బచ్చలి కూర పచ్చడి.. ఇలా ఎప్పుడైనా ట్రై చేశారా..?

ఆకుకూరలు ఆరోగ్యానికి చాలా మంచిది. ముఖ్యంగా ఆకుకూరల్లో విటమిన్ ఏ, సీ, కే, ఫోలిక్ యాసిడ్, ఐరన్, కాల్షియం వంటి పోషకాలు పుష్కలంగా ఉంటాయి. ఇవి రోగనిరోధక శక్తిని పెంచి, అనేక వ్యాధుల నుంచి కాపాడుతాయి. ఇక బచ్చలి కూరను ఆకుకూరల్లో రారాణిగా పిలుస్తుంటారు. దీన్ని పప్పులో వేసినా.. పచ్చడి చేసినా.. పెరుగు పులుసు చేసినా సూపర్ టేస్టీగానే ఉంటుంది. మరి సూపర్ టేస్టీ బచ్చలికూర పచ్చడి ఎలా తయారు చేసుకోవాలి..? కావాల్సిన పదార్థాలు ఏంటి..?

బచ్చలికూర పచ్చడికి కావాల్సిన పదార్థాలు చూస్తే.. బచ్చలి కూర కట్టలు మూడు లేదా నాలుగు, ఎండుమిర్చి పదిహేను, పచ్చిమిర్చి ఐదారు, నూనె తగినంత, చింతపండు కొద్దిగా, ఆవాలు, జీలకర్ర, శనగపప్పు, ధనియాలు, మెంతులు ఒక్కో టేబుల్ స్పూన్ తీసుకోవాలి. అలాగే రుచికి సరిపడా ఉప్పు తీసుకోవాలి.

ఇక బచ్చలికూర పచ్చడి తయారీ విధానం చూస్తే.. ముందుగా బచ్చని కూరను శుభ్రంగా కడిగి కట్ చేసుకోవాలి. పచ్చిమిర్చిని కూడా కట్ చేసుకోవాలి. ఇప్పుడు కడాయిలో ఓ టేబుల్ స్పూన్ నూనె వేసి వేడి చేసుకోవాలి. నూనె కాగిన తర్వాత అందులో ఎండుమిర్చి, ఆవాలు, జీలకర్ర, శనగపప్పు వేసి వేయించుకోవాలి. అవి వేగిన తర్వాత ఆ మిశ్రమంలో ధనియాలు, మెంతులు వేసి వేయించి ఓ ప్లేట్ లోకి తీసుకుని పక్కన పెట్టుకోవాలి.

ఇప్పుడు అదే గిన్నెలో నూనె వేసి అందులో ముందుగా కట్ చేసి పెట్టుకున్న బచ్చలి కూర తరుగు, చింతపండు, పచ్చిమిర్చి తుంపలు వేసి కలపాలి. అలా బచ్చలి కూరను మగ్గించుకోవాలి. అలా మగ్గిన తర్వాత స్టవ్ ఆఫ్ చేసి చల్లార్చుకోవాలి. ఇప్పుడు మిక్సీ జార్ తీసుకుని అందులో ఎండుమిర్చి తాలింపు, బచ్చలికూర వేపుడు, ఉప్పు తగినంత వేసుకుని కాస్త బరకగా గ్రైండింగ్ చేసుకోవాలి. అంతే నోరూరించే బచ్చలికూర పచ్చడి రెడీ అయినట్టే..