస్త్రంగా చేసుకోవాలని భావిస్తున్నారట. కేంద్రం నిర్ణయానికి వ్యతిరేకంగా పిటిషన్ వేసేందుకు అవకాశాలను పరిశీలిస్తున్నట్లు సమాచారం. సాధారణంగా కేంద్రం కానీ, రాష్ట్రాలు కానీ ఈ ఆర్టికల్ కింద దావా వేస్తాయి. అయితే రాష్ట్ర విభజనకు సంబంధించిన వివాదం కేంద్రానికి సంబంధించిందా లేక అసెంబ్లీ పరిధిలోని అంశమా అన్నది పరిశీలించాల్సి ఉంటుంది. అలాగే రాష్ట్రాల విభజనపై కేంద్రానికి పూర్తి అధికారాలిచ్చే ఆర్టికల్ 3 కంటే ఈ ఆర్టికల్ 131 శక్తివంతమైనదా అన్నది కూడా ముందుగా తేల్చాల్సి ఉంటుంది.
కేంద్రం తీసుకున్న విభజన నిర్ణయం అమలుకాక ముందే రాష్ట్రం కోర్టుకు వెళ్లవచ్చా అన్నది తేలాల్సి ఉంది. విభజన బిల్లు పార్లమెంట్లో ఆమోదం పొంది చట్టం రూపం దాల్చితేనే కేంద్ర నిర్ణయం అమల్లోకి వస్తుంది. అంతేకాకుండా ప్రస్తుతం అసెంబ్లీలో ఉన్న బిల్లు రాష్ట్రపతి నుంచి వచ్చింది. కాబట్టి ఈ వ్యవహారం రాష్ట్రపతి, అసెంబ్లీకి సంబంధించిందా లేక కేంద్ర, రాష్ట్ర ప్రభుత్వాలకు చెందినదా అన్నది కూడా సందేహమే.
Click it and Unblock the Notifications
Sign in with Google