రైతులు వ్యవసాయంరంగం నుండి పారిపోవాలనుకుంటున్నారు: జెపి

హైదరాబాద్: సభ సమావేశాలు మొక్కుబడిగా సాగుతున్నయని, గంట ప్రశ్నోత్తరాల సమయం కోసం సభ్యులు రెండుగంటల సమయాన్ని వృధా చేస్తున్నారని లోక్ సత్తా అధ్యక్షుడు జయప్రకాష్ నారాయణ తీవ్ర ఆవేదన వ్యక్తం చేశారు. సభ చూస్తుంటే చిన్నపిల్లల సమావేశంలా ఉందన్నారు. ప్రభుత్వం రైతుల గురించి, వ్యవసాయం గురించి పట్టించుకోవాలన్నారు. నేడు రాష్ట్రంలో వ్యవసాయం పండుగలా లేదని, సంక్షోభంలా ఉందన్నారు. పాలకులు రైతుల కడుపు కొడుతున్నార్నారు. దేశంలో ఎక్కడా లేని విధంగా వరిని, బియ్యాన్ని మన రాష్ట్రం నుండే ఎక్కువ సేకరిస్తున్నారన్నారు.

పార్టీల విధానాల వల్లే వ్యవసాయ రంగం సంక్షోభంలో చిక్కుకు పోయిందన్నారు. రైతును విస్మరిస్తే దేశమే సంక్షోభంలో పడిపోతుందన్నారు. వ్యవసాయంపై బ్రిటిష్ వారి విధానాన్నే మనమూ కొనసాగిస్తున్నామన్నారు. నష్టాలతో రైతు కంట కన్నీరు, గుండె నిండా ఆవేదనే ఉందన్నారు. రైతులతో 70 శాతం మంది తలసరి 15వేల ఆదాయంతో ఉంటున్నారన్నారు. కొందరు 7రెట్లు కంటే ఎక్కువ తలసరి ఆదాయంతో ఉన్నారన్నారు. రైతులు పంట రుణాలు తీసుకుంటే బీమా చెల్లించాలన్న నిబంధనలు సడలించారన్నారు.

రైతులకంటే కౌలు రైతులు మరింత ఎక్కునగా నష్టపోతున్నారన్నారు. కౌలుదార్లకు రుణాలు, రాయితీలు ఇతరత్రా భద్రత చర్యలు చేపట్టాలన్నారు. వ్యవసాయ పనులను ఉపాధి హామీ పథకంతో అనుసంధానం చేయాలని చెప్పారు. పార్టీల దగాకోరు విధానాల వల్లే రైతులకు ఇలాంటి దుస్థితి వచ్చిందన్నారు. గత పదెళ్లలో 3 లక్షల మంది రైతులు ఆత్మహత్యలు చేసుకున్నారన్నారు. రైతుల ఉత్పత్తులు అమ్ముకోవడానికి పక్క రాష్ట్రాల్లోలేని నిబంధనలు, ఆంక్షలు కేవలం మన రాష్ట్రంలోనే ఉన్నాయన్నారు. చాలామంది రైతులు వ్యవసాయరంగంనుండి పారిపోవాలనుకుంటున్నారని ఆవేదన వ్యక్తం చేశారు.

పెద్ద ఎత్తున ఉప్పుడు బియ్యాన్ని ప్రభుత్వం సేకరించాలని ఆయన సూచించారు. తమిళనాడు ముఖ్యమంత్రి కరుణానిధి పత్తి ధరను తగ్గించాలని కేంద్ర ప్రభుత్వానికి రాసిన లేఖను చూపారు. కరుణానిధి తన రాజకీయ ప్రయోజనాల కోసం ఇలాంటి పనులు చేస్తుంటే మనమంతా రైతులను ఆదుకోవటానికి అన్ని పార్టీలు ఒక్కటి అయి కేంద్రంపై ఒత్తిడి తీసుకు రావాలన్నారు. వ్యవసాయానికి కనీస మద్దతు ధరను రూ.500లకు పెంచాలన్నారు. ఈ యేడాది రాష్ట్రం ఆపత్కర పరిస్థితి నుండి బయట పడటం ప్రభుత్వ చొరవవల్ల కాదని అది ప్రకృతి కారణంగానే అన్నారు. రైతులను యూనిట్ గా తీసుకొని పంటన భీమా ఇవ్వాలన్నారు.