NEET UG 2026 Re-Exam: అభ్యర్ధులకు ఎన్టీఏ మరో షాక్- చావు కబురు చల్లగా..!

ఈ ఏడాది వైద్య విద్య ప్రవేశాల కోసం నిర్వహించిన నీట్ యూజీ పరీక్ష (NEET UG 2026)లో ప్రశ్నాపత్రాలు లీక్ కావడంతో జాతీయ టెస్టింగ్ ఏజెన్సీ ఈ పరీక్షను రద్దు చేస్తున్నట్లు ప్రకటించింది. దీంతో 23 లక్షల మంది విద్యార్ధులకు షాక్ తప్పలేదు. ఆ తర్వాత నీట్ పరీక్షను ఈ నెల 21న మరోసారి నిర్వహించాలని నిర్ణయించింది. ఈ నేపథ్యంలో అభ్యర్ధులకు ఎన్టీఏ మరో షాక్ ఇచ్చింది. రీటెస్ట్ కోసం విడుదల చేసిన అడ్మిట్ కార్డుల విషయంలో సమస్య తలెత్తింది.

నీట్-యూజీ 2026 పునఃపరీక్షకు సంబంధించిన అడ్మిట్ కార్డులను జాతీయ పరీక్షల ఏజెన్సీ విడుదల చేసిన మరుసటి రోజే, రీఫండ్ వెరిఫికేషన్‌కు సంబంధించిన ఒక సాంకేతిక లోపం కారణంగా తమ బ్యాంకు వివరాలు మాయమయ్యాయని పలువురు అభ్యర్థులు ఆరోపించారు. దీంతో ఈ జాతీయ స్థాయి వైద్య ప్రవేశ పరీక్ష నిర్వహణపై మళ్లీ ఆందోళన మొదలైంది. రీఫండ్ వెరిఫికేషన్ ప్రక్రియ తప్పుదోవ పట్టించే విధంగా మారిందని, ఇది అభ్యర్థులు తమ అడ్మిట్ కార్డులను సజావుగా డౌన్‌లోడ్ చేసుకోకుండా అడ్డుకుంటోందని విద్యార్థులు సోషల్ మీడియా వేదికలపై ఆరోపిస్తున్నారు.

ఎన్‌టీఏ నీట్ రీఫండ్ వెరిఫికేషన్ ఒక ఉచ్చు. కేవలం అడ్మిట్ కార్డు పొందడం కోసం మీరు మీ బ్యాంకు వివరాలను సవరించకూడదని ఎంచుకుంటే, రీఫండ్ కోసం వివరాలు ఇవ్వకూడదని మీరు అంగీకరించారని చూపిస్తోందని అభ్యర్ధులు ఆరోపిస్తున్నారు. అసలు ఇలాంటి తప్పుదోవ పట్టించే ఆప్షన్‌ను ఎందుకు పెట్టారని, ఇప్పటికైనా ఎన్టీఏ విద్యార్ధుల్ని ఇబ్బందిపెట్టడం ఆపాలని కోరుతున్నారు. ఇంతకు ముందే బ్యాంకు ఖాతా వివరాలు అందించినప్పటికీ, అడ్మిట్ కార్డును పొందేందుకు అనుమతించే ముందు అవే వివరాలను మళ్లీ ధృవీకరించుకోమని పోర్టల్ అభ్యర్థులను కోరుతున్నట్లు ఆరోపణలు వస్తున్నాయి. ఫిర్యాదులపై స్పందిస్తూ, అడ్మిట్ కార్డులను పొందే క్రమంలో అభ్యర్థులు సాంకేతిక, సర్వర్ సంబంధిత సమస్యలను ఎదుర్కొంటున్నారని ఎన్‌టీఏ అంగీకరించింది.