ఏపీలో టెన్త్ మార్కుల రీకౌంటింగ్, రీవెరిఫికేషన్ దరఖాస్తుల ఆహ్వానం..!

ఏపీలో ఈ ఏడాది పదో తరగతి పరీక్షల ఫలితాలు (AP SSC Results 2026) తాజాగా వెలువడ్డాయి. అయితే ఈ పరీక్షా ఫలితాలతో సంతృప్తి చెందని విద్యార్ధులకు మార్కుల రీకౌంటింగ్, జవాబు పత్రాల రీవెరిఫికేషన్ కోసం ప్రభుత్వం దరఖాస్తులు ఆహ్వానిస్తోంది. దీనికి సంబందించిన తేదీలు, ఫీజులు, ఇతర వివరాలను ప్రభుత్వ పరీక్షల విభాగం డైరెక్టర్ డాక్టర్ కె.వి.శ్రీనివాసులు రెడ్డి ఇవాళ ఓ ప్రకటన ద్వారా వెల్లడించారు.
​
​మార్చి 2026లో జరిగిన SSC (పదవ తరగతి) పబ్లిక్ పరీక్షలకు సంబంధించి, జవాబు పత్రాల రీకౌంటింగ్ (Recounting) , రీ-వెరిఫికేషన్ (Re-verification) కోసం ఆన్‌లైన్ లో దరఖాస్తులను స్వీకరిస్తున్నట్లు ప్రభుత్వ పరీక్షల విభాగం, డైరెక్టర్ డాక్టర్ కె.వి. శ్రీనివాసులు రెడ్డి ఒక ప్రకటనలో తెలిపారు. ​మే 1 నుంచి ఏడవ తేదీ వరకు అభ్యర్థులు తమ సంబంధిత పాఠశాల లాగిన్ ద్వారా దరఖాస్తు చేసు కోవాల్సి ఉంటుందన్నారు. ఆసక్తి గల విద్యార్థులు తమ పాఠశాల ప్రధానోపాధ్యాయులను సంప్రదించి దరఖాస్తును సమర్పించాలని సూచించారు.

​రీకౌంటింగ్ కు అభ్యర్థులు ఒక సబ్జెక్టుకు రూ .500/-, ​రీ-వెరిఫికేషన్ కు ఒక సబ్జెక్టుకు ₹రూ.1,000/- చెల్లించాల్సి ఉంటుందన్నారు. ఫీజును కేవలం www.bse.ap.gov.in వెబ్‌సైట్‌లోని ఆన్‌లైన్ పేమెంట్ గేట్‌వే (Debit Card / Credit Card / Net Banking / UPI) ద్వారా మాత్రమే చెల్లించాలన్నారు. CFMS సిటిజన్ చలానా ద్వారా చెల్లింపులు స్వీకరించబడవన్నారు. ​జవాబు పత్రాల డౌన్‌లోడ్ సదుపాయం కల్పించామని, ​గత సంవత్సరాల్లో రీ-వెరిఫికేషన్ కోసం దరఖాస్తు చేసుకున్న విద్యార్థుల జవాబు పత్రాలు కేవలం స్కూల్ లాగిన్‌లో మాత్రమే అందుబాటులో ఉండేవన్నారు. అయితే, ఈ ఏడాది నుండి అదనంగా విద్యార్థుల సౌకర్యార్థం WhatsApp Governance (Mana Mitra service: 955230 0009) ద్వారా కూడా స్కాన్ చేసిన జవాబు పత్రాలను డౌన్‌లోడ్ చేసుకునే అవకాశం కల్పించినట్లు తెలిపారు. మరిన్ని వివరాలకు అధికారిక వెబ్‌సైట్ www.bse.ap.gov.in సందర్శించాలన్నారు.