రైతుకు మద్దతు ధర కావాలని కోరం: చంద్రబాబు

By Srinivas

Published: Tuesday, July 26, 2011, 12:53 [IST]

హైదరాబాద్: తాము రైతులకు మద్దతు ధర కావాలనో, గిట్టుబాటు ధర కావాలనో ప్రభుత్వాన్ని కోరమని రైతులకు ఇక నుండి లాభసాటి ధర రావాలన్నదే తమ ప్రధాన డిమాండ్ అని తెలుగుదేశం పార్టీ అధ్యక్షుడు నారా చంద్రబాబు నాయుడు మంగళవారం ఎన్టీఆర్ ట్రస్టు భవన్‌లో ప్రారంభించిన రైతు వర్క్‌షాప్ కార్యక్రమంలో అన్నారు. ఇకపై రైతులకు లాభసాటి ధర రావాలన్నదే తమ డిమాండ్ అని స్పష్టం చేశారు. వ్యవసాయం లాభసాటిగా మారేందుకు అందరూ దీర్ఘకాలిక పోరాటాలకు సమాయత్తం కావాలని పిలుపునిచ్చారు. చరిత్రలో మొదటిసారి లక్షల ఎకరాల్లో పంట విరామం (క్రాప్ హాలీడే) ప్రకటించిన పరిస్థితి వచ్చిందన్నారు.

ప్రభుత్వ అస్తవ్యస్థ విధానాల కారణంగా రైతులకు తీరని నష్టం జరుగుతోందన్నారు. రైతులను ప్రభుత్వం ఆదుకోవడంలో పూర్తిగా విఫలం అయిందన్నారు. రైతులకు గిట్టుబాటు ధర కల్పించాల్సిన బాధ్యత ప్రభుత్వంపై ఉందన్నారు. రైతులను ఆదుకోకుంటే భవిష్యత్తులో ఆహార భద్రతకు ముప్పు ఏర్పడే ప్రమాదం ఉందన్నారు. రైతు సమస్యలపై జాతీయ స్థాయిలో పోరాటం చేస్తామన్నారు. కాగా ఈ వర్క్‌షాప్‌లో తెలుగుదేశం పార్టీ నేతలతో పాటు లోక్‌సత్తా, ఉభయ కమ్యూనిస్టు పార్టీలో పాల్గొన్నాయి.

Published On July 26, 2011